امريکا په سور سمندر کې د هوثيانو د سمندري جهازونو ويشتونکی ميزايل راغوزولی

وي او ای

په يمن کې هوثي وسلوالو د شورو په ورځ ويلي دوی په سور سمندر کې د امريکا په جنګي بېړۍ يو شمېر ميزايل ويشتلي او په پلان کې لري چې دا لړۍ د امريکا او برتانيه د سمندري جهازونو په ضد روانه وساتي.

دا بيان د امريکا د مرکزي کمانډ د هغه بيان نه څو ساعته وروستو راغلی چې پکې ويل شوي يو ايس ايس ګريولي د سمندري جهازونو ضد کروز ميزايل راغورزولی چې د ايران پلوه هوثيانو لخوا د يمن نه ويشتلی شوی و.

سېنټکام ويلي د بريد په نتيجه کې نه څوک خوږ شوي او نه ترې کوم زيان رسېدلی. هوثيانو د نومبر راهسې د ديرشو نه زياتې د ميزايلو او ډرون حملې کړي چې په سور سمندر کې يې د تجارتي جهازونو چلن په لويه کچه ګډ وډ کړی کومه چې د اوبو مهمه لاره ده.

يو شمېر شېپېنګ کمپنيانو په غبرګون کې خپلې اپرېشنې بدل کړي او اوس په لرې او ګران قيمته لارو چلن کوي او د سور سمندر او ميډيټرينين سمندرونو ترمنځ د تګ راتګ د پاره د افريقا نه راتاويږي.

امريکا او برتانيه په يمن کې د هوثيانو د ميزايلو او پوځي مرکزونو خلاف حملې کړي او د هوثيانو د ډرون او ميزايلو د نظام ګډ وډولو هڅې يې روانې دي.

تېره ورځ د پينټاګان پرېس سيکرټري ميجر جنرل پيټ هايډر خبريالانو ته ويلي امريکا په سور سمندر کې د نړيوالې جهازرانۍ او سمندري ځواکونو د حفاظت د پاره عمليات کوي او بل دا چې د هوثيانو د توان کمولو او دا قسمه حملو ودرولو په ضد کار کوي.

يورپين يونين هم په ياد سمندر کې د حفاظت د پاره د خپل مېشن پيل کولو په تکل کې دی او د يونين د بهرنۍ پاليسۍ مشر جوزپ بورېل خبريالانو ته ويلي هيله کوي چې دا ګام به په راتلونکو اونيو کې واخستل شي او دا به د هوثيانو خلاف کوم نېغ په نېغه د عملياتو د پاره نه وي بلکې د هغوی د حملو د مخنيوي د پاره به وي.

بورېل ويلي يو شمېر کمپنيانو ورنه غوښتنه کړې چې د دې خلاف ګامونه پورته کړي ځکه د افريقا نه راتاوېدل ورته ډېر ګران پرېوځي.

په خبر کې څه معلومات د خبري ادارو ای اېف پي او رايټرز نه هم اخستل شوي.