د طالبانو د حکومت د بهرنیو چارو وزارت مرستیال شېر محمد عباس ستانیکزي یو ځل بیا په افغانستان کې تر شپږم ټولګي پورته د نجونو پر تعلیم د خپل حکومت په بندیز باندې کلکې نیوکې کړې او وایي د دې ستونځې له کبله ولس له طالبانو لرې کېږي.
عباس ستانیکزي د دسمبرپه اوومه په کابل کې له تعلیمي ادارو د فارغه شویو زده کوونکو د فراغت غونډې ته په وینا کې ویلي چې که څوک له نجونو د تعلیم حق اخلي دا د هغوی پر حق تېرې او ښکاره ظلم دی:
"نن زموږ یواځینی مشکل چې له خپل ملک سره، له ګاونډیو سره او د دنیا له ملکونو سره حل [نه] دی په همدې مشکل باندې، نن چې زمونږ ملک له مونږه فاصله ساتي او راڅخه خفه کیږي یا له موږه ګیله لري هغه هم دغه د علم په موضوع باندې".
د طالبانو د حکومت د بهرنیو چارو وزارت مرستیال وویل نجونو ته د تعلیم حق خدای او رسول ورکړی او زدکړې د هغوی طبیعي حق دی، وایي هر څوک چې دا حق ترې اخلي دا د هغوی پر حق باندې تېری او ظلم دی:
"په هر ملک کې چې د علم دروازې تړلې وي هغه تاریک دی، په فقر به مبتلا وي، اشغالېږي به او د نورو قومونو تر تاثر لاندې به وي، وږی به وي او نورو ته به یې د احتیاج لاس نیولی وي".
عباس ستانیکزي په خپلو څرګندونو کې دا ونه ویل چې چا له نجونو د تعلیم حق اخیستی دی، خو د نجونو له زدکړو سره مخالفت یې د ځینو کسانو شخصي خواهشات وبلل. وایي له تعلیم سره مخالفت ددې هیواد له بچیانو سره لویه جفا ده:
"د امارت په چارواکو او مسئولینو باندې مې همدا غږ دی د ورورګلوۍ او انډيوالۍ، چې د علم دروازې دې زموږ د ملک د ځوان نسل د بچیانو په مخ باندې خلاصې کړي".
عباس ستانکزي وویل چې که څوک د نجونو له تعلیم سره د مخالفت په برخه کې دلایل لري باید چې څرګند یې کړي.
د طالبانو حکومت د 2021م کال د اګست په میاشت کې په افغانستان کې واک ته د بیا رسیدلو وروسته تر شپږم ټولګي پورته په ښوونځیو کې د نجونو تعلیم ته اجازه نه ده ورکړې او د 2022م کال له دسمبر میاشتې یې په پوهنتونونو کې هم د نجونو پر تعلیم بندیز لګولی دی.
دا لومړی ځل نه دی چې عباس ستانییزی د نجونو د سکولونو د بندولو له کبله پر خپل حکومت باندې نیوکې کوي، مخکې یې هم څو ځله ورته تنقیدونه کړي وو خو تر اوسه د هغه دغو اعتراضونو او د نړیوالو غوښتنو د طالبانو حکومت نه دی مجبور کړی چې د نجونو اعلی تعلیم ته بیرته جازه ورکړي.
طالبانو د حکومت چارواکو بیا بیا ویلي د نجونو په زدکړو لګېدلي بندیزونه دایمي نه دي او د اسلامي شریعت په چوکاټ کې به د نجونو د تعلیم لپاره پلان جوړوي خو نه ده معلومه چې په میلینونو له تعلیمه محرومه افغانې نجونې به کله بیرته تعلیم پیل کړي.
Forum