نړيوالې مالياتي ادارې [ايي اېم اېف] امکان څرګند کړی چې په جنېوا کې د نړيوال ماحولياتي ريزيلینټ کانفرنس کې د پاکستان وزیر خزانه اسحاق ډار سره يې ملاقات وشي او پاکستان ته د پور پروګرام کی په ستونزو بحث وکړی شي.
اقتصادی پوهان خوشبينه دي چې مالیاتي اداره به د پاکستان د پور پروګرام بحال کړي او اداره به ونه غواړي چې پاکستان دیوالیه کېدو ته لاړ شي.
د پاکستان وزیر اعظم شهباز شریف له دې وړاندې ویلی وو د ایي ایم اېف سره شوي ټول شرطونه به عملي کوي.
په جنېوا کې د تابيه شوی نړيوال کانفرنس مقصد په پاکستان کې د کال 2022 د سیلابونو له وجې د اغېزمنو شوو خلکو مرستې کول دي.
د اقتصاد ماهر پروفېسر ډاکټر ذلاکت خان وایي مالياتي ادارې له دې وړاندې پاکستان ته شرطونه ایښودي وو او حکومت دغه شرطونه پوره کوي نو امکان لری د پور پروګرام بحال شي.
"ايي ايم اېف به دا نه غواړي چې د پاکستان اقتصاد دیوالیه کیدو ته لاړ شي ايي اېم اېف غوښتي چې پاکستان خپل امدن سېوا کړي او ټيکسونه ولګوي، د توانایۍ بیعې زیاتې کړي او خپلې خسارې راکمې کړي".
په کال 2019 کی د پاکستان حکومت د ایي ایم ایف سره د شپږ اربه ډالرو د پور لوظنامه لاس لیک کړې وه خو تیر کال دا لوظنامه د شپږ اربه ډالرو نه 7 اربه ډالرو ته غځول شوې ده.
د پاکستان مرکزي بېنک وايي، دا وخت د بېنک سره 4.5 اربه ډالره غېر ملکي زرمبادله موجوده ده چې د اقتصاد پوهانو په وینا د درېو اوونیو برابره ده او پاکستان په فوری توګه اته اربه ډالره ته اړتیا لري چې په روان کال 2023 کې د غېر ملکي قرضو واپسي وکړي.
اقتصاد پوهه پروفېسر ډاکټر معراج الحق وي او اې ډيوه سره په خبرو کې وويل، دا وخت پاکستان د سختو اقتصادي ستونزو سره مخ دی او د ايي ایم اېف پروګرام ته اړتیا لري ځکه چې د مالیاتي ادارې د پروګرام د بحالۍ وروسته به د پاکستان دوست هېوادونه او مالياتي ادارې پاکستان ته فنډونه ورکړي.
"د نورو مالیاتي ادارو او هیوادونو مالي مرستې د ايي ايم اېف د پروګرام سره تړلي دي که دا پروګرام بحال شي نو د پاکستان په اقتصادي ستونزو کې به کمی راشي".
اقتصادی پوهان وایي تېر کال د جون د میاشتې راهسې په ملک کې د راغلو سېلابونو له امله د پاکستان اقتصاد ته په غټه کچه تاوان اوړېدلی دی.
د حکومتي شمېرو ترمخه په مجموعي توګه د 30 اربه ډالره نه زیات تاوان شوی د سېلابونو او پاکستانۍ روپۍ د قدر د کمي له امله ګراني زیاته شوې او د عام ولس په ژوند بدې اغېزې شوي دي.
د ملګرو ملتونو او پاکستان په مرسته په جنیوا کې په پاکستان کې د سیلابونو له امله د شوي تاوان د بيا ابادکارۍ دپاره نړيوال ریزیلینټ کانفرنس هم روان دی او پاکستان هيله څرګنده کړې د نړيوال کانفرنس څخه به پاکستان ته اته اربه ډالره مرستې ترلاسه شي.
له دې وړاندې ملګرو ملتونو پاکستان کې د سېلاب ځپلو دپاره د 816 ملينه ډالرو د مرستو اپيل کړی خو ورته يواځې 200 ملينه ډالره امداد ترلاسه شوی وو.
