د بلوچستان د سرحدي ضلعو کمشنر طارق رحمان بلوڅ وایي، هغه وخت لرې نه دی، چې پاکستان به له پوليو وايرس پاک يا پوليو فري هيواد وګرځول شي. برسېره د ږوب ډويژن پولې له افغانستان او جنوبي وزيرستان سره لګېدلې، خو بيا هم په دې سرحدي ضلعو کې مثبت کېس نه دی رپوټ شوی.
د سرحدي ډويژن ږوب کمشنر طارق رحمان بلوڅ وي او اې ډيوه په ځانګړې مرکه کې وویل، دا سيمه ډېره پراخه ده، چې د پښتونخوا صوبې ډېره اسماعيل خان، ټانک، واڼه او د افغانستان پکتيکا ولایت ته څېرمه ده. دلته د خلکو تګ راتګ هم زيات کېږي، خو د سيمې حکومتي چارواکو د پوليو وايرس د مخنيوي کار سنجیده ګڼلی دی.
"زموږ په ضلعو کې له تېرو کلونو راهيسې د پوليو مثبت کېس نه دی رپوټ شوی. دلته د پوليو وايرس د ختمولو لپاره موږ په ډېره منظمه توګه کار کوو. زموږ په اند دا ډېره مهمه ده، چې تر هر ماشوم پورې د پوليوضد قطرې ورسېږي. ځينو سيمو ته تګ ګران کار دی، خو بيا هم زموږ فرنټ لاين کارکوونکو ځانونه رسولي او ماشومانو ته يې قطرې ورکړې دي".
په بلوچستان کې د پوليوضد کمپېنونه د امنيتي عسکرو په بدرګه تر سره کېږي. په تېره بيا په کليوالو او غرنیو سيمو کې امنيتي عسکر له پوليو کارکوونکو سره اوږه په اوږه کار کوي. ښاغلی بلوڅ زياتوي، د وايرس ختمول د ټولنې د هر فرد ذمه واري یا فرض دی.
"د امنيت په برخه کې پوليس، ليويز او په ځينو سيمو کې سرحدي مليشه يا ايف سي عسکر هم د پوليو ټيمونو امنيت ساتي. دا د ټولو ګډ کار دی، چې د يو ټيم په توګه يې موږ ټول کوو. هغه وخت لرې نه دی، چې موږ پوليو له پاکستانه په بشپړه توګه ختم کړو".
د ږوب ډويژن درې ضلعې ږوب، شېراني او کلاسيف الله حکومت ځکه د پوليو وايرس له پلوه ډېرې مهمې ګڼي، چې دلته د موسمي خلکو يا کډوالو تګ راتګ زيات وي.
Forum