لاس رسیدونکی لینک

تازه خبر

پاکستان

د امریکې خارجه محکمه:پاکستان کې تېرکال ۱۶کسان په عقیدوي اختلاف وژل شوي اؤ په ۳۲۹ نورو د مذهب د سپکاوي تورونه لګول شوي

د امریکې خارجه محکمې په نړۍ کې د مذهبي ازادیو په اړه خپل کلنی رپورټ خپور کړی چې پکې پاکستان کې د مذهبي ازادۍ په وضعیت اندېښنه ښودل شوې ده.

رپورټ کې ویل شوي چې په تېر کال ۲۰۲۳م کې پاکستان کې ۱۶کسان د هغوي د عقیدې له امله وژل شوي اؤ هم په دغه کال کې په پاکستان کې په ۳۲۹ کسانو د مذهب د سپکاوي تورونه لګول شوي دي.

دا د مذهبي ازادیو په اړوند د امریکې د خارجه محکمې دا کلنی رپورټ په داسې حال کې مخې ته راغلی چې تېره اوونۍ هم د پاکستان د خېبر پښتونخوا ایالت د سوات په مدین سیمه کې یو د پنجاب نه ورغلی یو سېلګری ځایي خلکو د مذهب د سپکاوي په تورونو ژوندی سوځولی اؤ وژلی دی.

د امریکې د بهرنیو چارو د محکمې ویاند میتیو میلر دغه پېښې ته پخپل غبرګون کې تېره ورځ ویلي، وؤ د مذهبي ازادیو، د رایې ازادۍ اؤ د پرامنه اجتماع حق ته باید درناوی ولرل شي.

د خارجه محکمې په رپورټ کې ویل شوي چې پاکستان کې په سوشل میډیا د مذهب د سپکاوي په تورونو کې ۱۴۰ کسان نیول شوي اؤ ۱۱ ته د مرګ سزا اورول شوې ده.

رپورټ وایي ،پاکستان کې وسله والو فرقه ییزه ډلو د مذهبي اجتماعاتو اؤ عبادتخانو په ضد له تشدد ډکې کارروایۍ دوامداره ساتلي دي.

د رپورټ مطابق پاکستان کې تېر کال په سوشل میډیا فورمونو د حکومت په غوښتنه ۷۱ زرو نه زیات یو آر ایلز بلاک کړل شوي اؤ د اګست په میاشت کې سینیټ د یوې قانون سازۍ منظوري ورکړې چې پکې د مذهب د سپکاوي سزا نوره هم زیاته کړل شوې ده.

د پاکستان حکومت لا د امریکې د خارجه محکمې دې کلني رپورټ ته خپل غبرګون نه دی ښودلی دی خو تر دې وړاندې په بیلا بیلو وختونو کې د پاکستان لوړ پوړو حکومتي چارواکو ویلي چې د هېواد ايين د اقلیتونو په شمول د ټولو شهریانو د مذهبي ازادیو ضمانت ورکوي.

په دې رپورټ کې د هند دننه هم د مذهبي ازادۍ په وضعیت اندېښنه ښودل شوې اؤ ویل شوي چې په دغه هیواد کې مسلمانانو اؤ مسیحي ورورولۍ سره ناروا سلوک دوامداره دی.

رپورټ کې ویل شوي چې تېر کال هند کې مسیحي وګړي اؤ مسلمانان په زوره د مذهب په بدلولو د پابندۍ د قوانینو لاندې نیول شوي اؤ د اقلیتي ډلو غړي د بې ځایه تورونو په اساس ځورول شوي دي.

تر دې وړاندې تېر کال هم په نړیواله کچه د مذهب د ازادۍ په اړه د امریکې د حکومت ادارې یوناټېډ سټېټس کمېشن ان انټرنېشنل رېلېجس فريډم، یو اېس سي ايي ار اېف، په خپل کلیز رپورټ کې ویلي وؤ چې په پاکستان کې په کال ۲۰۲۲ کې د هدفي وژنو، د اجتماع دلاسه د خلکو د وژل کېدو، په زور د خلکو د مذهب بدلولو او د اقلیتونو د عبادت ځایونو او د مقبرونو د بې حرمتۍ پېښې کېدلې.

