د ناکامه قاتلانه حملې د پېښې وروسته، تر اوسه ټرمپ د خپلې ژوبلې په اړه رسمي معلومات ندي خپاره کړي

څلور ورځې پس د هغه چې د پېنسلوېنیا په بټلر سیمه کې د امریکا په پخواني صدر ډونالډ ټرمپ باندې د قاتلانه حملې ناکامه هڅه وشوه، تر اوسه عوامو ته څه روښانه معلومات ندي ورکړی شوي چې ټرمپ څومره ژوبل شوی، روغتون کې یې څه درملنه یې شوې، او یا د دې زخم یا زخمونو کوم دوامداره اثر به د هغه په صحت باندې پاته وي او که نه.

د ټرمپ انتخابي کمپېن د نوموړي د صحت په باب د څه ویلو، د کوم مېډيکل رپوټ یا ریکارډ د خپرولو، او یا هم د هغه د معالجو ډاکټرانو د ښودلو نه ډډه کوي او دې ته انتظار دي چې دا معلومات به د خپله ټرمپ، د هغه د ملګرو او یا کورنۍ له خلې خلکو ته وویل شي.

د ټرمپ د روغتیا په اړه اولني معلومات د حملې نه نیمه ګېنټه پس خواره شول. کله چې په ټرمپ ډزې وشوې، هغه پرځمکه ولوېد، او چې کله بېرته پورته کړی شو، نو داسې حال کې چې د غوږ نه یې په مخ باندې وینې بهېدلې وې، لاپرواه یې خپل سوک په هوا کې پورته پورته کولو او خپلو پلویانو ته یې د "فایټ" نعري وهلي چي د مزاحمت یا مبارزې معنا ورکوي. د ټرمپ کمپېن وروستو یو بیان جاري کړ او ویې ویل چې هغه "ښه" دی او "په یو ځایي مېډیکل مرکز کې معاینه کیږي."

د هغه ترجمان وویل چې "نور جزئیات به وروسته څرګند کړی شي."

د همغې ورځې د ماښام تر ۸:۴۲ بجو پورې څه معلومات نه و ترلاسه شوي، خو بیا ټرمپ پخپل تروټ سوشل نومې پلېټفارم باندې ولیکل چې په هغه مرمۍ/ګولۍ لګېدلې ده. ټرمپ لیکلي و چې ګولۍ د هغه د ښي غوږ پورته برخه سورۍ کړې ده.

د هغه په بیان کې راغلي و: "زه سمدستي پوه شوم چې څه خرابي روانه ده، او په دې کې مې یو تېز غږ، ډزې واورېدې او فورآ مې احساس وکړ چې ګولۍ زما د پوستکي نه تېره شوه."

د ملګرو او کورنۍ لخوا معلومات

ولسمشرانو او د سترو پارټیو نامزدان له ډېرې مودې راهېسي مجبوره دي چې کله د هغوی د صحت په باب څه پوښتنې راپورته شي، نو یوې خوا ته د ډاکټر او مریض ترمنځ چې د معلوماتو د تحفظ څه حق دی هغه هم خیال کې وساتي او ترڅنګ یې د خلکو دا توقع هم پوره کړي چې غواړي د خپلو مشرانو د صحت او د جسماني قابلیت په باب معلومات ترلاسه کړي. د مثال په طور، ټرمپ د ډېرې مودې راهېسي په صدر جو بایډن زور اچولی چې باید د ذهني صحت یو امتحان ورکړي.

د صحت ماهرین وایي، کله چې په یو صدر یا پخواني صدر باندې ډزې وشي او هغه زخمي شي، نو په یقیني توګه ډاکټران د هغه د صحت ارزونه کوي او یو مېډيکل رپوټ یې د جسماني صحت په باب تیاوري.

په ۱۹۸۱ کال کې چې د امریکا د هغه وخت په صدر رانلډ رېګن ناکامه قاتلانه هڅه وشوه او په ګولۍ وویشتل شو، هغه سمدستي واشنګټن هسپتال ته ولېږدول شو او بیا د هسپتال چارواکو په منظمه توګه د هغه د صحت او حالت په باب عوامو ته معلومات ورکول.

ټرمپ په تېرو درېیو ورځو کې د خپل رېپبلېکن ګوند په کنوېنشن کې راڅرګند شوی او په ښي غوږ باندې یې سپینه پټۍ تړل شوې ښکاري. خو د خالي/شنبې ورځې راهېسي د ټرمپ انتخابي کمپېن د هغه د صحت او یا درملنې په باب هېڅ کوم بیان ندی جاري کړی.

د کمپېن پر ځای، د ټرمپ ملګري او رشته داران دا خبرونه خپروي.

د کانګرس ممبر راني جکسن چې د ټرمپ د صدارت پر مهال یې وایټ هاوس کې د ټرمپ د ډاکټر په حیث کار کولو او د ډزې د پېښې وروستو د هغه سره په سفرونو کې مل پاته شوی دی، د ګل/دوشنبې په ورځ په یو پاډکسټ مرکه کې وویل چې د ټرمپ د غوږ یوه برخه شکېدلې ده، خو زخمی به یې روغ شي.

جکسن زیاته کړه چې په کار ده د زخم علاج په احتیاط وشي چې نور وینه ترې رانشي.

د ټرمپ زوی، اېرېک ټرمپ له سي بي اس سره په یوه مرکه کې د شورو په ورځ وویل چې د پلار د غوږ زخم یې ګنډل شوی ندی (بخۍ نده لګول شوې)، خو زخم یې لا تازه دی.

یاده دې وي چې ټرمپ کله صدر و، نو هغه وخت یې هم د صحت په اړه ډېر کم معلومات ورکول کېدل. په ۲۰۱۶ کال کې چې د اول ځل دپاره صدارتي انتخاباتو ته اودرېد، نو هغه وخت یې هم د خپل بشپړه مېډیکل رپوټ د خورولو انکار وکړ او صرف یې د خپل ډاکټر یو یادداشت جاري کړ چې په کې ټرمپ صحتمنده بلل شوی و.