پنځه امریکایان له ایران سره د بندیانو په تبادله کې له زندانه خوشې شوي

واشنګټن – نوي راپورونه وايي، د امریکا او تهران ترمنځ د بندیانو د تبادلې په معامله کې پنځه امریکایان له ایران څخه وتلي دي.

خبري رسنیو د چارواکو له خولې ویلي، دغه امریکایان د ګل یا دوشنبې په ورځ قطر ته روان شوي او د ایران شپږ بیلینه کنګل شوې پیسې هم ازادې کړای شوي دي.

په ورته وخت کې د دغه تړون له مخې به په امریکا کې هم پنځه بندي ایرانیان خوشې کېږي.

تر اوسه پورې د امریکایي چارواکو لخوا دا خبر نه دی تایید شوی.

د ایران د بهرنیو چارو د وزارت ویاند ناصر کناني تر دې مخکې د یوې خبري غونډې پر وخت ویلي، چې ایران تمه لري دغه ازادې شوې پیسې چې د امریکا په بندیزونو کې کنګل شوې وې د جنوبي کوریا له اکاونټونو څخه د قطر اکاونټونو ته ولېږدول شي.

هغه ویلي، دغه پیسې به یواځې په بشري برخو کې لګول کېږي.

د سپینې ماڼۍ د ملي امنیت د شورا ویاند جان کربي امریکا غږ ته تېره اونۍ ویلي و چې د بایډن ادارې د دغې معاملې هیله درلوده.

د امریکا حکومت ویلي و چې د پنځو امریکایانو معامله به چې بې له کوم دلیل څخه په ایران کې بندیان شوي په راتلونکو ورځو کې ترسره شي.‌

په ایران کې د بندي شویو امریکایانو له ډلې څخه د دریو نومونه څرګند شوي چې سیامک نمازي، عماد شرجي او مراد تاباز نومېږي.

دوی درې واړه او دوه نور امریکایان چې نومونه یې نه دې په ډاګه شوي د تهران د ایون له زندان څخه وېستل شوي او په کور کې نظربند شوي او یوه بله امریکایۍ مېرمن خو لا له مخکې څخه په کور کې نظربنده وه.

د دغه تړون له مخې ایران هم غواړي پنځه بندي شوي ایراني‌ اتباع خوشې کړای شي.

په ملګروملتونو کې د ایران استازي امریکا غږ ته تایید کړې ده چې د ایرانیانو په نوملړ کې کاوه لطف الله افراسیابي، مهرداد انصاري، امین حسن زاده، رضا سرهنګ پور کفراني او کامبیز اتار کاشاني دي.

د بایډن ادارې هغه نیوکې رد کړي چې ایران به دغه پیسې د نورو موخو لپاره وکاروي.

امریکايي چارواکو ویلي، په دې به څارنه کېږي چې له دغو پیسو څخه یواځې د منل شویو برخو لپاره وویستل شي.

د دې راپور ځینې برخې د اسوسېټېډ پریس، فرانس پریس او رویټرز څخه اخېستل شوي.