(روئټرز) - د ملګرو ملتونو سېکرېټري جنرل انټونیو ګوټېرش وایي چې سږکال د جولائی میاشت، د ګرمۍ پخواني ریکارډونه مات کړل. ساینسدانانو هم خبر ورکړی چې دا میاشت به په نړۍ کې تر ټولو د ګرمې میاشتې ریکارډ جوړه شي.
د ملګرو ملتونو د موسمیاتو نړېوال تنظیم (ډبلیو اېم او) او د یورپي اتحاد متعلق د کوپرنیکوس کلایمټ چېنج سروسز ادارې هم په یو مشترک بیان کې ویلي، "ډېر زیات ممکن دی" چې د ۲۰۲۳ کال د جولائی میاشت د ګرمۍ ریکارډ مات کړي.
ګوټېرش د زیارت/پنجشنبې په ورځ په نیویارک کې وویل: "ضروري نه ده چې د میاشتې تر آخره صبر وکړو چې په دې پوهه شو...موسمي بدلون رارسېدلی دی. دا یروونکی دی. او دا یې پیل دی. د نړېوالې اېشېدنې دوران رارسېدلی دی."
د جولائي د میاشتې د ګرمۍ اثرات په ټوله نړۍ کې لیدلی شوي دي. په زرهاوو سېلګران د یونان د روډس جزیرې ځنګلي اورونو تېښتې ته مجبوره کړي دي. د امریکا په جنوب لویدیځو علاقو کې هم ګڼ شمېر خلک د سختې سوځوونکې ګرمۍ نه کړېدلي دي. د چین په یوه شمالغربي علاقه کې د تودوخي درجه 52.2 سنټيګرېډ ته رسېدلې چې د چین په کچه یې ریکارډ جوړ کړلو.
که څه هم د موسمیاتو نړېوالې ادارې د جولائی میاشت ګرمي په ریکارډ کچه نده اعلانه کړې ځکه ډېټا یې په اګسټ میاشت کې حتمي ګرځوي، خو د جرمني لېپزیګ پوهنتون یوه څېړنه چې د زیارت/پنجشنبې په ورځ خوره شوله، په کې ویلی شوي چې د 2023 کال جولائی میاشت، ریکارډ مات کړی دی.
تر دې وړاندې د ټولې ګرمې میاشتې ریکارډ د 2019 کال جولائی میاشت وه چې په 174 کلونو کې دومره ګرمي کله هم نه وه لیدلې شوې. خو سږکال د 2019 کال ریکارډ هم مات شوی دی.
د امریکې په پنسلوېنیا ریاست کې د موسمیاتو یو ساینسدان مایکل من وایي چې د جولائی دغې میاشتې مونږ ته دا وښوده چې "تر هغو به د ځمکې د موسم ګرمي اضافه کیږي چې مونږ د فوسیل سون توکو سوځولو ته دوام ورکړو."
په عادي توګه د جولائی میاشتې د ګرمۍ درجه په ټوله نړۍ کې په اوسط یا منځنۍ کچه 16 سنټیګرېډ بلل شوې، هغه هم په داسې وخت کې چې د ځمکې جنوبي برخي ملکونو کې دا میاشت د ژمي موسم وي. خو سږکال د جولائی میاشت کې دا حد اوسط 17 درجو ته لوړ شو.
