د امریکې صدر جوبایډن نن د جمعې په ورځ په پېرس کې د ډي- ډې د کالیزې په مناسبت غونډو په څنډه کې د اوکراین له ولسمشر ولادیمیر زلنسکي سره ویني او هغه ته به د 225 میلینه ډالرو په ارزښت پوځي مرسته وړاندې کړي.
دا په تېرو شپږو میاشتو کې له صدر زلنسکي سره د بایډن لومړۍ مخامخ لیدنه، وروستی ځل په تېر دسمبر کې واشنګټن ته د سفر په مهال دواړو پر ریپبلکن ګوند ټینګار کړی وو چې له اوکراین سره د لا زیاتو مرستو منظوري ورکړي.
سرچینې وایي له اوکراین سره د امریکې د 225 میلین ډالرو په ارزښت د وسلو په نوي پېکیج کې له نورو وسلو سره سره د توپخانې ګولۍ او د هوایي دفاع مداخله کوونکې یا انټرسیپټر وسیلې هم شاملې دي.
تمه کیږي چې دوی به را روانه اونۍ په ایټلي کې د G7 د مشرانو په هغه غونډه کې بیا سره وویني.
د شتمنو هیوادونو دا تنظیم به په غونډه کې پر اوکراین له روسي یرغل وروسته د ماسکو د کنګل شویو شتمنیو پر کارولو بحث کوي او له اوکراین سره به د 50 ارب ډالرو مرسته اعلانوي.
د فرانس ولسمشر امانویل مېکرون هم د جون پر شپږمه اعلان وکړ چې له اوکراین سره د مرستو په لړ کې کیف ته 2000 جنګي جټ الوتکې ورکوي. مکرون وویل، "سبا به خپله نوې پوځي مرسته پيلوو او د اوکراین پیلوټان به په فران کې وروزو".
مېکرین وویل د جمعې په ورځ به دی هم د اوکراین له ولسمشر سره وویني او هغه ته به ووايي چې د اوکرایني پیلوټانو روزنه به په اوړي کې پيل شي، وایي معمولاً د اوکرایني پیلوټان د روزنې لپاره پینځو یا شپږو میاشتو ته اړتیا لري.
صدر زلنسکي تېره میاشت رویټرز خبري ایجنسۍ ته ویلي وو چې لوېدیځ هیوادونه له اوکراین سره د پوځي مرستې په برخه کې پریکړې کولو باندې ډېر وخت لګوي.
بایډن د پنجشنبې- زیارت په ورځ د فرانس په نورمانډي ښار کې په خپلو خبرو کې وویل، د ظلم خلاف دویمه نړیواله جګړه او له روس سره د اوکراین جګړه له یو بل سره تړلې دي او د روس ولسمشر ولادیمیر پوټین یې یو "آمر یا ډیکټېټر" وباله.
د نېټو عمومي مشر ین سټولټنبرګ وایي، پر اوکراین د روس له پوځي یرغل وروسته د نېټو زیات شمیر غړي هیوادونه کیف ته وسلې ورکوي خو اوکراین ته د ځواکونو د لېږلو هیڅ پلان نه لري.
د تېر می میاشتې پر 10مه چې روسي پوځ د اوکراین پر خارکیف سیمه بریدونه پیل کړي او یو شمېر کلي یې نیولي دي، کیف د خپلې دې سیمې د دفاع لپاره مبارزه کوي او له لوېدیځو هېوادونو پرله پسې د وسلو غوښتنه کوي.
صدر بایډن تېره اونۍ خپله پالیسي بدل کړ او پرېکړه یې وکړه چې اوکراین کولای شي د امریکې ورکړې وسلې په روس کې دننه د خپلو هغو دفاعي پوځي هدفونو د ویشتلو لپاره وکاروي چې پر خارکیف د برید ملاتړ کوي.
د امریکې د ملي امنیت مرستیال سلاکار جون فاینر د پنجشنبې- زیارت په ورځ په واشنګټن کې وویل، امریکا هڅه کوي د اوکراین د وسلو اړتیاوې پوره کړي، خو له امریکا سره د وسلو د منتقلۍ کمی دی.
ښاغلي فاینر د «سنټر فار نیو امېریکن سیکیورټي» په نوم ادارې یوې غونډې ته وویل، "که دوه داسې شیان وي چې د جګړې د لوري بدلولو لپاره یې اوکراینیانو ته ورکړو هغه به د توپخانې ګولۍ او د هوایي دفاع سیسټم وي".
جون فاینر وویل، د روس او اوکراین د مخامخ جګړې له ډګره بهر هم دا جګړه "زموږ [د وسلو] په کارخانو کې یوه تر سره کېدونکې سیالي ده، د یورپ په فیکټریو کې او د اوکراین په فیکټریو کې."
د نړیوال اقتصاد لپاره د امریکې د ملي امنیت مرستیال دلیپ سینګ هم دې غونډې ته په وینا کې وویل، د روس د کنګل شویو شتمنیو په اړه د G-7 په غونډه کې اتفاق ته رسېدل یوه پېچلې مسئله ده.
Forum