واشنګټن - بنګله دېش کې تمه ده چې حزب اختلاف (بنګله دېش نېشنل پارټي یا بي اېن پي) به د نهې/سې شنبې او د شورو/چهارشنبې په ورځو تازه مظاهرې وکړي. دا احتجاجونه په داسې وخت کې مخې ته راځي چې راتلونکي عمومي انتخابات ممکن په جنوري میاشت کې ترسره شي او حزب اختلاف د موجوده حکومت مستعفي کېدل او پرځای یې د نګران حکومت جوړېدو مطالبه کړې ده.
بي اېن پي او بنګله دېش کې یو شمېر فعالان دعوه لري چې د وزیراعظمې شیخ حسینه حکومت د حزب اختلاف د ځینو مشرانو په ضد ملتوي شوي کېسونه چې د پولیسو سره دي، هغه ته تېزي ورکړي او په دې توګه په انتخاباتو کې د هغو مشرانو د برخې اخېستو مخه ونیسي. تېره هفته هم د حکومت ضد یوه مظاهره په بنګله دېش کې شوې وه.
اوس مهال په بنګله دېش کې د عوامي لیګ (اې اېل) ګوند حکومت چلوي.
د جولائی په شپږمه نېټه، د پولیسو یو ډي آئی جي په پایتخت ډاکه کې د نورو جګپوړو پولیس چارواکو سره ملاقات وکړ او هغو ته یې اختیار ورکړ چې د بي اېن پي او د یو بل حزب اختلاف، جماعت اسلامي بنګله دېش یا جې اي اېل د مشرانو او کارکنانو په اړه د درجو شوو مقدمو په باب معلومات راغونډ کړي.
د دغو ګوندونو په غړو باندې د کال 2013 راهېسي د اور اچولو، په پولیسو باندې د تشددآمیزه حملو، او نورو جرمونو الزامونه لګول شوي دي.
په بنګله دېش کې د جمهوریت پاله فعالانو یوې ډلې د پولیسو د غونډې په اړه معلومات د وي او اې سره شریک کړي دي. دا معلومات د بنګله دېش اکثرو رسنیو ته هم ورکړی شوي، مګر هغو رسنیو د پولیسو د ېرې دا موضوع نظراندازه کړې ده.
د شیخ حسینه د حکومت په دوران کې، د بنګله دېش رسنیو پر ځان باندې سېنسرشپ معمول ګرځولی دی. څو تنه خبریالان د حکومت او یا واکمن ګوند په خلاف د رپوټونو د لیکلو په وجه، د بنګله دېش د ډیجیټل سیکوريټي د قانون ترلاندې سزا ګانې لیدلي دي.
خو بیا هم د بنګله دېش سترې انګریزي ژبې ورځپاڼې، د ډېلي سټار او یو بل اخبار چې نیو اېج نومیږي، د پولیسو د غونډې په هکله یې معلومات خپاره کړي دي. پولیسو تر اوسه د دغو ورځپاڼو په ضد کوم غږ نه دی اوچت کړی او نه یې د هغې جلسې د خپاره شوو معلوماتو په رد کولو کې کوم خبري کنفرنس جوړ کړی دی.
بنګله دېش کې د حزب اختلاف د مشرانو او کارکنانو په ضد د مقدمو کاروايي، ګڼ شمېر کلونه وخت اخلي. په اکثرو مقدمو کې سرکاري وکیلان پوره شواهد نشي پېش کولی.
د څرګندو شوو معلوماتو ترمخه، د پولیسو په غونډه کې ډېپټي انسپکټر جنرل جویډېب بهادرا، جګپوړو پولیس چارواکو ته په مبینه توګه امر کړی چې په هغو مقدمو دې زیاته توجه وکړي کوم چې په کې د بي اېن پي او جې اي اېل ګوندونو مشران تورن شوي دي، په خصوص هغه مشران چې اټکل کیږي په آینده عمومي انتخاباتو کې به برخه واخلي.
په بنګله دېش کې د ډېرې مودې راهیسي دا دعوه کیږي چې عدالتي نظام او پولیس د واکمن ګوند یا د شیخ حسینه د حکومت په ملاتړ کار کوي. د دې نه علاوه، هیومن رایټس واچ او نور د بشري حقونو ډلې هم دعوه کوي چې د بنګله دېش پولیسو د حزب اختلاف د مشرانو په ضد سخته رویه پیل کړې ده.
وي او اې د خپاره شوو معلوماتو په حوالې سره د ډي آئی جي بهادرا نه په مسېنجر باندې د هغه نظر وغوښت، مګر تر اوسه یې څه جواب ندی ورکړی. وي او اې همدا شان د بنګله دېش داخله وزارت نه چې پولیس یې د کنټرول لاندې دي، هم په دې باب پوښتنه وکړه، خو څه جواب یې ندی ورکړی.
