واشنګټن- د پاکستان د مالياتو وزارت ويلي حکومت د شورو- چارشنبې په ورځ د ازربايجان سره د لېکويفايډ نيچرل ګيس (ايل اين جي) د کاروبار د لوظنامې کولو منظوري ورکړې ده.
پاکستان د تېر کال د قيمتونو چې په اوکرين د روس د يرغل نه وروستو سېوا شوي دي لا د قدرتي مایع ګېس د کاروبار لوظنامه د چا سره نه ده کړې.
پاکستان چې د 220 ميلين خلکو ابادي لري د توانايۍ د کموت سره مخ دی او زيات لوډشيډېنګ پکې کيږي ځکه چې د ملک ډېر توانايي پيدا کوونکي پلانټس په ګېس چليږي.
د پيسو د کمي په وجه پاکستان نه شو کولی په ازاد مارکيټ کې ایل این جي ګېس واخلي او د بهر دنيا سره د مرکزي بېنک د کاروبار مالي پانګې دومره کمې شوي چې د مخصوص څيزونو د اخستلو د پاره په مشکله د يوې مياشتې پيسې لري.
البته دې اوونۍ اسلام اباد د ايشين سپاټ ايل اين جي ټينډرې جاري کړي چې دوه کارګوګانې واخلي. دا وخت نزدې لس ډالر د يو بيرل تېل قيمت دی چې دا تېر کال ډېر په بره تلی وو او اويا ډالر ته رسېدلی وو.
د مایع قدرتي ګېس اخستلو منظوري د پاکستان اکنامک کوارډينيشن کميټي لخوا ورکړل شوې چې وزارت وکړی شي د ملک د ايل اين جي لمېټېډ او سټيټ اويل کمپني ازربايجان تر منځ د لوظنامې جزيات ترتيب کړي.
دا پرېکړه د وزير اعظم شهباز شريف د شورو- چارشنبې په ماښام د منځنۍ ايشيا د هېواد د دورې نه وړاندې شوې. په يو بيان کې شهباز شريف ويلي “زه د ازربايجان د قيادت سره مهمې خبرې لرم چې څنګه د توانايۍ، بېنکنګ، مالي خدمات او ايي ټي څانګو کې د ملګرتيا لارې خلاصې کړو”.
هغه وويل “مونږ د منځنۍ ايشيا د هېوادونو سره ملګرتيا ته ژمن يو چې پاکستان د توانايۍ په برخه کې محفوظ شي”.
د ايل اين جي د لوظنامې تفصيل نه دی ښودل شوی چې قيمت به څه وي او دا لوظنامه به څه شرايط لري.
د پاکستان د پيټروليم وزير مصدق ملک تېره ورځ ويلي وو ازربايجان به هره مياشت يو ايل اين جي کارګو په ارزان قيمت ورلېږي چې د راوړلو چارې به يې ايس او سي ای ار ټريډېنګ په مخ وړي. هغه دا ونه ويل دا مياشتنی کاروبار به کله عملي کيږي.
یادونه:- د دې رپوټ معلومات له رویټرز خبري ایجنسۍ نه اخیستل شوي دي.
