غزه کې د تېرې شپې راهسې ځمکنۍ جګړه او هوايي بریدونه روان دي

په غزه کې د تېرې شپې راهسې د اسرایلي ځواکونو او حماس وسله والو تر منځه ځمکنۍ جګړه روانه ده او د غزه تر ټولو لوې هسپتال شفا روغتون مشر محمد ابو سلمیه تېره ورځ ویلي، اسرایلي عسکر د دغه روغتون نه تاو شوي.

د اسرایل پوځ بیا تېره ورځ ویلي دوي به نن د اتوار/ یکشنبې په ورځ د دغه هسپتال نه کوچني ماشومانو په ویستو کې مرسته کوي. په دغه روغتون کې لویه بشري ستونزه رامنځ ته شوې. د اسرایل د پوځ ویاند ډېنیل هګاري تېره ورځ ویلي ٫٫ مونږ به دغلته پکار مرستو ورکولو کې کمک کوو.٬٬

په دغه ورغتون کې دوه ماشومان د خالي/ شنبې په ورځ مړه شوي او که د جنریټر لپاره پکار تېل ختمیږي نو د ګڼو نورو ماشومانو ژوند د خطر سره مخامخ کېداې شي.

د روغتون مشرپه ټېلیفون د خبرو په وخت ویلي، ٫٫ په روغتون کې ټول طبي اوزار ودریدلي او د مرګوني حالت ناروغانو مړه کیږي.٬٬ کله چې دغه ډاکټر دغه خبرې کولې نو تر شا یې د ډزو او چاودنو اوازونه اوریدل کیدل. تر اوسه دا نه دغه معلومه چې د شپې شوې جګړې د لاسه به د وړو ماشومانو د ویستلو په پلان کوم اثر شوی وي او که نه.

د اسرایل وزیراعظم بنجمن نیتن یاهو یو ځلې بیا د جنګ بندۍ غږونه رد کړي، نوموړي ویلي هغه ډزبندي به نه کوي چې پکې د اکتوبر په ۷مه نېټه د حماس وسله والو لخوا تښتول شوي اسرایلیانو د خوشي کیدو خبره نه وي.

بې پولې ډاکټرانو ویلي په غزه کې هسپتالونه د ٫٫ بې رحمه بمبارۍ٬٬ سره مخ دي. د ادارې تر مخه د غزه الشفا هسپتال څو وارې په نخښه شوی چې پکې د ماشومانو د پېداېش څانګه او د عامو ناروغانو څانګه شامله ده. د ادارې تر مخه په دغه بریدونو کې ګڼ شمېر ناروغان وژل شوي.

د اسرایل وزیراعظم بنجمن نیتن یاهو دا خیال رد کړی چې کله د حماس او اسرایل جګړه ختمه شي نو د غزه واک دې فلسطیني ادارې ته حواله کړی شي. د اسرایلي وزیراعظم دغه خبره د امریکا صدر جو باېډن د انتظامیې د دریځ سره په ټکر کې ده.

د خالي/ شنبې په ورځ په یو خبري کانفرنس کې چې کله د نیتن یاهو نه د غزه واک فلسطیني انتظامیې ته ورکولو په اړه پوښتنه وشوه نو نوموړي ووېل، ٫٫ هلته به نور څه وي،٬. فلسطیني انتظامیه د غربي غاړې کنټرول لري. د اسرایل وزیراعظم زیاته کړې، ٫٫ هلته به داسې انتظامیه نه وي چې خپلو ماشومانو ته د اسرایل نه کرکه ورښایي، ورته ښايي چې اسرایلیان مړه کړۍ او یا د اسرایل ریاست د منځه یوسۍ.٬٬

اسرایلي ځواکونو د خالي/ شنبې په ورځ د الشفا روغتون بهر د حماس د وسله والو سره جګړه هم کړې، په دغه روغتون کې په زرګونو ناروغان، د هسپتال عمله او عامو خلکو پناه اخستې. د روغتون مشر ویلي، اسرایلي ځواکونه د هسپتال بهر او دننه چې څوک ویني پرې ډزې کوي او د ودانیو تر منځه د خلکو تګ راتګ هم نه پرېږدي.

د اسرایل یو پوځي افسر کرنل مووش ټېټرو هم د هسپتال بهر د جکړې پخلی کړی خو دا خبره یې رد کړې چې په هسپتال نیغ په نیغه برید شوی. نوموړي ویلي چې هغه د هسپتال د مشر سره په رابطه کې دی او ورته یې وړاندېز کړی چې څوک د هسپتال د شرقي غاړې نه وتل غواړي نو دوي یې مرستې کولی شي.

د اسرایل پوځ افسران تور لګوي چې حماس وسله والې ډلې د هسپتال لاندې جوړ شوي سرنګونو کې وسله پټه کړې او دغلته یې د جګړې چلولو یو مرکز هم دی. ځکه دغه ودانۍ د پوځ د عملیاتو مرکز ګرځېدلی. خو د هسپتال کارکونکي او حماس ډله دغه خبره ردوي.

د اسرایل دفاعي ځواکونو د جمعې په ورځ په الشفا روغتون د ډزو تور رد کړی او په حماس یې تور لګولی چې دغه ډلې په اسرایلي ځواکونو یې راکټي برید کوو چې پرې دغه روغتون په نخښه شو.