د لویدیځ مشرانو او په روس کې مخالفو فعالانو په زندان کې د مخالف سیاسي رهبر الېکسي نوالنې د مړینې په اړه سختې نیوکې کړي

واشنګټن- د لویدیځ مشرانو او په روس کې مخالفو فعالانو د جمعې په ورځ بې له ځنډ څخه د مخالف بندي رهبر الېکسي ناولني د مړینې تور په ولسمشر ویلادیمیر پوتین اچولې.

اسوسېټېډ پریس لیکي چې د اوکراین ولسمشر ویلادیمیر زېلینسکي ویلي، "دا ښکاره ده چې هغه د پوتین لخوا وژل شوی."

هغه زیاته کړه، "پوتین یې پروان نه کوي چې څوک مړ کېږي. د هغه لپاره یواځې دا مهمه ده چې خپله څوکۍ وساتي.‌ پوتین باید هر څه بایلي او د خپلو اعمالو لپاره مسول وبلل شي."

د جرمني چانسلر اولاف شالز چې هېواد یې په ۲۰۲۰ کال کې یې د ناولني په زهرو د ککړوالي درملنه کوله د کرملن ددغه ناقد بهادري وستایله او وویل، د هغه مړینې دا ښکاره کړه چې "دا څه ډول رژیم دی."

د امریکا د بهرنیو چارو د وزارت ویاند متیو مېلر په یو خپور کړي بیان کې ویلي، چې

د بهرنیو چارو وزیر انټني بلېنکن په مونیخ امنیتي کانفرانس کې د ناولني له مېرمنې یولیا ناولني سره لیدلي دي.

په بیان کې راغلي، چې بلېنکن له اغلې ناولنۍ غمرازي ښودلې او ویلي یې دي که چېرې د الېکسي ناولني مړینه ريښتیا وي نو روس یې په مړینه کې مسول دی.

ټاکل شوې ده چې د امریکا ولسمشر جو بایډن به نن ماسپښین د نوالنې د مړینې په اړه څرګندونې وکړي.

الېکسي نوالني چې د روس د ولسمشر ویلادیمیر پوتین تر ټولو سرسخت دوښمن ګڼل کېده د ۴۷ کالو په عمر د جمعې په ورځ په زندان کې مړ شوی دی.‌

نوالني د حکومتي‌ فساد پرضد ولاړ وو د کرملن پرضد یې لوی لاریونونه کړي و.

د روس د زندان چارواکو په یو بیان کې ویلي، چې نوالنې د جمعې په ورځ له قدم وهلو وروسته ښه نه و او بې هوښه شو.

دوی وايي، له هغه سره د مرستې لپاره امبولانس ورسېد خو هغه مړ شو.

د نوالنې د ډلې لخوا د هغه د مړینې په اړه تر اوسه څه نه دي ویل شوي.

نوالنې ته د ترهګرۍ د تورونو له امله د ۱۹ کاله بند سزا ورکړل شوې وه او ډیسمبر کې د وېلادیمیرسیمې له زندان څخه د روس یو ځانګړي زندان ته انتقال کړای شوی وو کوم چې لا سخت امنیتي تدابیر لري.

د هغه ملګرو د نوالنې د انتقال په اړه ویلي و چې دا د نوالنې د خاموشه کولو لپاره یوه بله هڅه ده.‌

په خارپ نومي ځای کې دغه نوی زندان په یو داسې ځای کې دی چې هوا پکې ډېره زیاته سړه ده.

نوالنې د ۲۰۲۱ د جنورۍ راهیسې په زندان کې دی. تر دې مخکې نوموړی له جرمني څخه د خپلې درملنې نه ماسکو ته ستون شوی وو.

هغه تور پورې کړی و چې کرملن ورته زهر ورکړي و.

له نیول کېدو مخکې هغه د حکومتي فساد پرضد کمپاین کاوه، د کرملن پرضد یې لویې مظاهرې ترسره کړې او ټاکنو ته ودرېده.

له هغې راوروسته هغه ته د زندان درې سزاګانې اورول شوې دي کومې چې هغه رد کړي‌ او وايي سیاسي انګېزه لري.