پاکستان کې د پي اېس اېل پاکستان سپر ليګ نهم په روانو مقابلو کې د اسلام اباد يونايټډ لوبډلې کوټه ګلېډي اېټرز ته په 39 رنزونو ماتې ورکړې او د کوټې لوبډله یې د ټورنامنټ څخه بهر کړې ده.
د شپږو لوبډلو په پي اېس اېل کې د ملتان سلطان لوبډله د وړاندې نه پايلوبې يا فاينل ته رسېدلې ده، نن به د اسلام اباد لوبډله پېښور زلمي ته مخامخ کيږي، کومه لوبډله چې نننۍ سيالي وګټي، پايلوبې ته به ورسي او په فاينل کې به د ملتان سلطان لوبډلې ته مخامخ کيږي.
د اسلام اباد يونايټډ او کوټه ګلېډي اېټرز د تېرې شپې لوبه کې د اسلام اباد لوبډلې لمړی بېټګ کړی او په ټاکلو 20 اوورونو کې یې په نهه لوبغاړو اوټ کېدو 174 رنزونه جوړ کړي وو.
د اسلام اباد لوبډلې دوه لوبغاړي په يو، يو رنز او دوه بیا په صفر، صفر اوټ شوي وو.
په ځواب کې د کوټه ګلېډي اېټرز ټوله لوبډله په 19م اوور کې په 135 رنزونو اوټ شوې او مقابله یې بايللې ده.
د کوټې په لوبډله کې عمېر يوسف زيات 50 رنزونه جوړ کړي خو دوه لوبغاړی یې په صفر، دوه په يو، يو رنز، درې په پينځه پينځه او يو په شپږو رنزونو اوټ شوی وو.
له دې وړاندې په کواليفاير سيالۍ کې ملتان سلطان د پېښور زلمي لوبډلې ته ماتې ورکړې او فاينل ته رسېدلې ده.
تېره شپه په لمړي ايليمينېټر کې اسلام اباد يونايټډ د کوټه ګلېډي اېټرز ته ماتې ورکړې او نن به په دويم ايليمينېټر کې د اسلام اباد او پېښور لوبډلې مخامخ کيږي.
د نننۍ لوبې ګټونکې لوبډله به په 18م مارچ پايلوبه کې د ملتان سلطان سره مخامخ کيږي.
Forum