هنګري په نېټو کې د سویډن غړیتوب ته منظوري ورکړه

د هنګري پارلېمان د ګل/دوشنبې په ورځ نېټو کې د سویډن د شاملېدو منصوبې ته د تایيد رایه ورکړه او په دې توګه یې د سویډن اتلس میاشتېنی انتظار ورختم کړ. د سویډن په شاملېدو سره نېټو په داسې حال کې وسعت پیدا کوي چې روس په ختیځه اروپا کې اوکراین باندې حمله کړې او د دې پوځي یرغل دوه کاله یې پوره شول.

تر دې وړاندې تېر کال فېلېنډ د نېټو په پوځي اتحاد کې شامل شوی و، او د سویډن په شاملېدو به د نېټو د غړو هېوادونو شمېر دوه دېرشو (۳۲) ته ورسېږي.

په نېټو کې د شاملېدو شرط دا دی چې د دې اتحاد ټول غړي ملکونه باید په اتفاق سره د نوي ملک شاملېدو ته د منظورۍ رایه ورکړي. د سویډن شاملېدو ته ټولو نېټو ملکونو رایه ورکړې وه، بغیر د هنګري چې دا دومره وخت یې دغه پروسه ځنډولې وه.

د هنګري وزیراعظم وېکټور اوربان، چې یو ښي اړخی قامپرست دی او د روس سره یې نږدې تعلقات جوړ کړي، ویلي و چې د هنګري په جمهوریت باندې د سویډن د سیاستمدارانو تنقید د دواړو ملکونو ترمنځ تعلقات خرابه کړل او د واکمن ګوند د پارلېمان غړي یې خفه کړل.

خو د سویډن وزیراعظم اولف کرېسترسن تېره د جمعې ورځ د هنګري په پایتخت بوداپست کې د اوربان سره وکتل او داسې ښکاره شوه چې د میاشتو میاشتو سفارتکاري تناوونو وروستو، دواړه مشران روغې جوړې ته رسېدلي دي.

د دې ملاقات نه پس، دواړو مشرانو د دفاعي صنعت د یوې لوظنامې اعلان وکړ چې ترمخه یې هنګري د سویډن نه څلور جنګي جهازونه اخلي او ترڅنګ یې د پخوانیو اخستل شوو جهازونو د سروس یا خدماتو تړون به هم غځول کیږي.

د هنګري وزیراعظم ویکټور اوربان وویل: "د بل ملک سره په شریکه نېټو کې غړیتوب په دې معنا دی چې مونږ حاضر یو د یو بل دپاره ومرو (ځان فدا کړو). د دفاعي او پوځي قابلیتونو په برخه کې یوه معامله، دا مرسته کوي چې د دواړو ملکونو ترمنځ اعتماد بېرته بحاله شي."

کرېسټرسن نېټو کې د سویډن شاملېدل، "یوه تاریخي ورځ" وبلله او په اېکس باندې یو پوسټ کې یې وویل: "مونږ حاضر یو چې د نېټو امن ته خپل د ذمه وارۍ برخې ته اوږه ورکړو.

د نېټو عمومي منشي ینس سټولټنبرګ وویل چې "د سویډن ممبرشپ به مونږ لا پیاوړي او لا محفوظه کړي."

د نېټو د منشور لاندې، چې د دویمې عالمي جګړې وروستو جوړ شوی، د دې پوځي اتحاد ټول غړي مجبور دي چې که د دې اتحاد په یو ملک هم حمله وشي، نو ټوله به یې دفاع کوي.

د نېټو د منشور دغه دفعه صرف یو ځل عملي شوې او هغه په ۲۰۰۱ کال کې و چې امریکا باندې د القاعده ډلې لخوا د سپټمبر د یوولسمې نېټې حملې وشوې او بیا امریکا او نېټو اتحادیانو په افغانستان باندې یرغل وکړ.