پس د هغه چې د زیارت/پنجشنبې په ورځ په نیویارک کې یو جیوري یا منصفه پلاوي د امریکا پخوانی صدر ډونالډ ټرمپ د خپل کاروبار په مالیاتي حسابونو کې د غلطۍ او د لوڅو فلمونو یوې لوبغاړې ته د چوپ پاته کېدو دپاره د پټو پېسې ورکولو په قضیه کې په ۳۴ الزاماتو مجرم وبللو، د جیوري په دې فیصلې باندې تر اوسه بېلابېل غبرګونونه مخې ته راغلي او لا هم راروان دي.
پخپله د ټرمپ غبرګون:
د زیارت په ورځ د نیویارک عدالت نه د وتلو په وخت، ډونالډ ټرمپ وویل: "دا یوه رسوائي وه. دا د یو متضاد جج لخوا چې کرپټ/فاسد دی، یوه جعلي مقدمه وه...مونږ به خپله مبارزه جاري ساتو. مونږ به تر آخره مقابله کوو، او مونږ به یې ګټو...حقیقي فیصله به د نوامبر په ۵مه کیږي، د خلکو له طرفه. هغوی پوهیږي چې دلته څه وشول، زه یو ډېر بېګناهه انسان یم."
د نوامبر د پنځمې نېټې نه د ټرمپ مقصد، امریکا کې عمومي صدارتي ټاکنې دي، کوم کې چې هغه به د رېپبلېکن ګوند له طرفه د ډېموکرېټ جو بایډن په خلاف اودرېدلي وي.
د صدر جو بایډن او نایب صدرې کمېلا هېرس کمپېن
د جیوري یا منصفه پلاوي له خوا د ټرمپ د مجرم ګڼل کېدو نه سمدستي وروستو، د بایډن-هېرس انتخابي کمپېن یو بیان جاري کړ او ویې ویل: "په نیویارک کې نن، مونږ ولیدو چې هېڅ څوک د قانون نه بالادسته ندي."
د بایډن د انتخابي کمپېن په دې بیان کې چې د کمپین د مطبوعاتو څانګې مشر مایکل ټایلر لخوا خپور شوی، نوموړي ویلي چې "ډونالډ ټرمپ همېشه په غلطه دا باور لرلو چې هغه به هېڅکله د خپلو شخصي مفاداتو دپاره د قانون ماتولو د نتیجو سره مخ نشي."
په بیان کې دا هم ویلی شوي چې صدارت ته د ټرمپ د بیا رسېدو د مخنیوي دپاره صرف و صرف یوه لاره موجوده ده او هغه "د رایو د باکسونو په ذریعه" ده، ځکه که ټرمپ مجرم وګڼل شي او که نه، کولی شي د رېپبلېکن ګوند لخوا انتخاباتو کې صدارتي څوکۍ ته اودرېږي.
د کانګرس سپیکر
د امریکا په کانګرس کې د اېوان نمایندګان سپیکر، مایک جانسن چې پخپله د ټرمپ د رېپبلېکن ګوند سره تعلق لري، د نیویارک جیوري د زیارت ورځې د فیصلې په باب داسې غبرګون ښودلی دی:
"نن د امریکا په تاریخ کې یوه شرمناکه ورځ ده. ډېموکرېټانو چې د حزب اختلاف مشر په مضحکه خېزو الزاماتو، هغه هم د یو سزایافته مجرم په ګواهۍ باندې لکه څنګه چې پېشګويي کېدله، مجرم وګرځولو او ورته یې د خوشحالۍ نعرې وکړې. دا یوه مکمله سیاسي کاروایي وه، کومه قانوني کاروایي نه وه. دا چې زمونږ عدالتي نظام د وسلې په حیث استعمال شي، د بایډن انتظامیې یوه ځانګړنه ده، او د نن ورځې فیصله یو بل ثبوت دی چې ډېموکرېټان به د ناراضیانو خاموشه کولو او د سیاسي مخالفینو چقولو په خاطر له هېڅ کاره مخ وانه ړوي."
سپیکر جانسن دا هم ویلي چې ټرمپ به د دې فیصلې په ضد اپیل کوي او "ګټی به یې."
وایټ هاوس
په وایټ هاوس کې د کونسل دفتر ترجمان ایان سامز په یوه لنډه تبصره کې، د ټرمپ د مجرم پېژندل کېدو په باب ویلي:
«مونږ د قانون د حکمرانۍ احترام کوو، او نور اضافي تبصره نلرو.»
