د نړۍ د شلو اقتصادي طاقتونو ډلې یا جي-۲۰ مشرانو د اتوار/یکشنبې په ورځ د نوې ډیلي په راج ګهټ مېموریل کې، چې د هند د عدم تشدد غورځنګ مشر مهاتما ګاندهي ته ځانګړی شوی دی، هغه ته خراج تحسین وړاندې کړ.
د هند وزیراعظم نرېندرا مودي په اېکس (پخواني ټوېټر) د ګاندهي احترام ته د نړۍ د مشرانو د ورتګ تصویرونه خپاره کړي او ورسره یې لیکلي دي: "په مشهوره راج ګهټ کې، د جي-۲۰ کورنۍ مهاتما ګاندهي ته خراج تحسین پېش کړو. داسې حال کې چې متنوع قامونه راپیدا کیږي، د ګاندهي جي لازوال نظریات، د یو هماهنګ، جامع، او خوشحاله عالمي آیندې دپاره زمونږ اجتماعي نقطه نظر رهنمایي کوي."
نړېوالو مشرانو چې سږ کال د هند په کوربه توب د جي-۲۰ په دوه ورځېني اجلاس کې برخه اخستې وه، د خالي/شنبې په ورځ اوکراین باندې د روس د یرغل په اړه د یوې مشترکې اعلامیې په جاري کولو اتفاق وکړ.
د اوکراین د جګړې په اړه دا اعلامیه، د تېرکال د اعلامیې په نسبت چې د انډونېشیا په بالي کې جاري شوې وه، ډېره نرمه لهجه لري. تېر کال جي-۲۰ اجلاس، په اوکراین باندې د روس حمله غندلې وه او په روس یې غږ کړی و چې د اوکراین نه دې خپل عسکر وباسي. سږکال د جي-۲۰ اعلامیې، په اوکراین کې د روس د دوامداره موجودیت غندنه نده کړې.
د هند دپاره، چې اوس مهال د جي-۲۰ ډلې مشري په غاړه لري، پر دې اعلامیې باندې د ډلې د ټولو غړو اتفاق یوه لاس ته راوړنه ده.
مګر د اوکراین د خارجه وزارت یو ترجمان، اولېګ نیکولېنکو په خپل فېسبوک باندې ویلي چې دا اعلامیه "څه د فخر وړ اعلامیه نده".
جي-۲۰ ډلې د خالي/شنبې په ورځ اعلان وکړ چې د افریقې اتحاد به د دوی نوی غړی وي. د هند وزیراعظم نرېندر مودي په اېکس (پخواني ټوېټر) لیکلي دي: "دا به جي-۲۰ پیاوړې کړي".
جي-۲۰ ډلې د خالي/شنبې په ورځ یوه بله غونډه هم جوړه کړه کومې کې چې د مشرق وسطی او جنوبي ایشیا د اتصال یا نښلولو په مقصد د بین الاقوامي رېلونو او بندرونو منصوبه اعلانه شوه.
د هند وزیراعظم نرېندرا مودي وویل: "نن چې مونږ د رابطو جوړولو دغسې یوه ستره منصوبه پیلوو، د آینده نسلونو دپاره تخمونه کرو چې لوی خوبونه وپالي."
د دې منصوبې ترمخه، د منځني ختيځ ملکونه به د رېل ګاډو په ذریعه یو بل سره نښلول کیږي او بیا به ټول د بندرونو د لارې هندوستان سره وصل کیږي.
د امریکا صدر جو بایډن وویل چې دا منصوبه "په رښتیا سره ډېره لویه" ده چې د دوو براعظمونو بندرونه سره وصل کوي او کولی شي اثرات یې د منځني ختیځ په استحکام، خوشحالي، او یووالي کې اضافه راوستل وي. د بایډن وینا وه چې دا منصوبه همدا راز د صفا انرجۍ او صفا بجلۍ دپاره بې انتها فرصتونه راپیدا کړي.
Forum