په دسمبر کال ۲۰۲۲م کې د امريکې حکومت د پاکستان نوم د بشري او مذهبي حقونو څخه دسرغړونو لپاره دنړۍ په کچه دبدنامو لسو هیوادونو په نوملړ کې اچولی ؤ.

روان کال د اپریل په میاشت کې د ملګرو ملتونو د بشري حقونو کارپوهانو په دې ناهیلي ښکاره کړې وه چې په پاکستان کې د مذهبي لږکیو ښځې او نجونې خوندي‌ نه دي او د مذهب له جبري بدلون او جبري ودونو سره مخامخ دي.

تر دې وړاندې د بشري حقونو تنظيمونو او د یورپي هيوادونو تنظيم ېورپي يونين هم پاکستان کې د لږکيو په ضد د مذهب د سپکاوي دقانون نه دناسمې استفادې،د خلکو په جبري توګه د اوچتولو او د لږکيو زنانه و سره دجبري ودونو پېښو کې د راغلي زياتوالي پسر د پاکستان په حکومت نيوکې کړې دي.

See all News Updates of the Day

کراچۍ: د ترهګرۍ ضد محکمې پولیس وایي د ټي ټي پي "مهم ترهګر" یې وژلی

د پاکستان په ستر اقتصادي ښار کراچۍ کې د ترهګرۍ ضد محکمې پولیسو دعوه کړې ده چې ددغه ښار د پولیسو په مرکزي دفتر ترسره شوي برید کې ککړ د ټي ټي پي یو "مهم ترهګر" یې وژلی دی.

د ترهګرۍ ضد محکمې د پولیسو مشر یا ډي آي جي اصف اعجاز شیخ د نهې یا سه شنبې په ورځ رسنیو ته ویلي چې د کراچۍ په ناردرن باي پاس د موچکو په سیمه کې پولیسو د ترهګرو سره مقابله کړې ده چې پکې "د تحریک طالبان پاکستان مهم ترهګر عمر فاروق" وژل شوی دی.

د پولیسو مشر ویلي په دې وروستیو کې چې د کراچۍ د پولیسو په دفتر کوم برید شوی ؤ د هغې پلان هم دغه وژل شوي ترهګر جوړ کړی ؤ.

هغه ویلي د ترهګرۍ ضد پولیسو د خفیه اطلاع په ترلاسه کولو سیمه کې چاپه وهلې وه خو وایي په دغه موقعه ترهګر په پولیسو ډزي کړي اؤ په ځوابي ډزو کې یو ترهګر وژل شوی.

تر دې وړاندې تېره اوونۍ هم د ترهګرۍ ضد محکمې یا سي ټي ډي پولیسو دعوه کړې چې وه د کراچۍ څخه یې د پاکستاني طالبانو د حافظ ګل بهادر ډلې دوه "مهم ترهګر" نیولي دي.

د پولیسو مشر یا ډي آي جي اصف اعجاز شیخ ویلي وؤ دا ترهګر د کراچۍ د جنجال ګوټ سیمې څخه د عملیاتو په مهال نیول شوي دي اؤ دعوه یې کړې وه چې نیول شوو ترهګرو د ټولنیزو رسنیو د شبکې له لارې په افغانستان کې د ټي ټي پي سره تماسونه درلودل اؤ د تحریک طالبان پاکستان لپاره یې پنګې راټولولې.

په دې وروستیو کې په پاکستان کې په پاکستان کې په امنیتي ځواکونو د ترهګریزو بریدونو لړۍ چټک شوې اؤ اوړمه ورځ د پوځ د ویاندې ادارې آي ایس آي مشر لیفټننټ جنرال احمد شریف رسنیو ته ویلي وؤ چې سږ کال ترهګریزو بریدونو اؤ وسله والو سره نښتو کې 137 پوځي افسران او عسکر وژل شوي.

هغه ویلي وؤ امنيتي ځواکونو د ترهګرو او سهولت کارو پرضد 22,409 عمليات کړي، په دغو عملياتو کې 398 ترهګر هم وژل شوي چې پکې 31 مهم ترهګر هم شامل دي.

