پاکستاني رسنۍ وایي د ډالر په مقابله کې پاکستاني روپۍ یو ځل بیا خپل بایللی ارزښت ورو په ورو ترلاسه کوي اؤ په روانه میاشت کې د پاکستاني روپۍ مقابله کې یو امریکایي ډالر لږ تر لږه 20 روپۍ ارزانه شوی دی.
نن د چهارشنبې- شورو په ورځ د بېنکونو دننه د ډالر نرخ نور یوه روپۍ اؤ پینځه پیسې غورځېدلی اؤ 288 روپو اؤ 75 پیسو ته راښکته شوی دی.
تر دې یوه ورځ وړاندې په بېنکونو کې یو ډالر په 289 روپو اؤ 80 پیسو پلورل شوی ؤ.
په خلاص مارکیټ کې هم د ډالر نرخ پرله پسې په ښکته روان دی اؤ نن د چهارشنبې- شورو په ورځ دې کې د یوې روپۍ کمي سره یو ډالر 290 روپو ته راغورځېدلی دی.
په دې وروستیو کې د پاکستان دننه په بېنکونو کې د ډالر نرخ 308 روپو ته پورته شوی ؤ اؤ په خلاص مارکیټ کې بیا په 332 روپۍ هم ډالر پلورل شوی ؤ.
د پاکستان حکومت د روانې میاشتې نه د ډالرو د ذخیره کوونکو، قاچاقبرانو اؤ په ناقانونه ډول د پیسو د کاروبار کوونکو پرضد سخت عملیات پېل کړي چې د هغې په نتیجه کې د ډالر نرخ پرله پسې ډول په غورځېدو روان شوی دی.
پاکستان کې د پیسو بدلوونکو د سازمان مشر ملک بوستان تېره اوونۍ دي نیوز ورځپاڼې ته ویلي وؤ که حکومت د ډالرو د ذخیره کوونکو اؤ قاچاقبرانو پرضد عملیات دوامداره وساتل نو د ډالر نرخ د 250 روپو نه هم په ښکته تللی شي.
ملک بوستان هیله ښودلې وه چې د حکومت له لوري د ډالرو د ذخیره کوونکو، قاچاقبرانو اؤ غیرقانوني کاروباریانو پرضد د عملیاتو نه وروسته به د هیواد په ترسیلات زر کې د 10 نه نیولې تر20 فیصدو زیاتوالی راشي.
د هغه په وینا، د ډالرو د ذخیره کوونکو اؤ قاچاقبرانو پرضد له عملیاتو وړاندې به د پیسو د تبادلې کمپنیانو ته هره ورځ پینځه ملینه ډالر ورکړی کېدل خو وایي اوس هغوي ته 15 میلینه ډالر ورکړل کیږي چې دا په ورکړل کیدونکو ډالرو کې 200 فیصدي اضافه ښیي.
هغه وایي د پیسو د تبادلې کمپنیو ته د زیاتو ډالرو ترلاسه کېدو له امله د انټربینک اؤ خلاص مارکیټ په نرخونو کې واضحه کمی رامنځته شوی دی اؤ د ډالر نرخ په ښکته تللی دی.
Forum