په امنیت شورا کې نن په سره سمندر کې د حوثي یاغیانو د بریدونو د مخنیوي په قرارداد ووټ کېږي

د ملګرو ملتونو په امنیت شورا کې نن د جنورۍ پر لسمه د امریکې له خوا په هغه وړاندې شوي قرارداد باندې رایې اچول کېږي چې پکې په یمن کې د مېشتو حوثي یاغیانو له خوا په سره سمندر کې پر بېړیو بریدونه غندل شوي دي.

دا قرارداد د حوثي یاغیانو د هغو اقداماتو په غبرګون کې وړاندې شوې چې د میزایلو، ډرون الوتکو او وسلوالو کښتیو په وسیله یې پر سمندري بېړیو بریدونه کوي‌ او د عرب او روم سمندرو تر منځ د اوبو په بنیادي لاره کې سمندري سفر ته خنډ پېښوي.

د قرارداد مسوده د بریدونو د سمدستي درېدولو غوښتنه کوي او پکې ویل شوي چې دا بریدونه نه یواځې د سمندر له لارې د نړیوال تجارت مخه نیسي بلکې "د سمندري بېړۍ چلولو حقونو، ازادۍ او د سیمې امن او سلامتیا ته زیان رسوي."

د حوثي یاغیانو تر بریدونو وروسته د بېړیو ډېرو باروړونکو کمپنیو په سره سمندر باندې د خپلو بېړیو له ورتلو ډډه کړې او خپلې لارې یې بدلې کړې دي، د دې پر ځای یې د افریقې د «کېپ آف ګوډ هوپ» شاوخوا اوږده لاره غوره کړې ده.

د ایران له ملاتړه ګټه اخیستونکو حوثي یاغیانو ویلي، د بریدونو مقصد یې د هغو بېړیو په نخښه کول دي چې له اسرایل سره تړاو لري، وایي دا کار یې په غزه پټۍ کې له فلسطینیانو سره د پیوستون لپاره کړی دی.

د امریکې پوځ د سه شنبې- نهې په ورځ ناوخته په رپوټ کې ویلي، د سره سمندر په جنوب کې نوي بریدونه شوي، وایي 18 ډرون او درې کیښتۍ ضد میزایل هغې سیمې ته ور ویشتل شوي چې په درځنونو بېړۍ پکې فعاله وې.

د امریکې مرکزي کمانډ وایي، امریکایي او برتانوي ځواکونو ټول ډرون او میزایل ویشتلي دي او په بریدونو کې چاته هیڅ رنګه د سر زیان نه دی رسېدلی او نه پکې نور زیان اوښتی دی.

د سېنټکام په بیان کې ویل شوي دي چې د نومبر له 19مې راهیسې دا وروستی برید 26م برید دی چې حوثي یاغیانو په څه باندې یوه نیمه میاشت کې تر اوسه پورې کړي دي.

امریکې او 12 نورو ملکونو د دسمبر په 19مه په جنوبي سره سمندر کې پر تجارتي بېړیو د حوثي یاغیانو د بریدونو د مخنیوي لپاره د یو ګډ ځواک جوړېدو اعلان کړی وو.

دې ګډ ځواک حوثي یاغیانو ته خبرداری ورکړی وو، چې که په سره سمندر کې نړیوال اقتصاد، د خلکو ژوند او مهمې سمندري لارې ته د خطر پېښولو له اقداماتو لاس نه واخلي نو د نتیجو به یې خپله ذمه واره وي.

د امریکا د خزانې وزارت د بهرنیو شتمنیو د کنټرول ادارې د دسمبر پر 28مه د یمن حوثي یاغیانو ته له ایرانه د مالي مرستو د ورتلو په تړاو پر یو تن او درو ادارو باندې بندیزونه هم لګولي وو.

یادونه:- د رپوټ ځینې معلومات له اې پي او رویترز خبري ایجنسیو اخیستل شوي دي.