د افغانستان او پاکستان ترمنځ د تګ راتګ او سوداګرۍ غټه لاره، تورخم دروازه په اتمه ورځ هم تړلې پرته ده. د پولې پرانیستو د غوښتنې دپاره نن يو ځل بيا دروازې ته نزدې په لنډي کوتل بازار کې احتجاجي مظاهره شوې ده.
په احتجاجي مظاهره کې سوداګرو، ټرانسپورټرانو، سياسي او ځايي خلکو سره د پښتون ژغورنې غړو هم برخه اخیستې ده. درې ورځې وړاندې هم په لنډي کوتل کې دغه ډول مظاهره شوې وه.
يو سوداګر شاهد شينواري وايي، د تورخم دروازه د ځايي خلکو د روزګار زريعه ده، او په اربونو روپۍ د پاکستان خزانې ته هم تاوان اوړي ځکه دوی په پرامنه مظاهره کې د دروازې پرانستو غوښتنه کوي.
يو قبايلي مشر حاجي زړور وويل، د تورخم بندېدو له امله خلکو ته سخت تکليف دی، داسې خلک ايسار شوي چې مړي او بيماران ورسره پراته دي.
وي او اې ډيوه ته یې وویل، "مهرباني وکړه د تجارانو مېوې او سبزيانې خرابې وشوې د خلکو د کروړونو روپو تاوان وشو بارډر ازاد کړه د افغانستان نه هم غوښتنه کوو".
د ټرانسپورټ مشر حاجي عظيم الله وويل، "د تورخم بندېدو د لارې مو ټرانسپورټ ته سخت تاوان اوړي او که پوله خلاصه نه شوه بيا به مجبوره يو چې ټول روډونه به بندوو".
او د پاکستان پيپلز ګوند د خېبر ضلعې جنرل سيکرټري شاه رحمان وويل، "د احتجاجي غونډې د لارې په علاقه کې امن غواړو، د پاکستان او افغانستان دواړو نه غواړو چې په خپل مينځ کې کښېنئ او د دې علاقې د امن او سوکالۍ دپاره يو طريقه کار جوړ کړئ".
وي او اې ډيوه سره په خبرو کې هغه وويل، "د تيرو اتو ورځو نه بارډر بند دی او د دې سره د لکونو خلکو روزګار تړل شوی دی د لکونو خلکو کورنۍ دې روزګار ته ناستې وې او مسلې یې زياتې شوي دي".
هغه زياته کړه، "د بارډر په حواله دې هیڅ قسمه داسې فېصله ونه شي چې د لکونو په شمېره کې خلک ترې متاثره شي ځکه په دواړو رياستونو کې بيا دا ګنجايش نشته چې دې لکونو خلکو ته روزګار ورکړي".
د تورخم دروازې په حواله د پاکستان او افغانستان کې واکمنو طالبانو کوم تازه بيان مخې ته نه دی راغلی.
خو په پوله د نښتې وروسته په نهم ستمبر د طالبانو د بهرنیو چارو وزارت په یوه اعلامیه کې ویلي وو، د طالبانو حکومت د پاکستان له لوري خپلې غاړې ته د تورخم دروازې تړل او په افغان امنیتي ځواکونو ډزې کول "د ښه ګاونډیتوب خلاف اقدام بولي".
او په 11م ستمبر د پاکستان د بهرنيو چارو وزات د طالبانو د بيان په ځواب کې ويلي وو، د افغانستان عبوري حکومت ته هېڅ کله اجازت نه شي ورکولی چې د پاکستان په خاوره څه تعمیرات وکړي او په شپږم ستمبر رامنځته شوې سرحدي شخړه په پرامنه ډول د هوارولو په ځای طالب ځواکونو "بې دریغه ډزو ته لاس کړو".
په تورخم د شپږم ستمبر د پېښې په حواله طالبانو دعوه کړې وه خپل [افغانستان] لوري ته یې په پوله پوسته ترميم کوله او پاکستاني ځواکونو پرې ډزې کړې وې.
او پاکستان بيا ویلي وو، په شپږم ستمبر په پوله د پرامنه حل په ځای افغان ځواکونو په پاکستاني ځواکونو ناتاره ډزې پېل کړې وې.
Forum