پاکستان بار کونسل [د قانون پوهانو وکیلانو اتحادیې] ويلي "په ملک کې د انتخاباتو وروسته کېدو په حواله ګنګوسې دي، الېکشن کمېشن دې د ايين ترمخه په ملک کې په 90 ورځو کې انتخابات وکړي او صدر دې په دغه لړ کې خپل اييني کردار ولوبوي".
پاکستان بار کونسل ویلي، په اسلام اباد کې د پاکستان د قانون پوهانو استازو غونډه شوې، په ملک کې د سياسي بحران، د انتخاباتو کولو، وکيلانو د نیولو، بجلۍ د زیاتو بلونو او بې درکه کسانو په موضوعاتو یې بحث کړی دی.
د بار کونسل په اعلاميه کې ويل شوي، د وکيلانو د نيولو غندنه شوې او د نيول شوو وکيلانو په سمدستي ډول خوشي کولو غوښتنه یې کړې ده.
بار کونسل ويلي، ټول بې درکه کسان دې عدالتونو ته وړاندې کړی شي.
وکيلانو د سیاسي ګوندونو نه غوښتي چې په 90 ورځو کې د انتخاباتو کولو دپاره ګامونه پورته کړي او نګران حکومت دې د اقتصادي بحران په حواله ټول ګونديز کانفرنس راوبلي.
پاکستان بار کونسل په نهم ستمبر په ټول ملک کې د کاربنديز اعلان کړی دی.
د پاکستان د نګران حکومت د اطلاعاتو وزير مرتضا سولنګي ویلي، حکومت به د الېکشن کمېشن په اعلان د انتخاباتو په کولو کې هر ډول ممکنه مرستې کوي او د بجلۍ په بلونو کې د ولس ته د ښېګړې ورکولو په حواله به راتلونکو ورځو کې هر څه واضحه شي.
د سرکاري خبري ادارې اې پي پي ترمخه سولنګي د زيارت په ورځ يو شخصي ټي وي سره په خبرو کې ویلي، الېکشن کمېشن کله انتخابات اعلان کړي حکومت به یې مرسته کوي ځکه دوی د ايين د ساتنې سوګند پورته کړی دی.
هغه ويلي، دوی ته چې کوم مېنډېټ ترلاسه شوی د هغې لاندې به کار کوي، رڼې او بې طرفه ټاکنې يا انتخابات کول د الېکشن کمېشن کار دی.
په درېم ستمبر پاکستان کې د بشري حقونو کمېشن [اېچ ار سي پي] هم ملک کې د انتخاباتو په حواله غېر يقيني حالاتو باندې اندېښنه څرګنده کړې او د الېکشن کمېشن نه یې په سمدستي توګه د انتخاباتو د مهالوېش [شيډول] اعلانولو غوښتنه کړې وه.
د پاکستان الېکشن کمېشن په 17م اګست ويلي وو، د 14م دسمبر پورې به نوې حلقه بنديانې کولی شي او د دغه اعلان سره سم پاکستان کې د انتخاباتو د ټاکلې مودې نه په وروسته کېدو پوښتنې راولاړې شوې وې.
د اييني چارو پوهانو په وینا کله قامي اسمبلي د وخت څخه مخکې تحليل شي نو بيا عام انتخابات په 90 ورځو کې کې دننه کول وي او که چري اسمبلۍ په خپل وخت تحلیل کيږي نو بيا به د دستور ترمخه انتخابات په 60 ورځو کې دننه کول وي. د پاکستان تېره قامي اسمبلۍ د وخت نه وړاندې تحليل يا ماته کړی شوې وه.
په اییني توګه د پاکستان د تېر حکومت موده په 12م اګست سرته رسېدونکې وه خو مخکيني وزیراعظم شهباز شریف په نهم اګست د قامي اسمبلۍ ماتولو سپارښتنه د هیواد صدر ته لیږلې او صدر عارف علوي هم په هغه ورځ د قامي اسمبلۍ ماتولو منظوري ورکړې وه.
خو د روانې میاشتې په سر کې بیا الېکشن کمېشن ویلي وو، د سياسي ګوندونو سره د مشورو او حلقه بنديانو زر تر زره بشپړ کولو دپاره د حلقه بنديانو کولو نېټه راکمه کړی شوې او ختمي حلقه بندۍ به په 30م نومبر اعلانولی شي.
الېکشن کمېشن ویلي، د حلقه بنديانو کولو وخت راکمولو هدف زر انتخابات ممکن کول دي.
Forum