ډېره اسماعيل خان: سي ټي ډي او قانون نافذونکو ادارو د درېو ترهګرو وژلو دعوه کړې

د خېبرپښتونخوا پوليسو دعوه کړې، د درابڼ تاڼې په علاقه کې د سي ټي ډي او نورو قانون نافذونکو ادارو د ترهګرو سره نښته شوې، او درې ترهګر يې وژلي دي.

د خېبرپښتونخوا پوليسو تېره شپه ناوخته په خپله فېس بک پاڼه خبر ورکړی، د درابڼ تاڼې په حدودو سګو پُل علاقه کې ورته د ترهګرو د موجودګۍ خبر ترلاسه شوی، بيا سي ټي ډي او نورو قانون نافذونکو ادارو یې پرضد علميات کړي، د ترهګرو سره نښته شوې، او درې ترهګر وژل شوي او پېژندګلو یې کولی شي.

د صوبې پوليس مشر آی جي اختر حیات خان د سي ټي ډي او نورو ټيمونو کارکردګي ستايلې، او ويلي يې دي، د ترهګرو خلاف به د دغه ناسور ختمولو پورې عمليات روان وي، او حکومتي عملداري به په هر صورت قايمه ساتي.

بيان کې ويل شوي، د ترهګرو پېژندګلو کولی شي، او په علمياتو کې سي ټي ډي او نورو قانون نافذونکو ادارو ته د کوم تاوان اوښتو په اړه څه نه دي ویل شوي.

دغه عمليات په داسې وخت کې شوي چې په وروستيو کې خېبرپښتونخوا او ځانګړي ډول قبايلي او جنوبي ضلعو کې د ناامنۍ پېښې سېوا شوي دي.

پرون ناوخته د پاکستان پوځ ویلي، د 18lم او 19م اګست په مینځنۍ شپه کې افغانستان سره په پوله باجوړ ضلعه کې په پوله د امنیتي ځواکونو او خوارجو (تحريک طالبان پاکستان) ترمنځ نښته کې درې پوځيان وژل شوي او پوځ د پينځو خوارجو وژلو او څلورو ژوبلېدو ويلي وو.

د پاکستان پوځ ویلي وو، په افغانستان کې د عبوري حکومت نه د پولې د انتظام سمبالولو، او دغه وعدې چې خپله خاوره به خوارجو ته کارېدو دپاره نه پرېږدي، تمه ساتي.

هم پرون د خېبرپښتونخوا د لکي مروت ضلعې د پوليسو وياند شاهد حميد وي او اې ډيوه سره شريک کړي خبر کې ویلي وو، د 18م اګست په مازيګر نزدې پينځه بجې د برګي تاڼې په حدودو کې وسله والو ترهګرو د برګي تاڼې په موبايل ګاډي ډزې کړي، په نتيجه کې یې کانسټېبل نثار احمد وژل شوی او د اېس اېچ او شاکر خان په ګډون درې نور پوليس اهلکار ژوبل شوي وو.

او د اتوار په ورځ امنيتي سرچینو ویلي وو، د خېبر پښتونخوا په ډیره اسماعیل خان سیمه کې په امنیتي ځواکونو د وسله والو برید کې دوه پوځيان وژل شوي او درې نور ژوبل شوي وو. د پاکستان پوځ د پېښې په اړه تراوسه پورې په رسمي ډول څه نه دي ويلي.

او د اتوار په ورځ د افغانستان سره په پوله د خېبرپښتونخوا په باجوړ کې نامعلومو وسله والو د ټرېفک پوليس اهلکار باندې ډزې کړې، ژوبل شوی او وروسته یې په روغتون کې ژوند د لاسه ورکړی وو.

باجوړ کې بله پېښه د تبليغي مرکز مخې ته شوې، د شېر زمين په نوم تن چې د تبليغي جماعت يو ځایي مشر او کاروباري دی، د نامعلومه وسله والو په ډزو کې وژل شوی وو.

د رپورټونو ترمخه، داعش خراسان د دغه پېښې زمه واري منلې ده.

د 13م اګست په شپه ناوخته د پاکستان د پوځ سرلښکر جنرل عاصم منیر ويلي وو، په خېبر پښتونخوا صوبه کې یو وارې بیا د ترهګرۍ فتنې سر راپورته کړی او د ترهګرۍ چقولو یا ځپلو لپاره د پاکستان پوځ او قانون په ځای کوونکې ادارې په مبارزه بوختې دي.

د پاکستان د ازادۍ د ملي ورځې په اړوند په کاکول پوځي اکیډمۍ کې د سلامۍ دستورې ته خپله وینا کې جنرل منیر ویلي وو، د ترهګرۍ په ضد جګړه کې چې پښتنو کوم د زړورتیا، ایثار او قربانیو لازواله داستان رقم کړی په هغې ټول قام پښتنو ته سلام کوي.

پوځي مشر ویلي وو په ځمکه د فساد خوروونکو طاغوتي قونونو مخې ته د پاکستان پوځونه او ټولې قانون په ځای کوونکې ادارې ولاړې دي او د پښتونخوا ولس د خپل پوځ او قانون په ځای کوونکو ادارو سره اوږه په اوږه لکه د فولادو د غر ولاړ دی چې په دې ټول قام د پښتونخوا د ولس احسانمن دی.