ږوب: د ټي ټي پي د وسله والو او پوځ‌ ترمنځ نښته کې څلور پوځيان او درې ترهګر وژل شوي دي

د پاکستان پوځ ادعا کړې چې له افغانستان نه پاکستان ته د ټي ټي پي د ترهګرو د را اوښتو په مهال د وسله والو اؤ امنیتي ځواکونو ترمنځ نښته شوې ده چې پکې څلور پوځيان اؤ درې ترهګر وژل شوي دي.

پوځ دا ادعا هم کړې، چې د افغانستان له خاورې نه یې پاکستان کې د ټي ټي پي د مداخلې هڅه ناکامه کړې ده.

د پوځ د ویاندې ادارې آی ایس پي ار د بیان له مخې دا پېښه د زیارت یا پنجشنبې په ورځ د بلوچستان ایالت په ږوب سیمه کې د افغانستان اؤ پاکستان د ګډې پولې تر څنګ رامنځ ته شوې ده.

پوځ ویلي د ټي ټي پي ترهګر د افغانستان نه پاکستان ته راروان وؤ‌ چې د سمبازه سیمې ترڅنګ امنیتي ځواکونو د هغوي مخه نیولې ده.

د پوځ‌ په وینا په دغه مهال د دواړو خواو تر منځ شوې نښته کې درې ترهګر وژل شوي اؤ څو نور ژوبل شوي هم دي.

پوځ نښته کې د څلورو پوځیانو وژنه هم تایید کړې ده چې پېژندګلو یې د حوالدار ستار، لانس نایک شیر اعظم، لانس نایک عدنان اور سپاهي ندیم په نومونو سره شوې ده.

ترهګرې ډلې ټي ټي پي لا د دې نښتې په اړوند څه نه دي ویلي.

په دې وروستیو کې دپاکستان په خېبر پښتونخوا اؤ بلوچستان صوبو کې ترهګریز بریدونه یو وارې بیا چټک شوي چې دې بریدونو کې د زیاترو ذمه واري تحریک طالبان پاکستان اؤ ترهګره ډله داعش په غاړه اخلي.

نن د جمعې‌ په ورځ هم د بلوچستان په مستونګ سیمه کې د میلاد النبي په مناسبت راجوړ شوي یو جلوس کې چاودنه شوې چې د چارواکو په وینا د یو پولیس افسر په ګډون پکې ۵۲ کسان وژل شوي اؤ په لسګونو نور ژوبل شوي دي.

ټي ټي پي د مستونګ د ننۍ چاودنې پړه نه ده منلې.

په 14 ستمبر هم مستونګ سيمه کې د مذهبي سياسي ګوند جمعيت علماء اسلام ف د يو مشر حافط حمدالله په ګاډي شوې چاودنه شوې چې پکې د حافظ حمدالله په ګډون لږ تر لږه 11 کسان ژوبل شوي وو. داعش د دغه چاودنې زمه واري منلې وه.

دا په داسې حال کې ده چې د پاکستان نګران وزيراعظم انوار الحق کاکړ بلوچستان ته د خپل لمړي سرکاري سفر پر مهال په کوټه کې له لوړ پوړو چارواکو سره ناسته کې ویلي وو چې په بلوچستان کې د ناامنۍ حالات قابو کول به یې لمړی هدف وي.

پاکستان کې د یوې غیر دولتي څېړنیزې ادارې پاکستان انستيټیوټ فار کنفلکټ اینډ سیکيورټي سټديز د رپوټ ترمخه سږ کال د اګست په میاشت کې په ګرد هیواد کې د ترهګرۍ 99 پیښې رپوټ شوې وې چې دا د 2014م نه راپدېخوا په یوه میاشت کې تر تولو زیاتې پېښې مخې ته راغلې وې.

په رپوټ کې ويل شوي، د اګست په میاشت کې د ترهګرۍ پېښو کې په ګرد هیواد کې 112 تنه وژل شوي او د جولايۍ میاشتې په مقابله کې په اګست کې ترهګري 93 فیصدي زیاته شوې وه.

د رپوټ ترمخه بلوچستان او د خېبر پښتونخوا قبایلي ضلعې د اګست په میاشت کې د ترهګرۍ نه تر ټولو زیاتې اغېزمنې شوې او بلوچستان صوبه کې له دغې نه د وړاندينۍ میاشتې په مقابله کې ترهګري 65 فیصده او د پښتونخوا قبایلي ضلعو کې 106 فیصده زیاته شوې وه.