د امریکا د خارجه وزارت یو جګپوړي چارواکي ویلي چې امریکا به په دې هفته کې د نېټو د نورو غړو هېوادونو سره په شریکه، د اوکراین دپاره د روس سره د جنګ په برخه کې خپله د ملاتړ «کلکه ژمنه» بیاهم تازه کړي.
په همدې لړ کې د ګل/دوشنبې په ورځ [د نوامبر ۲۷مه] د امریکې خارجه وزیر انټني بلېنکن د بلجیم پایتخت براسلز ته روان شو. په براسلز کې د نوامبر له ۲۷ تر ۲۹ نېټې پورې د نېټو د خارجه وزیرانو غونډه ده.
د نېټو سرمشریزې آینده ناسته به د امریکې په کوربتوب، په واشنګټن کې د ۲۰۲۴ کال د جولای د ۹ نه تر ۱۱ مې نېټې ترسره شي.
بلېنکن به په روانه دوره کې د خپلو هم منصبانو سره د واشنګټن په کوربتوب د نېټو د آینده غونډې په لومړیتوبونو خبرې وکړي. آینده کال به د نېټو غړي هېوادونه د دې دفاعي تنظیم د جوړېدو ۷۵ یمه کلیزه هم ولمانځي.
د شورو/چهارشنبې په ورځ به ښاغلي بلېنکن د امریکایي پلاوي په مشرۍ شمالي مقدونیې ته هم ولاړ شي. شمالي مقدونیه هم د نېټو غړی هېواد دی او هلته به د دې هفتې په آخره کې، د او اس سي اي (یورپ کې د امنیت او همکارۍ تنظیم) د ممبرانو خارجه وزیران غونډه ولري.
د او اس سي اي په غونډه کې د روس خارجه وزیر سرګي لاوروف هم بلل شوی دی، او هغه ویلي که چېرته بلغاریه د هغه جهاز ته خپل فضایي حدود پرانېستل، نو په هغې ناستې کې د ګډون دپاره به شمالي مقدونیه ته ولاړ شي.
په اوکراین باندې د روس د پوځي یرغل وروستو، اکثره یورپي ملکونو د روس د جهازونو په وړاندې خپل فضایي حدود وتړل.
د اوکراین په اړه د نېټو د خارجه وزیرانو بحث
ټاکل شوې ده چې د امریکا خارجه وزیر د نېټو-اوکراین کونسل په لومړنۍ د خارجه وزیرانو د کچې په غونډه کې برخه واخلي.
اوکراین کوښښ کوي چې د نېټو تنظیم غړیتوب ترلاسه کړي.د امریکا د خارجه وزارت د یورپي او یورېشیا د چارو مرستیال جېم اوبراین وایي، "[د نېټو-اوکراین] کونسل له نېټو سره د اوکراین د نږدې شراکت ملاتړ کوي. تر هغو پورې چې روس خپل د یرغل جګړه نه وي ختمه کړې، اتحادیان به د اوکراین ملاتړ جاري وساتي چې خپله دفاع وکړي."
د نېټو-اوکراین کونسل د جولای په ۱۲مه نېټه، د نېټو په اجلاس کې پرانېستل شو، چې د اوکراین صدر ولوډیمیر زېلنسکي او نورو حکومتي مشرانو هم هغې ناستې کې موجود و.
د نېټو د خارجه وزیرانو د دې هفتې په غونډه کې د نېټو د خارجه وزیرانو یوه ناسته په دې ده چې په مغربي بالکان کې په امن او ډېموکراسۍ بحث وکړي.
Forum