د این ایف سي ایوارډ ټاکلو اؤ قبایلي ضلعې ته پکې د برخې ورکولو لپاره عدالت ته خواست شوی

د این ایف سي ایوارډ زر تر زره د ټاکلو اؤ په هغه کې قبایلي ضلعو ته د برخې ورکولو لپاره پېښور هایکورټ ته عریضه شوې ده.

دا عریضه چې د پښتونخوا د خزانې پخواني وزیر تیمور سلیم جګړه د وکیل علي ګوهر دراني په لاس کړې ده، پکې ویل شوي چې قبایلي سیمو ته پنګې ورکول د وفاقي حکومت ذمه واري وه خو کله نه چې قبایلي ضلعې صوبه کې شاملې شوې دي نو وفاقي حکومت دغو سیمو ته د خپلې برخې پېسې نه ورکوي.

په درخواست یا عریضه کې ویل شوي چې اوس هم په صوبه کې ورګډې کړل شوې قبایلي ضلعې د وفاق په ذمه ۱۵۰ اربه روپۍ لري.

تیمور سلیم جګړه ویلي چې د این ایف سي ایوارډ په غیر موجودګۍ کې د قبایلي ضلعو مالي اړتیاوې پوره کول د وفاقي حکومت ذمه واري ده خو وفاق د داسې کولو نه ځان په ډډه کړی دی.

درخواست کې دریځ خپل کړل شوی چې له تېرو ۱۴ کالو راهسې این ایف سي ایوارډ نه دی ټاکل شوی ځکه نو عدالت دې زر تر زره د ایف ایف سي ایوارډ د ټاکلو امر وکړي اؤ په دغه ایوارډ کې دي قبایلي ضلعو ته هم برخه ورکړل شي

د پاکستان وزیراعظم ښاغلی شهباز شریف د تېرې میاشتې په وروستیو کې د پارلیمان غونډې ته ویلي وؤ چې د ترهګرۍ نه اغېزمنې صوبې خېبر پښتونخوا ته په کال ۲۰۱۰ کې د این ایف سي ایوارډ لاندې ۵۹۰ اربه روپۍ ورکړل شوې دي خو په دغه صوبه کې تر اوسه د ترهګرۍ ضد محکمه یا سي ټي ډي هم نه ده بشپړه شوې.

وزیراعظم شهباز شریف ویلي وؤ این ایف سي ایوارډ په ۲۰۱۰م کال کې ټاکل شوی ؤ اؤ په هغې د هغه وخت د وزیراعظم یوسف رضا ګیلاني مشرۍ کې څلور واړه صوبې متفق شوې وې.

د وزیراعظم وینا وه چې د پښتونخوا ولس د ترهګرۍ په ضد جګړه کې تر ټولو زیاتې قربانۍ ورکړې دي همدا لامل دی چې په کال ۲۰۱۰م کې د ټاکل شوي این ایف سي ایوارډ په اساس دې ترهګرۍ ځپلې سیمې ته ۵۹۰ اربه روپۍ ورکړل شوې دي.

هغه ویلي وؤ صوبې ته د دومره لوي رقم ورکړی کېدو باوجود تر اوسه پښتونخوا کې د ترهګرۍ ضد محکمه هم نه ده بشپړه کړل شوې.

د شهباز شریف وینا وه، "مونږ سیاست کول نه غواړو خو د خېبر پښتونخوا په څېر نورې صوبې هم د ترهګرۍ سره مخ پاتې شوې دي خو د ترهګرۍ په مد کې نورو صوبو ته هیڅ نه دي ورکړل شوي".

خو د خېبر پښتونخوا حکومت بیا د وزیراعظم شهباز شریف دا دعوه د حقیقت نه لرې بللې وه اؤ ویلي یې وؤ چې شهباز شریف د دروغو په دعوؤ د خېبر پښتونخوا د برخې د پیسو نه سترګې نه شي پټولی.

د پښتونخوا حکومت ویاند اؤ د اطلاعاتو لپاره د وزیر اعلا سلا کار بېرسټر سیف وي او ای ډيوه سره خبرو کې ویلي وؤ،د ترهګرۍ په ضد جګړه کې چې پښتونخوا صوبې سره کومې ژمنې شوې دي "مونږ د هغې په اساس د وفاقي حکومت نه غواړو چې زمونږ صوبې ته دې د خپلې برخې پېسې ورکړل شي".

