په هندوستان کې روان د کرکټ نړیوال کپ ۳۹ لوبو وروسته د هندوستان، سویلي افریقا او اسټریلیا لوبډلې سېمي فاېنل ته رسیدلي او د نیوزي لېنډ، پاکستان او افغانستان لوبډلې لا هم سیمې فاېنل ته د رسېدو په زغل کې شاملې دي.
د ايي سي سي لخوا جاري شوو تازه شمېرو تر مخه دا مهال د نمرو په فهرست (پواېنټ ټېبل) هندوستان ۱۶ او سویلي افریقا او اسټریلیا ۱۲، ۱۲ پواېنټونه لري او درې واړه سېمي فاېنل ته وتلي دي. د سېمي فاېنل نه مخکې لا هم ۶ نورې لوبې پاتې دي خو په دغو کې تر ټولو مهمې لوبې د نیوزي لېنډ، پاکستان او افغانستان هغه دي، ځکه دغه به د سیمي فاېنل د څلورم ټیم/ لوبډلې فیصله کوي.
دا درې واړه هیوادونه په پواېنټ ټېبل ۸، ۸ پواېنټونه لري خو د (رن رېټ) رنزونوپه حساب نیوزي لېنډ وړومبی، ورپسې پاکستان او بیا افغانستان دی. نیوزيلېنډ خپله راتلونکې او اخېرۍ لوبه د سري لنکا سره لري، پاکستان به په اخېرۍ او مهمه لوبه کې انګلېنډ ته مخامخ کیږي او د جمعې په ورځ به افغانستان او سویلي افریقا د یو بل پرضد لوبیږي.
هڅې خو په میډیا او ټولنیزو رسنیو بلا بحثونه روان او قسما قسم اندازې لګول کیږي، خو د ايي سي سي د شمېرو تر مخه نیوزي لېنډ، پاکستان او د افغانستان لوبډلو کې سېمي فاېنل ته د وتلو لپاره مهمه خبره د خپلو اخیرۍ لوبو ګټل دي. که چرې درې واړه خپلې لوبې ګټي پواېنټونه به یې یو شان کیږي او فیصله به په رن رېټ کیږي.
که د زیارت/ پنجشنبې په ورځ نیوزيلېنډ د سري لنکا نه خپله لوبه یواځې په یوه منډه هم وګټي نو د موجوده رن رېټ په حساب به سیمي فاېنل ته ووځي.
افغانستان تېره شپه د اسټریلیا نه د لوبې باېللو وروسته سیمي فاېنل ته د تلو یو اسان چانس د لاسه ورکړی او د جمعې په ورځ یې د سویلي افریقا سره د روان جام اخیرۍ لوبه ده. خو افغانستان یواځې د دغه لوبې په ګټلو سیمي فاېنل ته نه شي وتلی، افغانستان له به سویلي افریقا ته لویه ماتې ورکول وي چې رن رېټ یې د پاکستان او نیوزيلېند نه مخکې شي.
د خالي / شنبې په ورځ به بیا پاکستان او انګلېنډ خپل اخیري مېچ کې یو بل ته مخامخ کیږي، خو یواځې د لوبې په ګټلو پاکستان سیمي فاېنل ته نه شي وتلی، پاکستان له به انګلېنډ ته په ۱۳۰ منډو / رنزونو ماتې ورکول وي چې رن رېټ د نیوزي لېنډ نه ښه کړي او سیمي فاېنل ته ووځي.
دا ټول حساب کتاب به د دې دریو واړو لوبډلو د منجمنټ لخوا هم شوی وي او لوبغاړو ته به هم دغه ټول حساب ورکړل شوي وي. خو د کرکټ لوبه د دې حساب کتاب نه زیاته په میدان کیږي. هغه میدان چې پکې یوه قوي لوبډله لکه د شګو دیوال او کله کله بیا یو څو لوبغاړي لوبه په بله واړوي.
Forum