شهباز شریف بل ګیټس ته ویلي د پولیو  مامورینو د تحفظ لپاره به ریاست ټولې وسېلې پکار راولي

د پاکستان وزیر اعظم شهباز شریف ویلي ملک نه د پولیو ناروغۍ نوغی ویستل د ده دحکومت وړومبۍ ترجیح ده اؤ د پولیو د مخنیوي د مامورینو تحفظ لپاره به ریاست ټولې وسېلې پکار راولي.

هغه دا ګیټس فاونډیشن د مشر بل ګیټس سره لیدنه کې دا خبره په داسې حال کې کړې ده چې سږکال هم په شپږو میاشتو کې د پاکستان دننه د پولیو پینځه پېښې مخې ته راغلي دي.

وزیراعظم شهباز شریف د ګل په ورځ بل ګیټس سره لیدنه کې هغه ته باور ورکړی چې د پولیو د له مینځه وړلو لپاره د روانو هلو ځلو څارنه به پخپله کوي.

بل ګیټس دا مهال د پاکستان په سفر دی اؤ‌ هغه ته ددې سفر بلنه ‍ ښاغلي شهباز شریف ریاض کې روان کال د نړیوال اقتصادي فورم د ترسره شوې غونډې په موقعه ورکړې وه.

د وزیراعظم د دفتر نه د خپور شوي بیان له مخې بل ګیټس سره لیدنه کې وزیراعظم هغه په ډیجیټل مالیاتي خدماتو کې د شوؤ پرمختګونو، روغتیایي اسانتیاؤ ته لاسرسي کې د رامنځته شوي غوره والي اؤ دپولیو ختمولو لپاره د حکومتي هڅو په بابله خبرتیا ورکړې ده.

وزیراعظم ویلي د پاکستان د حکومت اؤ ګیټس فاونډیشن په وړاندې زیات اهداف پراته دي
چې هغې کې صنفي‌ پوپیر ختمول، روغتیایي اسانیو ته لاسرسي کې ښه والی راوستل،غذایي تحفظ ښه کول د اقلیمي بدلون په حواله موافقت اؤ مالیاتي شمولیت شامل دي.

بیان وایي چې په دې لیدنه کې بل ګیټس پاکستان نه د پولیو ختمولو په لړ کې حکومتي هڅې اؤ د وزیراعظم ذاتي خوښي وستایله اؤ د هغه مننه یې وکړه.

بل ګیټس ووی چې د پرله پسې ویکسن اؤ د حکومت د کلک عزم سره به د پولیو د ختمولو کمپاین کې غوره والی رامنځته شي.

د روان کال په اوږدو کې په پاکستان کې د پولیو پینځه پېښې مخې ته راغلي دي اؤ پروسکال پاکستان نه د پولیو شپږ پېښې رپورټ شوې وې.

په نړۍ کې پاکستان اؤ افغانستان هغه دوه یوازیني هیوادونه پاتې شوي دي چې د پولیو وایرس پکې شتون لري .

خو په پاکستان کې بیا د پولیو د کمپاینونو مخې ته د تندلارو سخت مقاومت هم خنډان راولاړوي اؤ وخت په وخت پاکستان کې د پولیو ډلې د تندلارو د بریدونو ښکار کیږي.

د خېبرپښتونخوا د ترهګرۍ ضد څانګې (سي ټي ډي) د رپورټ له مخې، خېبر پښتونخوا صوبه کې سږ کال د پولیو ضد ټیمونو باندې په ترسره شوؤ 15 بریدونو کې 13 پولیس عسکر وژل شوي دي

په پوليو ضد ټيمونو د ترسره شوؤ بريدونو په اړه د خيبر پښتونخوا د ترهګرۍ ضد څانګې لخوا روانه میاشت کې د خپور کړل شوي رپورټ شمېرې ښیي چې په دې بریدونو کې 36 پولیس عسکر ژوبل شوي هم دي.