د روس صدر ولاډیمیر پوټین د شورو/چهارشنبې په ورځ غربي ملکونو ته خبرداری ورکړ چې که چېرته هغوی اوکراین ته عسکر ولېږي، نو د یو اېټمي جنګ د شورو کولو خطره رامخې ته کوي. پوټین وویل، روس سره داسې وسلې شته چې وکولی شي په مغرب کې اهداف په نښه کړي.
خپل اولس ته د کلني تقریر پر مهال، د روس صدر وویل، مغربي ملکونو ته "په کار ده په دې پوهه شي چې مونږ سره هم داسې اسلحې شته چې د هغو په خاوره کې اهداف په نښه کړی شي. دا هرڅه په واقعي حیثیت سره د اېټمي وسلو او د تهذیب د نابودۍ د یو جنګ خطره مخې ته کولی شي. دوی په دې نه پوهیږي؟"
که څه هم د روس د پوځي یرغل د مقابلې دپاره غربي اتحادیانو په زیاته پیمانه ګوله بارودې د اوکراین حکومت ته لېږلي دي، خو تر اوسه یو یې هم دا ندي ویلي چې د اوکرایني قواوو مرستې ته به عسکر ورولېږي.
په دې هفته کې د فرانس صدر اېمانوېل مېکرون وویل چې اوکراین ته د جنګ دپاره د مغربي عسکرو د لېږلو کومه منصوبه نشته، مګر د دې کار امکان ختم شوی ندی.
مېکرون په یو خبري کنفرنس کې وویل: "نن ورځ داسې کوم اتفاق نشته چې په باقاعده او حمایت یافته طور عسکر محاذ ته ولېږلی شي، خو هېڅ نوع امکان ردېدلی نشي."
د یورپ څو څو مشرانو او همدا شکل امریکا د مېکرون د عسکر لېږلو په حقله دا خبره رده کړله. اوکراین د نېټو ممبر ندی، او په دې وجه د کیېف مغربي اتحادیانو باندې یې دفاع واجبه نده.
په همدې حال کې د اوکراین صدر ولودیمیر زېلنسکي د شورو/چهارشنبې په ورځ وویل چې د هغه په ملک باندې د روس په دې جاري پوځي یرغل سره، د یورپ د څو نسله آینده لارې فیصله کیږي.
زېلنسکي چې په البانیا کې د جنوبغربي یورپ د مشرانو په غونډه کې خبرې کولې، وویل: "مونږ پخوا دا لیدلي دي چې کوم یو تن څنګه کوشش کړی د نورو ملکونو قسمت وټاکي. دا په بالقان خطه کې، د یورپ په ختیځ کې، او د یورپ په ټولو نورو سیمو کې پېښ شوي دي."
زېلنسکي وویل، دا "ټولو آزادو قامونو ته اهمه" ده چې پوټین دا جنګ وبایلي، او دا چې د روس مشر ناکامیانې "زمونږ امن دی."
Forum