اېسوسي اېټډ پرېس خبري اداره وايي د حماس وسله والې ډلې لخوا غزه ته تښتول شوې خلکو کې شامل یوه امریکايي مېرمن او د هغې لور نن د جمعې په ورځ خوشي شوي.
اسرایلي چارواکو ویلي د اکتوبر په ۷مه نېټه په اسرایل د حماس وسلو والو لخوا د برید په مهال تښتول شوو ۲۰۰ کسانو کې دا لومړي څوک دي چې حماس ډلې ازاد کړي.
د اسرایل پوځ یو ویاند ویلي چې جوډي رانان او د هغې ۱۷ کلنه لور نتالیا نن د غزه پټۍ نه راوتلي او د اسرایل د پوځ سره دي. حماس وسله والې ډلې بیا ویلي دغه دواړه یې د قطر حکومت سره د یوې لوظنامې وروسته د انساني همدردۍ په بنیاد پرېښودي.
دغه مور او لور په داسې وخت راخوشی شوي چې په غزه د اسرایل لخوا زمکني برید اندېښنې سېوا شوي. اسرایل وايي په دغه عملیاتو کې به په غزه واکمنه حماس وسله واله ډله د منځه وړي او زیاتوي د غزه د اوږدې مودې لپاره د نیولو کوم پلان نه لري. د غزه سیمې ابادي ۲.۳ میلینه یا ۲۳ لکه ده.
د جوډي او نتالیا کورنۍ ویلي، مور او لور د شکاګو په یوه کلیواله سیمه کې اوسیږي او د یهودیانو رخصتۍ لمانځلو لپاره اسرایل ته تللې وې.
دوي د اکتوبر په ۷مه نېټه د غزه سره نژدې د اسراېل په یو کلیواله سیمه کیبوټز کې وو، چې کله د حماس وسله والو په دغه سیمه برید وکړو. د حماس په دغه برید کې په سلګونو اسرایلیان وژل شوي او نژدې ۲۰۳ اسرایلیان یې غزه ته تښتولي.
د نتالیا ورور ویلي چې د حماس د برید وروسته یې د خپلې مور او خور سره هیڅ رابطه نه ده شوې او وروسته بیا امریکايي او اسرایلي چارواکو دوي خبر کړي چې دغه دواړه غزه ته تښتول شوي.
د حماس وسله والو لخوا تښتول شوو نورو کسانو خپلو خپلوانو د جوډي او نتالیا د راخوشي کیدو هرکلی کړی او خپلو بندي کسانو د راخوشي کولو خواست یې کړې.
د دغه ځلکو لخوا خپور شوي یو بیان کې ویل شوي ٫٫٫ مونږ د نړۍ په مشرانو او نړیواله ټولنه غږ کوو چې خپل پوره طاقت وکاروي او زمونږ د خپلو خپلوانو د راخوشي کولو لپاره دې عملي ګامونه پورته کړي.٬٬
د اکتوبر په ۷مه نېټه د حماس وسله والو لخوا په اسرایل ناڅافي برید کې د ۱۴۰۰ نه زیات اسرایلیان وژل شوي. په وژل شوو کې زیاتره ملکي وګړي یا عام خلک وو، دغه برید د اسرایل د امنیت احساس له منځه وړی.
د دغه برید په ځواب کې اسرایل په غزه درنه بمباري کړې او په غزه کې د حماس د انتظام لاندې چلیدونکي د صحت وزارت ویلي، د اسرایل په بمبارۍ کې ۴۱۰۰ کسان وژل شوي. په دې کې روانه اونۍ په هسپتال کې وژل شوو خلکو لانجمنه شمېره هم شامله ده.
Forum