هغه ویلي وؤ د هګرۍ خلاف جګړه یوه هر اړخیزه بڼه لري اؤ د هغې لګښتونه بیخي ډير دي.

ویاند ویلي وؤ کله چې قبایلي سیمې په صوبه کې ورګډولی شوې په هغه مهال وفاق پښتونخوا لپاره د ځانګړي فنډ یا پنګو اعلان کړی ؤ اؤ مونږ ترې دا ځل د قبایلي سیمو لپاره د ۱۴۰ اربو روپو نه زیات ترقیاتي فنډ غوښتی دی خو وایي وفاق صوبې ته یوازې ۶۶ اربه روپۍ ورکړې دي.

آصف دراني: ټي ټي پي پاکستان لپاره "سره کرښه" ده، افغان طالبان یې باید پر ضد اقدام وکړي

د افغانستان لپاره د پاکستان ځانګړي استازي ښاغلي آصف دراني ویلي ټي ټي پي د پاکستان لپاره "سره کرښه" ده اؤ هیله ده چې د افغان طالبانو لنډ مهاله حکومت به ددې ډلې پرضد کوټلی اقدام وکړي.

د نهې- سه شنبې په ورځ اسلام اباد کې د سیمه ییزو مطالعاتو د انسټيټيوټ په تابیا د پاکستان اؤ افغانستان د اړیکو، چیلنجونو اؤ فرصوتونو په موضوع راجوړ شوي کانفرنس ته خپله وینا کې ښاغلي دراني وویل، د افغانستان د خاورې نه کېدونکې ترهګرۍ د پاکستان تر څنګ نور ګاونډي هیوادونه چین، ایران، تاجکستان اؤ ازبکستان هم اندېښمن کړي دي.

خو تر دې مهاله بیا د پاکستان نه علاوه یادو ګاونډیو په ښکاره داسې کومه اندېښنه نه ده ښکاره کړې چې ګنې د افغانستان له پلوه ورته ګواښونه ورپېښ دي.

د پاکستان ځانګړي استازي په خپله وینا کې د افغان طالبانو په حکومت ټینګار وکړو چې باید خپله خاوره کې د موجودو ترهګرو په ضد ګامونه واخلي.

د پاکستان حکومتي اؤ پوځي چارواکي وخت په وخت تورونه لګوي چې د افغانستان په خاوره کې د پاکستان ضد طالبانو یا ټي ټي پي مشران او وسله وال خوندي ځالي لري اؤ د هلته نه پاکستان کې د ورانکارۍ پلانونه جوړوي خو افغان طالبان بیا د پاکستان دا تورونه په سختۍ ردوي اؤ وایي په افغانستان کې هیڅ یوه ترهګره ډله وجود نه لري.

د طالبانو حکومت دریځ لري چې هغوي د افغانستان خاوره د کوم بل هیواد پرضد کارول کېدو ته نه ورکوي.

آصف دراني وویل پاکستان افغانستان کې امن اؤ ثبات ته لیواله دی اؤ د افغان طالبانو د حکومت سره د صبر اؤ زغم نه کار اخلي.

هغه وویل پاکستان افغانستان کې داسې ټولنیز،اقتصادي اؤ سیاسي وضعیت غواړي چې ورته په کتلو سره د پاکستان نه ۳۰ لکه افغان کډوال بېرته خپل هیواد ته ستانه شي .

هغه د ملګرو ملتونو د کډوالو په اداره ټینګار وکړو چې د افغانستان کډوالو د بېرته ستنولو لپاره باید یوه مربوطه اؤ ګټوره تګلاره تیاره کړي.

هغه د ترکمنستان، افغانستان، پاکستان اؤ انډیا د ګیس پایپ لاین پروژې اؤ د کرغزستان اؤ تاجکستان څخه افغانستان اؤ پاکستان پورې د کاسا ۱۰۰۰ پاور ټرانسمیشن لاین په
څېر سیمه ییزو پروژو د کار چټک کولو غږ هم وکړو.

