جسټن ټروډو: د کېنېډایي شهري په وژنه کې د هندوستان حکومت د ممکنه لاس لرلو پلټنې کوو

د کېنېډا وزیراعظم جسټن ټروډو د ګل/دوشنبې په ورځ وویل، حکومت یې پلټنې پیل کړي چې معلومه کړي په هغه ملک کې د یو کېنېډایي شهري په وژنه کې د هندوستان حکومت لاس و او که نه.

د کېنېډا د سېکهانو برادرۍ یو مشر هردیپ سېنګ نېجار، چې د سېکهانو دپاره د خالستان په نوم له هندوستان نه د یو جدا ریاست قوي ملاتړی او فعاله و، د جون میاشتې په اتلسمه (۱۸) نېټه د کېنېډا د برېټش کولمبیا صوبې په سورې ښار کې د سېکهانو په ثقافتي مرکز کې په ډزو وویشتل شو او ووژل شو.

ښاغلي ټروډو د کېنېډا په پارلېمان کې وویل چې د دوی استخباراتي ادارې د دې الزاماتو په اړه پلټنې کوي چې ګني په دې وژنه کې د هندوستان حکومت لاس درلودلو.

وزیراعظم جسټن ټروډو وویل، هغه چې تېره هفته د جي-۲۰ یا شلو اقتصادي طاقتونو د ډلې غونډه کې د ګډون دپاره هند ته تللی و، د یادې قضیې خبره یې د وزیراعظم مودي سره شریکه کړه او مودي ته یې ویلي چې په پلټنو کې دې ورسره مرسته وکړي او که چرته په دې وژنه کې د هند لاس وي، نو دا به غیرقابل برداشت وي.

اېسوشیټډ پرس خبري ادارې د کېنېډا په پایتخت اوټاوا کې د هند سفارت سره په دې اړه د معلوماتو دپاره د رابطې کولو کوششونه وکړله، مګر سمدستي ورته څه جواب ندی مېلاو شوی.

وزیراعظم ټروډو پارلېمان ته وویل: "په تېرو څو هفتو کې، د کېنېډا امنیتي ادارو په فعاله توګه د هغو قابل اعتماد الزاماتو پلټنې کوي چې ګني د هند د حکومت اېجنټانو او د یو کېنېډایي شهري، هردیپ سېنګ د وژل کېدو ترمنځ یوه احتمالي اړیکه موجوده ده."

جسټن ټروډو دا هم وویل چې خپله ژوره فکرمندي یې د هند حکومت ته څرګنده کړې ده. هغه زیاته کړه: "تېره هفته په جي-۲۰ کې، ما ذاتآ او نېغ په نېغه په واضحه الفاظو وزیراعظم مودي ته دا [فکرمندۍ] څرګندې کړلې. د کېنېډا په خاوره کې د یو کېنېډایي شهري په وژنه کې د یو خارجي حکومت هر ډول مداخلت، زمونږ د خودمختارۍ یوه غیرقابل برداشت خلاف ورزي به وي."

ټروډو دا هم وویل چې حکومت یې په دې قضیه کې د کېنېډا د اتحادیانو سره په هماهنګۍ سره د نږدې کار کوي.

نوموړي په ټینګار سره وویل: "زه په ممکنه قوي الفاظو بیا هم د هند د حکومت نه کېنېډا سره د همکارۍ غوښتنه کوم چې د دې مسئلې رېښې/جرړې راوسپړو."

جسټن ټروډو زیاته کړه، هغه خبر دی چې کېنېډا کې د هندي برادرۍ ځیني غړي په غوسه او یا وېره کې دي، خو دوی باید سکون اختیار کړي.

د کېنېډا د حکومت د حزب اختلاف مشر پيئر پویلیور ویول چې که په هند باندې الزامات ثابت شي، نو دا به "زمونږ خودمختارۍ ته یو اشتعال انګېزه توهین وي."

د خالستان تحریک په هند کې کالعدم ګرځول شوی، ځکه هندي چارواکي دا تحریک او ملاتړې ډلې یې خپلې قامي سلامتیا ته یوه خطره ګڼي. مګر دا تحریک اوس هم د هندوستان په شمالي علاقو او د هغه نه بهر علاقو او ملکونو، لکه کېنېډا او برطانیه کې، چرته چې زیات شمېر سېکهان اوسیږي، ځان ته ځیني ملاتړي لري.