بلوچستان هايکورټ د بلوڅ ځوان د وژنې په تړاو د سي ټي ډي پولیس څلور اهلکار معطل کړي

د پاکستان د بلوچستان صوبې ستر عدالت (هايکورټ) د بلوڅ ځوان بالاچ مولا بخش د وژنې په تړاو د سي ټي ډي پوليسو څلور اهلکار معطل کړي دي.

په نهم دسمبر د پاکستان په کړکیچ ځپلې صوبه بلوچستان کې د پولیسو په ولکه کې د وژل شوي بلوڅ ځوان بالاچ مولا بخش د وژنې مقدمه د ترهګرۍ ضد محکمې د پولیس افسرانو پرضد درج کړل شوې او د بلوچستان حکومت د پېښې د پلټنو لپاره د حقیقت موندنې کمیټي هم جوړه کړې وه.

د ډان ورځپاڼې ترمخه، د سي ټي ډي د ایس ایچ او درو نورو مامورینو پرضد دا مقدمه د تربت د ضلعي جج په امر د بالاچ بلوڅ د پلار مولا بخش په مدعیت کې د تربت په سټي پولیس تاڼه کې درج کړل شوې وه.

د سرکاري خبر ترمخه د بلوچستان هايکورټ چيف جسټس نعيم اختر افغان او جسټس نذير احمد لانګو دوه کسيزه بنچ د وژل شوي بالاچ د پلار مولابخش په خواست پرون د ګل/ دوشنبې په ورځ اورېدنه کړې ده

په عدالتي حکم کې د سي ټي ډي اهلکارو معطل کولو او د مکران څخه د کوېټې پوليس کرايم برانچ ته منتقل کولو ويل شوي دي.

عدالت د پېښې د منصفانه پلټنو دپاره د لوړ پوړو پولیس افسرانو د کمېټۍ جوړولو حکم کړی دی.

د بلوچستان صوبې سي ټي ډي د نومبر د 22مې او 23مې ترمنځ شپه کې د څلورو کسانو د وژلو دعوه کړې، په وژل شوو کسانو کې بالاچ بلوڅ هم وو، د هغه کورنۍ تور لګولی بلوڅ د اکتوبر په وروستيو کې د کوره پورته کړی شوی په په 20م نومبر بيا د هغه ګرفتاري ښکاره کړی شوې، مقدمه پرې درج شوې په 21م نومبر عدالت ته وړاندې کړی شوی او عدالت د سي ټي ډي پوليسو ته د لسو ورځو په ريمانډ ورکړی وو.

د بالاچ بلوڅ د وژنې وروسته د هغه کورنۍ، مدني فعالو او سياست والو احتجاجي پرلت پېل کړی او د هغه د عدالت نه لرې وژنې د مقدمې غوښتنه یې کوله چې د سي ټي ډي چارواکو ضد دې مقدمه درج کړی شي.

د پاکستان د کورنيو چارو نګران وزير سرفراز بګټي بلوچستان صوبه کې د عدالت لخوا د سي ټي ډي پوليس افسرانو پرضد مقدمې درج کېدو ته د "فکر لمحه" ویلي او زیاته کړې یې ده، "مونږ ته به سوچ کول وي که دا جګړه مونږ د رياست په حېث کوو نو مونږ ټولو ته به دا جګړه کول وي دا نه شي کېدی چې د سي ټي ډي په افسرانو مقدمه درج کړی شي".

سرفراز بګټي پرون د ګل/ دوشنبې په ورځ اسلام اباد کې يوې دستورې ته په وينا کې وويل، "بلوچستان کې پرون د سي ټي ډي يو ځوان زړوره افسر ووژل شو، څه موده وړاندې ترهګرو د هغه يو بل ملګری وژلی وو، یو اړخ ته هغوی د ترهګرۍ د چېلنج سره مخ دي او بل اړخ ته هلته زمونږ عدليه امر کوي چې په هغو دې مقدمه درج کړی شي، دا د فکر خبره ده، مونږ له به سوچ کول وي چې مونږ څنګه دا جګړه کوو، مونږ ته به سوچ کول وي که دا جګړه مونږ ته د رياست په حېث کول وي نو مونږ ټولو ته به دا جګړه کول وي دا نه شي کېدی چې د سي ټي ډي په افسرانو مقدمه درج کړی شي".

بګټي دا هم ويلي وو، "د پاکستان څخه به د ترهګرۍ ناسور ختمولی شي، د ترهګرۍ ضد تسلسل نشته، ګټل شوې جګړه بيا کولی شي، پاکستان ته به د چېلنجونو څخه ويستلو دپاره خپل ذهن پاکول وي چې د تشدد حق يواځې ریاست کارولی شي، که چا په هر نوم تشدد لاره خپله کړې ده هغه به لاس به پرېکول وي".