په دې وروستیو کې د افغانستان دننه د ترهګرۍ بهیر یو وارې بیا چټک شوی چې ورسره د افغان طالبانو د حکومت اؤ پاکستان تر منځ اړیکې هم اغېزمنې شوي اؤ پاکستاني چارواکي په بیلابیلو نړیوالو فورمونو د افغانستان دننه د ترهګرو ډلو شتون ته ګوته نیسي.

خو د افغان طالبانو دحکومت د خارجه چارو وزیر په دې وروستیو کې ویلي وؤ چې ترهګري د پاکستان خپله مسله ده اؤ د پاکستان نه علاوه یو ګاونډي هیواد هم د افغانستان له لوري خپل امنیت ته د ګواښ اندېښنه نه ده ښکاره کړې.

پوځ وايي ډېجېټل ترهګر پوځ په هدف کوي، څېړونکي په یوه اداره تنقید ترهګري نه بلي

د پاکستان د پوخ مشر جنرل عاضم منیر د پوځي افسرانو د یوې غونډې مشري کوي
د پاکستان د پوخ مشر جنرل عاضم منیر د پوځي افسرانو د یوې غونډې مشري کوي

د پاکستان پوځ ویلي د غلطو او جعلي خبرونو دلارې ځينې خلک ډیجیټل ترهګري کوي او د ډیجیټل ترهګرو هدف پوځ په نخښه کول دي.

څیړونکي وایې په يوې ادارې تنقید ترهګري نه ده خو د پوځ دا بیان اشاره کوي چې په راتلونکې کې پاکستان کې په ټولنیزو رسنیو بندیزونه لګېدی شي.

د پاکستان د پوځ وياند لېفټيننټ جنرل احمد شريف چودري تيره ورځ مطبوعاتي غونډې ته ویلي چې ډیجيټل ترهګر د پاکستان په پوځ د جعلي خبرونو له لارې بریدونه کوي او مقصد یې د پوځ او د ولس اړيکې خرابول دي.

نوموړي ويلي، څنګه چې ترهګر د ټوپک په زور خپله خبره کوي دغه شان ډیجيټل ترهګر د موبایل، کمپیوټر او غلطو خبرونو له لارې انتشار يا اړی ګړی خورول غواړي.

د ډيجيټل حقونو کارپوه هارون بلوڅ وايي، "څوک چې د ادارو په تګلارو تنقید کوي نو هغوي ته دا حق د پاکستان دستور ورکړی دی او يو جايز تنقید کله هم ډیجيټل ترهګري نه شي کیدې، له بدمرغه پاکستان يو خوا نړۍ ته ښايي چې دلته جمهوریت دی خو بیا په حقیقت کې دلته خلکو ته جمهوري حقونه نه دي ترلاسه او هر حکومت د اسټبلشمنټ په ژبه خبرې کوي او دغه شان اوس په ټولنیزو رسنیو د بندیز مقصد د خلکو آزاد اوازونه غلي کول دي".

د پوځ بيان په داسې وخت کې مخې ته راغلی چې د جولايۍ په 22مه د اسلام آباد پولیسو د پاکستان تحریک انصاف په مرکزي دفتر چهاپه وهلې او د ګوند ترجمان او ځینې نور غړي یې نیولي او د دفتر کمپيوټرونه يې هم په قبضه کې اخیستې دي.

د دې وروسته د کورنيو چارو وزارت ويلي، تحریک انصاف ګوند د رياست پرضد پروپېګنډا کوي.

د پوځ وياند ادارې د مشر لخوا د ډیجيټل ترهګرۍ په اصطلاح کارولو پاکستان تحریک انصاف په خپل غبرګون کې ویلي چې کله دوی دا تپوس کوي چې خلاف یې د قانون غلط استمال ولې کیږي نو دوي ته ډیجيټل ترهګري وايي ايا دلته چا سره دا حق هم نشته چې تپوس يا سوال وکړي؟

د ډيجيټل حقونو کارپوه انيس قرېشي وايي، "په يو تن يا ادارې تنقید کیدې شي خو بیا د بدمرغه پاکستان کې اکثر له تنقید بې ځایه شورو شي لکه يو مثال یې دا دې چې موجوده وخت د پاکستان پوځ سرلښکر عکس په ټولنیز رسنیو خپريږي او ورسره د ډېرو غلطو ټکو استمال کیږي نو بیا داسې کارونه حکومت ته هم جواز ورکوي چې داسې قوانین جوړ کړي چې د ټولنیزو رسنیو استمال کم شي."

