امریکې په کندهار کې پرونی خونړی ځانمرګی برید غندلی چې داعش وسلوالې ډلې یې ذمه واري پر غاړه اخیستې وه.
د افغانستان لپاره د امریکې ځانګړي استازي ټامس ویسټ پر ایکس لیکلي چې د امریکا په کندهار او کابل کې ترهګر هغه بریدونه غندي چې بې ګناه وګړو ته پکې مرګ ژوبله اوښتې ده.
په دوحه کې د افغانستان لپاره د امریکې سفارتکارې کېرن ډېکر هم دا برید "بزدلانه" بللی او په سختو ټوکو یې غندلی دی.
د افغانستان په جنوب کې پروت ښار کندهار کې پرون سهار ځانمرګی بريد شوی، رپورټونه وايي، په ياد بريد کې لږ تر لږه 20 کسان وژل شوي او داعش یې ذمه واري منلې ده.
ياد ځانمرګی بريد د زيارت/ پنجشنبې په سهار د کندهار د کابل بېنک ودانۍ مخې ته شوی چرته چې د عامو خلکو ګڼه ګوڼه وه.
افغان رسنيو پرون په کندهار کې د طالبانو د پوليسو د وياند اسدالله جمشېد له قوله ویلي وو، په بريد کې درې ملکي کسان وژل شوي او 12 نور ژوبل شوي دي.
خو نیويارک ټايمز ورځپاڼې په خپل خبر کې د کندهار د ميرويس سيمه ييز روغتون د ډاکټرانو او نرسانو له قوله ويلي، په بريد کې د طالبانو د غړو په ګډون لږ تر لږه 20 تنه وژل شوي او روغتون ته د 50 پورې ژوبل کسان ور وړل شوي وو.
د پېښې عېني شاهدانو او د روغتون کار کوونکو ويلي، ښيې په بريد کې د طالبانو هغه غړي په نخښه شوي چې د بېنک څخه د تنخاګانو اخستو دپاره راټول شوي وو.
بي بي سي په خپل خبر کې د روغتون د ډاکټرانو له قوله ويلي، په ځانمرګي بريد کې لږ تر لږه 21 کسان وژل شوي او 50 نور ژوبل شوي وو.
د خبر ترمخه، داعش د بريد زمه واري منلې او ويلي یې دي، ځانمرګي یې د 150 پورې طالبانو په مينځ کې چاودنه کړې ده.
طالبان چې په کال 2021م کې په افغانستان واکمن شوي، دعوه کوي په هيواد کې امنیت په ځای کړی دی، خو د دغو دعوو باوجود د کابل ترڅنګ په غټو ښارونو کې چاودنې او بريدونه شوي،ګڼې مرګ ژوبلې یې اړولي او د زياتو زمه وارۍ پکې داعش منلې دي.
Forum