واشنګټن —
د متحده قامونو د خوراک او زراعت د څانګې مشر رين پالسن ويلي کليوال افغانستان د بد حالت سره مخ دی چې خلک په کې د لوږې او د غذا د کمي ښکار دي.
رين پالسن د افغانستان د سفر نه بيرته تللی او د وي او ای سره په يوه مرکه کې يې ويلي د خوراک د ضروري توکو کمی دی، د ګروندګرو سره د تخم بندوبست نشته چې فصلونه وکري او د څاروو ساتلو د پاره خلکو ته د ګيا هم ضرورت دی.
د متحده قامونو د خوراک ادارې دې اوونۍ ويلي د افغانستان د خوراک د کمي پوره کولو دپاره په اجله توګه کم نه کم 800 ميلين ډالر پکار دي ځکه چې ناشونې لوږه په افغانانو راروانه ده.
پالسن وايي د اجلو ضرورتونو د پوره کولو سره سره د افغانستان د زراعت به هم مرسته کول پکار وي چې خلک وکړی شي ځان ته د خوراک بندوبست وکړي او دا د روان کمي د کمولو غوره لاره هم ده.
هغه ويلي د دوی لخوا روان کارونه افغانو ښځو ته نېغ په نېغه او په واسطه ګټې رسوي او په خاصه توګه هغې کورنيو ته يې ډېر حاجت دی چې مشري يې ښځې کوي.
پالسن وايي ډېره ابادي د يو ناورين سره مخ ده او کليوال ژوند خو ممکن دی چې بېخي په ځای ودرېږي ځکه چې تېرول يې ډېر ګران شوي. ژمی خو تېر شو چې سخت هم و خو که موسم ښه شوی هم دی نزدې شل ميلين افغانان د خوراک د غټ کمي ښکار دي چې د افغانستان د ابادۍ 46% برخه جوړوي.
هغه وايي اداره يې کروندګرو ته تخمونه، سره او زميدارو ته تربيه ورکوي چې ډېرې کورنۍ د دې جوګه شي خپل خوراک پخپله پيدا کړي.
د غنمو د پيکېج سره د اوو کسانو کورنۍ خپل خوراک پخپله پيدا کولی شي او د يوې کورنۍ د يو کال د غذايت پوره د پاره 220 ډالر پکار دي چې د بې وزله زميدارو او غريبو کورنيو مدد پرې وکړی شي.
یادونه: د دې خبر معلومات پالسن سره د وي او ای اشنا څانګې د خبریالې شایسته سادات لامع سکایپ دلارې شوي مرکې نه اخیستل شوي
