د اسلام اباد هايکورټ د سايفر قضيه کې د پخواني وزیراعظم او پاکستان تحریک انصاف ګوند د مشر د ضمانت او مقدمې خارجولو خواستونه رد کړي دي.
د ځايي رسنيو ترمخه، د اسلام اباد هايکورټ چيف جسټس عامر فاروق د عمران خان په خواستونو په 16م اکتوبر کړې فېصله د جمعې په ورځ اورولې ده.
ويل شوي په يادو خواستونو د تېر ګل/ دوشنبې په ورځ هايکورټ فېصله محفوظ کړې وه.
عمران خان ته اسلام اباد هايکورټ د اګست په میاشت کې د توشه خانې په قضيه کې ضمانت ورکړی خو په هغه د سايفر ترڅنګ، د القادر ټرسټ او نهمې مقدمې روانې وې او په جېل کې ساتل شوی وو.
نوموړی دا وخت د سايفر په قضيه کې په عدالتي ريمانډ د پېنډۍ په اډياله جېل کې بندي دی.
د افيشل سيکرټ لاندې جوړ خصوصي عدالت په 23م ستمبر د سايفر قضيه کې په عمران خان او شاه محمود قرېشي فرد جرم لګولی خو هغو د صحت جرم نه انکار کړی وو.
عمران خان تېر کال د اپرېل په مياشت کې د بې باورۍ د تحریک د لارې د وزيراعظمۍ څخه لرې کړی شوی، نوموړي هغه وخت تور لګولی وو چې د سايفر يا مراسلې د لارې "د هغه حکومت د امريکې په سازش" لرې کړی شوی وو.
امريکې، د پاکستان پوځ او د پاکستان تېر حکومت د عمران خان دغه تور څو ځله رد کړی چې ګنې هغه د امریکې په سازش لرې کړی شوی وو.
عمران خان د سایفر د لارې د امریکايي سازش د لومړي بيان وروسته په يو بل بيان کې ويلي وو سازش په اصل کې د دلته [پاکستان] نه شوی وو.
د تېرې جولايۍ په میاشت کې د عمران خان د پخواني پرنسپل سيکرټري اعظم خان د سايفر په حواله یو مبينه بيان په مطبوعاتو خپور شوی وو.
هغه ويلي وو، "عمران خان د سیاسي ګټو دپاره د سايفر يا بهرنۍ مراسلې ډرامه جوړه کړې او د سايفر د لارې یې د قامي امنيتي ادارو او ولس ترمنځه د کرکې خورولوهڅه کړې ده".
د شهباز شریف په وزيراعظمۍ د پاکستان تېر اتحادي حکومت د سايفر قضيې پلټنې پېل کړې وې.
د سايفر قضيه د عمران خان، شاه محمود قرېشي او اسدعمر پرضد جوړه شوې وه.
Forum