پېښور- پولیس سرچینې وایي د خېبر پښتونخوا په ټانک ضلعه کې وسله والو د پولیسو یوه څوکۍ باندې برید کړی چې پکې یو پولیس عسکر وژل شوی دی.
د شورو یا چهارشنبې په ورځ د سیمې نه پولیس سرچینو وي او ای ډیوه ته ویلي دا برید د ټانک د سټي پولیس تاڼې په حدودو کې په سمیع الله پولیس څوکۍ شوی دی.
سرچینې وایي وسله والو په پولیس څوکۍ ناتاره ډزې کړي چې پکې د احسان الله په نوم یو د لیویز پولیسو عسکر په موقع وژل شوی دی .
د سرچینو په وینا تر برید وروسته وسله وال په تېښته بریالي شوي اؤ په ګڼ شمیر کې پولیس د پېښې ځای ته رسیدلي اؤ د لټون عملیات یې پیل کړي دي .
په سمدستي توګه د دې برید پړه چا پرغاړه نه ده اخېستې .
تر دې پېښې یوه ورځ وړاندې هم په ټانک ضلعه کې ترهګرو په جنډوله پولیس تاڼه د راکټونو برید کړی و خو په دغه برید کې پولیسو ته هیڅ مرګ ژوبله نه ده وه اوښتې.
تحریک طالبان پاکستان یا ټي ټي پي په خپل یو لنډ بیان کې په جنډوله پولیس تاڼه د شوي برید ذمه واري قبوله کړې وه.
په پاکستان اؤ په ځانګړي ډول بیا په خېبر پښتونخوا کې په دې وروستیو کې په امنیتي ځواکونو، پولیس تاڼو اؤ پوځي ودانیو د ترهګرو بریدونو کې زیاته چټکتیا رامنځته شوې ده چې په دې بریدونو کې په سلګونو پولیسو، پوځیانو، د ایف سي اؤ رینجرز ځواکونو خپل ژوند د لاسه ورکړی دی.
هم پرون د شورو یا چهارشنبې په ورځ د خېبر پښتونخوا په چترال سیمه کې د افغانستان له لوري د ټي ټي پي وسله والو د پوځ په دوؤ څوکیو خونړي بریدونه کړي وؤ چې د پوځ په وینا دې بریدونو کې څلور پوځيان اؤ 12 ترهګر وژل شوي دي.
پاکستان کې د یوې غیر دولتي څېړنیزې ادارې پاکستان انستيټیوټ فار کنفلکټ اینډ سیکورټي سټديز رپورټ وایي سږ کال د اګست په میاشت کښې په ګرد هیواد کښې د ترهه ګرۍ 99 پیښې رپورټ شوې دي چې دا د 2014م نه راپدېخوا په یوه میاشت کې تر تولو زیاتې پېښې دي.
دغه رپورټ وایي د اګست په میاشت کې شوو د ترهه ګرۍ پیښو کې په ګرد هیواد کې 112 تنه وژل شوې دي اؤ د جولايي د میاشتې په مقابله کې په اګست کې ترهه ګري 93 فیصدي زیاته شوې ده.
رپورټ وايي بلوچستان اؤ د خیبر پښتونخوا قبایلي ضلعې د اګست په میاشت کې د ترهه ګرۍ نه تر ټولو زیاتې اغیز منې شوې دي اؤ بلوچستان صوبه کې د تیرې میاشتې په مقابله کې ترهه ګري 65 فیصدي اؤ د پښتونخوا قبایلي ضلعو کښې 106 فیصدي سیوا شوې ده.
Forum