واشنګټن – ایراني چارواکو په ټول هېواد کې په زیات شمېر هغه دوکانونه او تجارتونه تړلي دي، چې د هغوی په وینا د حجاب کولو د لازمي قانون خیال یې نه ساته.
د راپورونو له مخې، د ایران د کرمانشاه د پولیسو قومندان علي اکبر جاوېدان ویلي، چې د عامه ځایونو د څار څانګې له اړوندو ادارو سره د حجاب د پلان پلي کېدل پیل کړي.
جاوېدان ویلي، ۴۵ تجارتونه یې وروسته له هاغې بند کړي چې د حجاب ساتلو د قانون خیال یې نه ساته او په دې اړه یې خبرداري ته پام نه و کړی.
ایران په دې وروستیو کې په ټول هېواد کې د حجاب ساتلو د څار پروګرام پیل کړی چې په زوره په ښځو باندې حجاب واغوندي خو زیاتې ښځې لیدل کېږي چې ددغه قانون خیال نه ساتي.
د امریکا غږ فارسۍ څانګې په وروستیو اونیو کې ګنې داسې ویډیوګانې ترلاسه کړي چې پکې د هېواد په بېلابېلو سیمو کې ښځې ښکاری چې حجاب نه پلی کوي.
د ایران دولتي خبري رسنۍ ویلي، د لازمي حجاب کولو دغه پروګرام د اپرېل په ۱۵ نېټه پیل شوی.
تر دې یوه اونۍ مخکې، د ایران د ملي پولیسو مشر احمد رضا رضان ویلي و چې چارواکي به په پرمختللې توګه د حجاب ساتل وڅاري چې په هغو کې به کوڅو کې کامرې هم وي چې هغه ښځې وموموي چې د حجاب له قانون څخه سرغړونه کوي.
د حجاب په اړه د ایران قانون له ښځو غواړي چې په عامو ځایونو کې حجاب واغوندي او خپل وېښته پټ وساتي.
په ایران کې له پولیسو سره د مهسا امیني له مړینې وروسته زیاترو ښځو له دغه قانون سره مخالفت کړی.
۲۲ کلنه کردۍ مهسا امیني په دې تور د پولیسو لخوا نیول شوې وه چې شرعي حجاب یې نه و کړی او بیا له پولیسو سره د هغې مړینې په ټول ایران کې لاریونونه راوپارول.
امنیتي ځواکونو لاریونونه وځپل او د بشري حقونو د فعالانو خبري ادراې خبر ورکړی چې د جنورۍ تر لومړیو پورې په دغو لاریونونو کې ۵۱۶ کسان وژل شوي چې ۷۰ تنه یې ماشومان وو.
د بشري حقونو د څار امریکا مېشتې ادارې خبر ورکړی چې د ایران په لاریونونو کې تر ۱۹۲۰۰ زیات کسان نیول شوي چې په هغو کې ۶۸۷ زده کونکي هم دي.
که څه هم د حجاب نه کولو له امله ښځې نیول کېږي خو بیا هم په مالونو، ریسټورانټونو، دوکانونو او سړکوو باندې په زیات شمېر ښځې لیدل کېږي چې د ایران حجاب نه کوي.
د پولیسو د مخکیني ګواښ سره سره زیاتې ښځې لیدل کېږي چې عامه ځایونو کې ټکري نه په سروي او بیا خپل دا ډول انځورونه او ویډیوګانې په ټولنیزو رسنیو خپروي.