پاکستان کې د وړاندې نه د ټولنیزو رسنیو په ځینو پاڼو لکه په اېکس (پخواني ټویټر) بندیز دی. خو د پاکستان هر يو حکومت بيا دعوه کوي،چې په هيواد کې مطبوعاتو ته مکمله ازادي ترلاسه ده.

د پاکستان پوځ د افغانستان څخه راوړېدونکي درېو ترهګرو د وژلو دعوه کړې

 Pak Afghan Border File Photo
Pak Afghan Border File Photo

د پاکستان پوځ دعوه کړې، د افغانستان څخه درې ترهګرو د خېبرپښتونخوا دير ضلعې ته د راوړېدو هڅه کوله، امنيتي ځواکونه یې په حرکت خبر شوي، په ګېره کې یې اخستي او د سختو ډزو د تبادلې وروسته درې واړه ترهګر وژل شوي دي.

د پوځ په بيان کې د وژل شوو ترهګرو پېژندګلو او نور تفصیل نه دی ويل شوی، او نه د ډزو په تبادله کې پوځ ته د کوم تاوان اوښتو ويل شوي دي.

د پوځ او وسله والو ترمنځ د جګړو ځايونو ته اکثره خبريالان نه پرېښودل کيږي د پېښو د ځايونو نه د مرګ ژوبلې په اړه د پوځ یا د وسله والو ډلو دعوې ‏اکثره خپلواکه سرچينې تاييد کولی نه شي.

پوځي بيان کې ويل شوي، پاکستان پرله پسې په افغانستان کې د عبوري حکومت څخه غوښتنې کوي چې د پولې پورې غاړې ته دې د پولي انتظام برابر کړي.

په پوځي بيان کې د افغانستان د عبوري حکومت څخه تمه څرګنده شوې چې خپلې ژمنې به پوره کړي او د افغانستان خاوره به د پاکستان پرضد د ترهګرۍ دپاره کارېدو ته پرې نه ږدي.

پاکستان د اوږدې مودې نه تور لګوي چې د کله نه په افغانستان کې طالبان په واک کې راغلي، پاکستان کې ناامني او ترهګري سېوا شوې ده او د افغانستان خاوره د ‏ترهګرۍ دپاره د پاکستان ضد کاريږي خو په افغانستان کې واکمنو طالبانو د پاکستان دغه تورونه تل په کلکه رد کړي او وايي پاکستان دې د خپل امنيت ‏زمه واري په افغانستان نه ور اچوي.‏

پرون د جولايۍ په 22مه د پاکستان د پوځ وياند لفټننټ جنرل احمد شريف چودري ويلي، سږ کال د ترهګرۍ ضد عملياتو کې امنيتي ځواکونو د ترهګرو او سهولت کارو پرضد 22,409 عمليات کړي، په دغو عملياتو کې 137 پوځي افسران او 398 ترهګر وژل شوي چې پکې 31 مهم ترهګر هم شامل دي.

د پوځ وياند د عزم استحکام عملياتو په اړه ويلي، عزم استحکام د ترهګرۍ ضد هر اړخيزه کمپاين دی، پوځي عمليات نه دي، په 22م جون په اېپکس کمېټۍ کې د دې فيصله شوې، په دغه غونډه کې ټول حکومتي او پوځي مشران موجود وو.

هغه وویل، د عزم استحکام د ضرب عضب عملياتو سره موازنه يا پرتله کول سم نه دي، او زياته یې کړه د يوې بيانيې ترمخه د عزم استحکام لانجمنه کولو هڅه روانه ده.

د نوموړي په خبره، د 22م جون په اېپکس کمېټۍ کې د نېشنل اېکشن پلان په حواله جاج اخستل شوی، په هغه ورځ او بیا د هغې دوه ورځې وروسته د وزيراعظم د دفتر څخه بيانونه جاري شوي، خو بيا هم يوه مضبوطه لابي غواړي چې نېشنل اېکشن پلان او عزم استحکام مقصدونه ترلاسه نه شي.

نور کتل

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00
XS
SM
MD
LG