د کانګرس د عدلي کمېټې مشر
د امریکا د کانګرس په اېوان نمایندګان کې د عدلي چارو د کمیټې چېئرمېن جېم جورډن، چې د اوهایو ریاست یو رېپبلېکن استازی دی، هم سخت غبرګون ښودلی دی.
جورډن ویلي یې دي:
«دا فیصله، په انصاف باندې ملنډې وهل دي. کله زمونږ عدالتي نظام د ګوندیزو سرکاري وکیلانو له خوا د یو متعصب جج مخې ته په یو غېرمنصفانه پروسې کې د وسلې په حیث وکارول شي چې مقصد یې د کمپېن له بهیر نه د [پخواني] صدر ټرمپ لېرې ساتل او د صدر بایډن انتهایي پسنده پالیسیو نه د خلکو د توجو اړول دي، نو د منهاټن د ملنډو عدالت دا ښکاره کوي چې په دې صورت کې څه پېښيږي.»
د کانګرس د عدلي کمیټې یو ډېموکرېټ غړی
د امریکا په کانګرس کې د اېوان نمایندګان د عدلي چارو د کمېټي یو ډیموکرېټ غړي، جېري ناډلر بیا د جیوري د فیصلې هرکلی کړی او ویلي یې دي: «په لوور منهاټن کې انصاف پر ځای کړی شو... هېڅ څوک د قانون نه پورته ندي – آن یو پخوانی صدر هم. ډونالډ ټرمپ اوس د یو جیوري لخوا چې پخپله یې غوره کړی و، انتخاباتو کې مداخلت باندې د انصاف ترمخه، مجرم وګڼل شو او نور د خپلو اعمالو د نتایجو نه نشي تښتېدلی.»
کانګرس کې د کېليفورنیا یو استازی
په کانګرس کې د کېلیفورنیا سره تعلق لرونکی یو ډيموکرېټ استازي اېرېک سوالوېل لیکلي:
«ډونالډ ټرمپ یو مجرم دی. دا فیصله د کوم انفرادي وګړي دپاره کامیابي نده. دا د یوې نظریې کامیابي ده. دغه نظریه چې مونږ ټول د عین قوانینو پیروکاران یو. د قانون حکمراني نن کامیابه شوه.»
د نیویارک رېپبلېکن استازې
د نیویارک نه په کانګرس کې یوه رېپبلېکنه استازې اېلیس سټېفانېک چې خیال کیږي د آینده رېپبلېکن صدارتي امېدوار یوه احتمالي نایبه هم وي، ویلي دي:
«د نن ورځې فیصلې دا وښوده چې د جو بایډن او ډېموکرېټانو د حکومت لاندې د وسلې په توګه استعمال شوی عدالتي نظام څومره کرپټ، جعلي، او غیرامریکایي شوی دی. زه په مکمله توګه د صدر ټرمپ ملاتړ کوم چې د دې فیصلې خلاف اپیل وکړي او په تمه یم چې د نیویارک یو عالي عدالت انصاف پر ځای او دا فیصله لغوه کړي.
سنېټره کېتهرین کورټېز ماسټو
په سنېټ کې د نېوادا ریاست سنېټرې کېتهرین کورټېز ماسټو ویلي:
«مونږ ټول پوهېږو چې ډونالډ ټرمپ غواړي د خپلو مفاداتو د تحفظ دپاره هرڅه وکړي، په شمول د دې چې زمونږ انتخابات نقصانمن کړي. هېڅوک د قانون نه اوچت ندی، او زه خوشحاله یم چې ګورم نن انصاف پرځای کړی شوی دی.»
د ټرمپ پخوانی سلاکار، جان بولټن
د ټرمپ پخوانی د قامي سلامتیا مشیر، رېپبلېکن جان بولټن چې یو وخت یې نږدې کس و او بیا یې ترې لاره جدا کړه، په خپلو رېپبلېکنانو غږ کړی چې ټرمپ دې انتخاباتو کې خپل کاندید نه ټاکي.
بولټن ویلي: «د نن ورځې فیصله، لکه په توره شپه کې د اورلګېدنې ګنټي. رېپبلېکن پارتۍ اوس آخري فرصت لري چې خپله لاره بدله کړي، او یو مجرم پېژندل شوی کس دې د صدارت څوکۍ ته نه کاندید کوي.»
د ټرمپ د مجرم پېژندل کېدو په اړه امریکایي رسنیو کې پراخ بحثونه روان دي، او شېبه په شېبه د نورو مختلفو سیاستمدارانو او څېړونکو تبصرې هم مخې ته راځي.
Forum