د امریکا پخوانی صدر ډونالډ ټرمپ د زیارت/پنجشنبې په ورځ د هغو نویو الزامونو په مقدمه کې چې په څلورم فرد جرم کې ورباندې لګېدلي دي، د جورجیا ریاست په فالټن کاونټي (ضلع) کې ځان پولیسو ته وسپارلو او د ګرفتارۍ نه قریب شل مېنټه پس بېرته د هغه جېل نه راووتلو.
ټرمپ د جورجیا په وخت، د ماښام په اووه نیمو بجو جېل ته ورسېد، او هلته یې پولیسو د مقدمې په تړاو، تصویر واخست.
د ټرمپ وکیلانو څو ورځې وړاندې د فالټن کاونټي له سرکاري وکیلې فاني وېلېس سره په دې جوړه کړې وه چې ټرمپ به د ضمانت په کېښودلو سمدستي بېرته آزاده کیږي، نو نن یې دوه لاکه ډالر د ضمانت په توګه کېښودل او بېرته آزاد شو.
دا په تېرو پېنځو میاشتو کې څلورم ځل و چې ټرمپ ګرفتاره شو. دغه څلورمه مقدمه یې په دې ده چې ګني ټرمپ د 2020 کال په انتخاباتو کې کوشش کړی و چې په جورجیا ریاست کې د انتخاباتو په نتیجو کې د سازش له طریقه بدلون راولي او خپل بایلل په ګټل بدل کړي.
ټرمپ جورجیا ته د تللو نه مخکې د سماجي رابطې په وېب پاڼه "ټروت سوشل" د حېرانتیا اظهار کړی و او لیکلي یې و: "تاسو یقین کولی شئ؟ چې زه د زیارت، پنجشنبې، په ورځ اېټلانټا، جورجیا ته ځم چې ګرفتار شم."
اېسوسي اېټېډپرېس خبري اداره وايي د امریکې په تاریخ کې دا لومړی ځل و چې د عامو قېدیانو په شان د هېواد د یو پخواني صدر د مخ تصویر یا مګ شاټ واخستلی شو.
ای پي وايي د سږ کال د مارچ د میاشت راهسې په ټرمپ څلور مجرمانه الزامات لګول شوي دي. د مارچ په میاشت کې د امریکې په تاریخ کې په لومړي ځل په یو پخواني صدر فرد جرم ولګول شو.
د مارچ نه پس او د جورجیا نه مخکې په فلورېډا ریاست او سرښار واشنګټن کې هم د ټرمپ په ضد د وفاقي حکومت الزامات لګول شوي دي.
په جورجیا کې د ټرمپ ترڅنګ په ۱۸ نورو کسانو هم فرد جرم لګول شوی چې په کې د نیویارک پخوانی ښار وال او د ټرمپ شخصي وکیل روډي جولیاني او د هغه پخوانی چیف اف سټاف مارک مېډوز هم شامل دي. جولیاني د شورو، چهارشنبې، په ورځ ځان چارواکو ته سپارلی دی او د مجرم په شان تصویر یې اخیستل شوی دی.
ټرمپ په هغه لګول شوي الزامات ردوي او سیاسي انتقام يې بلي.
Forum