د پاکستان پوځ ویلي، انتخابي عمل کې ۵۱ ترهګرو بريدونو کې زياتره په خېبرپښتونخوا او بلوچستان صوبو کې شوي، د لسو امنيتي اهلکارو په ګډون پکې ټول ۱۲ تنه وژل شوي دي.
پاکستان کې پرون د زيارت/ پنجشنبې په ورځ (اتمه فرورۍ) عام انتخابات ترسره شوي دي.
د پاکستان پوځ په ملک کې په پرامنه ډول انتخاباتو قوم ته اومبارکي ويلې ده.
پوځ ویلي، په ملک کې په انتخابي عمل کې د پوځ او نورو امنیتي ادارو يو لک ۳۷۰۰۰ عسکر په ۶۰۰۰ حساسه پولينګ سټېشنو په ځای کړی شوي او د چټک ځواک (کويک رسپانس فورس) ۷۸۰۰ نه زياتو اهلکارو د رايو اچولو عمل د خلکو دپاره خوندي کړی وو.
پوځ ویلي،"د ترهګرو لخوا په خېبرپښتونخوا او بلوچستان صوبو کې ۵۱ حملې شوي او د امنيت خرابولو هڅه شوې ده خو په ټول ملک کې امنیت ټينګ ساتل شوی دی".
د پوځ ترمخه، "په دغو حملو کې د لسو امنیتي اهلکارو په ګډون ټول ۱۲ کسان وزل شوي او ۳۹ ژوبل شوي دی".
پوځ د پينځو ترهګرو وژلو دعوه کړې ده. پوځ د حملو تفصيل نه دی ویلی چې چرته چرته شوي دي.
خو پرون د خېبرپښتونخوا په ډېره اسماعيل خان او ټانک سيمو کې چاودنه او وسله والو بريدونه شوي وو. او د بلوچستان صوبې په خاران سيمه کې په ليویز ځواک چاودنه شوې وه.
پاکستان کې د انتخاباتو نه وړاندې د انتخابي کمپېن په وخت په ځانګړي ډول بلوچستان او خېبرپښتونخوا صوبو کې د ناامنۍ ګڼې پېښې شوي، انتخابي امېدواران وژل شوي او په انتخابي کمپېنو حملې هم شوې وې.
د امریکې د بهرنیو چارو وزارت ویلي وو، امریکا په پاکستان کې د تشدد په پېښو، په رسنیو د قدغنونو، د انټرنېټ د ازادۍ او د رایې څرګندولو مخې ته په پرتو خنډانو اندېښنه لري او غواړي چې د انتخاباتو په عمل کې باید د رایې څرګندولو بشپړ درناوی وشي.
پاکستان کې پرون د انتخاباتو په مهال موبايل او انټرنېټ په عارضي توګه ځنډول شوي وو، د کورنيو چارو وزارت ويلي د ترهګرۍ د خطرې له امله موبايل فون او انټرنېټ بند کړل شوي وو.
Forum