د ایران په ساحلي ښار بوشهر کې د هېواد یوازنۍ اېټمي توانايي مرکز په ناڅاپې ډول تړل شوی دی.
د وي او ای د اردو څانګې په رپورټ کې وېل شوي د اېټمي مرکز په بیړني ډول د بندېدو خبر د ایران حکومتي ټېلې وژن ورکړی. دغه مرکز په کال ۲۰۱۱ کې د روس په مرسته پرانېستل شوی و.
اېسوسي اېټېډپرېس خبري ادارې ویلي توانیر نومې د بجلۍ حکومتي کمپنۍ یو چارواکي غلام علي رخشاني مهر د اتوار، يکشنبې، په ورځ په یو پروګرام کې وویل د بوشهر د اېټمي مرکز د تړل کېدو عمل د خالي، شنبې، په ورځ شروع شوی و او درې څلور ورځې نور دوام لرلی شي.
ښاغلي مهر د اېټمي مرکز د بندېدو سبب څرګند نکړو خو ویې وېل په نتیجه کې د بجلۍ رسد معطل کېدلی شي.
د دې نه وړاندې توانیر په یو بیان کې ویلي وو چې د بوشهر د اېټمي مرکز د بحالۍ کار دوام لري او د جمعې د ورځ پورې به سر ته ورسول شي.
د رپورټ ترمخه د ایټمي چارو یو ایراني چارواکي د مارچ په میاشت کې ویلي وو چې اېټمي مرکز پرېښودلی شي ځکه چې په ایران د امریکې د کال ۲۰۱۸ پابندیو له امله د اېټمي مرکز دپاره د روس نه سامان نشي اخیستل کېدی.
د ای پي د رپورټ ترمخه د بوشهر اېټمي مرکز دپاره یورېنیم د روس نه اخیستل کېږي او د دې عمل نګراني د ملګرو ملتونو د اېټمي توانايی اداره ايي ای ايي ای کوي.
ای پي وویل د ملګرو ملتونو د اېټمي توانايي اداره د بوشهر د اېټمي مرکز د بندیدو نه خبر وه خو په دې اړه یې څه وېلو نه ډډه وکړه.
د امریکې پخواني صدر ډانلډ ټرمپ په کال ۲۰۱۸ کې په ایران اقتصادي بندیزونه بیا په ځای کړل او ملک یې د ایران اېټمي معاهدې نه ووېستلو. د هغه دریځ و چې معاهده د وسلو په تکل کې د ایران مخه نه نیسي خو ایران وايي اېټمي پروګرام یې د پرامنه مقاصدو دپاره دی.
ډانلډ ټرمپ چانشین او د امریکې موجوده صدر جوبایډن حکومت ایران سره د اېټمي معاهدې د بحالۍ دپاره په غېر مستقیم ډول خبرې شروع کړي دي.