د ملګرو ملتونو یو پلاوي په اسلام اباد کې تېره ورځ د نامعلومه کسانو لخوا په برید کې ژوبل شوي د تحریک انصاف ګوند د ویاند روف حسن سره لیدلي اؤ د هغه احوال یې اخستی دی.
پاکستاني مطبوعات وایي چې د ملګرو ملتونو دغه پینځه کسیز پلاوي کې درې استازي د نیویارک اؤ دوه د اسلام اباد د دفتر څخه وؤ چې تېره ورځ په اسلام اباد کې د تحریک انصاف مرکزي سیکرټریټ ته ورغلل اؤ دغلته یې د تحریک انصاف ګوند د مشرانو سره لېدنه وکړه.
په دې لیدنه کې د پي ټي آي چیرمین بېرسټر ګوهر، عمومي سکتر عمر ایوب اؤ نور مشران هم شریک وؤ اؤ د مطبوعاتو له مخې دغو مشرانو اؤ روف حسن په هغه د شوي برید په هکله د ملګرو ملتونو پلاوي ته احوال ورکړی دی.
په روف حسن تېره ورځ اسلام اباد کې نامعلومه کسانو برید کړی ؤ چې پکې هغه ژوبل شوی ؤ .
ددغه پېښې مقدمه د اسلام اباد په ابپاره تاڼه کې درج کړل شوې ده چې په دغه مقدمه کې څلور نامعلومه نرښځیان په برید کې ککړ نومول شوي دي.
پي ټي آي پخپل ویاند د شوي برید په اړه د پولیسو له لوري درج شوې مقدمه رد کړې اؤ ددې پېښې عدالتي پلټنې یې غوښتي دي.
د شورو په ورځ اسلام اباد کې مطبوعاتي کانفرنس ته وینا کې د تحریک انصاف ګوند عمومي سکتر عمر ایوب ویلي چې په روف حسن د بلېډ یا پتري له لارې حمله شوې ده اؤ مقصد یې د هغه د مرۍ رګ غوڅول وؤ خو وایي د چړې په شان په تېزه اله د روف حسن مخ زخمي شوی اؤ د هغه ژوند خدایې ژغورلی دی.
هغه وویل د پولیسو لخوا مقدمه په نرښځیانو درج کول د خندا عمل دی ځکه چې روف حسن پولیسو ته کوم درخواست ورکړی په هغې کې یې هر څه ویلي خو د اسلام اباد پولیسو ایف آي ار کې د ترهګرۍ هیڅ ذکر نه دی کړی.
هغه غوښتنه وکړه چې ددې برید د پلټنو لپاره باید یو قضایي کمیشن جوړ کړل شي اؤ ددې ترڅنګ یې وویل چې که د ګوند په کوم مشر یې برید وشو نو سوله ییز احتجاج به پیل کړي.
روف حسن مطبوعاتي کانفرنس ته ویلي چې د برید په مهال ورته برید ګرو ویلي" ته خو مونږ لټولې"
هغه ویلي د برید ګرو انداز داسې ؤ لکه چې دده مرۍ غوڅوي .
نوموړي زیاته کړې ده چې د مخ زخمونه به یې راډک شي خو کوم زخمونه چې د ریاست په روح لګول شوي هغه به کله هم راډک نه شي.
د قانون مرکزي وزیر ښاغلي اعظم نزیر تارړ تېره ورځ د سینیټ غونډې ته ویلي چې پولیس ددې برید پلټنې کوي اؤ حکومت سنجیده دی چې پېښه کې ککړ کسان باید ونیول شي.
هغه ویلي د اسلام اباد د پولیسو له مشر څخه د پېښې په اړوند رپورټ غوښتل شوی اؤ پولیسو هم د پلټنو لپاره ځانګړې ډله جوړه کړې ده چې زر به حقیقتونه مخې ته راوړي.
Forum