واشنګټن – د اوکراین پوځ د زیارت یا پنجشنبې په ورځ وویل، چې روسي ځواکونو تېره شپه په ۳۵ ډرنونونو باندې په ګڼو سیمو باندې بریدونه کړي.
د اوکراین هوايي ځواک ویلي، ددغه هېواد هوايي دفاعي سیستمونو له یوه پرته نور ټول ډرونونه غورځولي دي.
دوی ویلي، چې د روسانو دغه ډرونونه په کیېف، دېنېپروپیتروسک، خرسان، مېکایلېو، چرنیېف او نورو سیمو باندې ګرځېدل.
تر اوسه پورې له دغو پېښو سره په تړاو د کومې مرګ ژوبلې راپور نه دی ورکړل شوی.
خو د دینېپروپېتروسک سیمې په یو جنوبي ښار نېکوپول کې چارواکي وايي، د روسانو په راکټي بریدونو کې دوه کسان وژل شوي دي.
د سیمې والي سرهېو لېسک په ټولنیزو رسنیو ویلي، چې یو بل ۸۶ کلن سړی روغتون ته رسول شوی دی.
لېسک وايي، د روسانو په توغندیزو بریدونو کې ګڼ کورونه او د فارمونو ودانۍ ویجاړې شوې دي.
د دې راپور ځینې برخې د فرانس پریس او رویټرز خبري رسنیو څخه اخېستل شوې دي.
Forum