د هند وزیراعظم نریندرا مودي د خالي یا شنبې په ورځ د ایران صدر حسن روحاني سره د امنیت، سوداګرۍ او انرژۍ په برخه کې تر سختو خبرو وروسته په خپلو کې نهه تړونونه لاسلیک کړل.
د هندوستان د هندو ورځپاڼې د راپور له مخې، پدغو تړونونو کې د دوه اړخیز ټېکس (ډبل ټکسیشن) مخنیوی هم شامل دی. دواړو خواوو په خپلو خبرو کې په یو شمېر سیمیزو حالاتو هم بحث کړی.
د هند د بهرنیو چارو د وزارت ویاند راویش کومار په خپلې ټوېټر پاڼې باندې لیکلي دي: ٫٫ دواړو مشرانو د سوداګرۍ، پانګونې، انرژۍ، ارتباطاتو، دفاعي، امنیتي او د یو شمېر سیمیزو مسلو په اړه مهمې او ګټورې خبرې وکړې.٬٬
ښاغلي مودي له روحاني سره د یوې ګډې خبري غونډې پرمهال وویلي، هند ته د ایران د ولسمشر له سفر څخه څرګندیږي چې دواړه خواوې غواړي په مهمو برخو کې سره همکاري وکړي.
د ایران صدر حسن روحاني وویل، هند او ایران له ترهګرۍ سره د مبارزې په برخه کې یو ډول دریځ لري. ٫٫ مونږ د ترهګرۍ او توندلاریتوب په وړاندې جګړه کې ژمن یو.٬٬
ایراني مشر همدرانګه وویلي، چې سیمیزې شخړې باید د ډپلوماسۍ او سیاسي لارو څخه حل شي. د هند لومړي وزیر د سټراټیژيک چابهار بندر په برخه کې د ایراني مشر لخوا د غوره مدیریت ستاینه وکړه.
د هند لومړي وزیر دا هم وویل چې دوی له ترهګرۍ او د نشي توکو د قاچاقو له مسلې څخه د ورپېښو ګواښونو په اړه هم سره غږېدلي دي.
