لاس رسیدونکی لینک

تازه خبر

اسرايل رفح پله پرمخ تګ کړی، امریکا ویلي د ملکي خلکو خوندي کولو هیڅ پلان نشته


د اسرايل پوځ د غزې جنوبي ښار رفح پله پرمخ تګ کړی او د اتوار/ يکشنبې په ورځ د امریکې د بهرنيو چارو وزير انتني بلينکن ویلي، اسرایل امریکې ته د ‏يو ميلين څخه زياتو ملکي فلسطينيانو د خونديتوب دپاره د باور وړ پلان نه دی ورکړی.‏

د اسرايل پوځ مياشتې وړاندې د ‏‎1.3‎‏ ميلينو څخه خواوشا ‏‎300,000‎‏ فلسطينيانو ته په حماس د حملو څخه بچ کېدو دپاره د جنوبي غزې څخه وتلو ويلي او ‏دوی تښتېدلي وو، اوس ورته بيا د وتلو ویل شوي چې د غزې شمال لويديځ کې د غزې د بحېره روم ساحل پله لاړ شي.‏

د امریکې د بهرنيو چارو وزير انتني بلينکن د اتوار په ورځ د ( اېن بي سي په ميټ دې پرېس) پروګرام کې ویلي، د فلسطينيانو د خوندي کولو دپاره د ‏اسرايل سره هیڅ ځانګړی پلان نشته او نه دا چې بشري مرستې ورته ورسوي.‏
هغه ويلي، "د دې نه علاوه مهمه خبره دا ده چې مونږ داسې پلان هم نه دی ليدلی چې په کومه ورځ د غزې جګړه پای ته ورسي د هغې وروسته به څه کيږي. او ‏دا وخت چې اسرايل په کوم رفتار روان دی په رفح کې به درانه عمليات وکړي خو بيا به هم د حماس د زرګونو په شمېره کې وسله وال پاتې شي".‏

نوموړي ویلي، "مونږ د شمال او تر دې چې د خان يونس په علاقو کې ليدلي، کومې چې اسرایل پاکې ګرځولي هلته حماس بيرته راغلي دي".‏
بلينکن زياته کړې،"دا وخت اسرایل ته رفح ته روان دی، تر دې چې د پاتې څلورو بټاليونه سره مخامخ شي، خو په ځانګړي توګه د ملکي خلکو دپاره پلان ‏نشته، ملکي خلکو ته د تاوان رسېدو او د مسلې نه حل کېدو خطر دی، هغه مسله چې مونږ دواړه یې هوارول غواړو چې حماس بيا په غزه حکومت ونه ‏کړي".‏

امریکا، اسرايل ته تر ټولو زياته وسله ورکوي، ورسره اسرایل ته بيا بیا خبرداری ورکوي او په رفح کې د بشپړو ځمکنو عملياتو مخالفت کوي خو د اسرايل ‏دفاعي ځواکونه په رفح هوايي بمباري کوي او په محدوده کچه ځمکني عمليات یې هم دوامداره ساتلي دي.‏

د امريکې صدر جوبايډن اسرايل ته د ‏‎3,500‎‏ (‏‎227‎‏ او ‏‎907‎‏ کیلوګرامه بمونو) ورکول ځنډولي د دې ويرې چې اسرايل به یې په رفح کې وکاروي.‏ صدر بايډن تېره اوونۍ ويلي وو که اسرايل په رفح بشپړ عمليات کوي امریکا ورته ځينې جارحانه وسلې لېږل هم ودروي.‏

اسرايل د حماس سره د ‏‎100‎‏ پورې يرغماليانو د خوشي کولو دپاره خبرې کوي خو د اسرایل وزيراعظم بين يامين نېتن بيا بيا وايي په رفح کې د حماس د ‏خاتمې پورې به جګړه نه ودروي.‏
بلينکن د ګډوډۍ خبرداری ورکړی او ويلي یې دي، "اسرايل په ممکنه توګه په لاره دی چې د حماس ګڼ وسله وال ورته د بغاوت په ميراث کې پاتې شي او ‏که خلا پاتې کوي په ممکنه توګه دغه د ګډوډی خلا به حماس ډکه کړي. مونږ ورسره په دواړو، غزه او سيمه کې د تلپاتې نتيجې او د تلپاتې امنیت خبرې ‏کړي دي".‏

بلينکن ويلي، " د دې پای ته رسېدو دپاره چټکه لاره د حماس سره ده چې يرغماليان پرېږدي. مونږ به جنګ بندۍ ته ورسو مونږ ترې ډېر څه ترلاسه کولی ‏شو، مختلف ټيمونه خبرو ته دوام ورکوي. دا به غوره لاره هم وي چې مونږ بشري مرستې سېوا کړو او د غزې خلک خوندي کړو. حماس په دې کې دلچسپي ‏لري خو کړنې یې برعکس دي".‏
د اتوار په ورځ د غزې په اړه د امریکا په پاليسيانو د امریکې سیاست مدار وېشلي ليدل شوي.‏
ازاد سېنېټر برني سېنډر چې د اسرایل په جګړه د ډېموکرېټ اپوزيشن پلويتوب کوي، اېن بي سي ته یې ويلي، اسرايل بايد "د امریکې لخوا نورې پوځي ‏مرستې ترلاسه نه کړي، اسرايل د فلسطيني خلکو ضد جګړې ته تللی او نتيجې به یې ويجاړونکې وي".‏

ريپبلکن سېنېټر لنډسی ګراهم د اسرايل حماس جګړه د دویمې نړيوالې جګړې سره پرتله کړې، هغه اېن بي سي ته ويلي، "مونږ په ناګاساکي او هیروشيما ‏دوه ايټمي بمونه ولې وغورځول؟، د جګړې ختمولو دپاره مونږ ماتې نه شو ترلاسه کولی، دا سمه پرېکړه وه، اسرايل دې هر هغه څه وکړي چې يو يهودي ‏رياست ژوندی پاتې شي".‏
اسرايل د رفح د بريدونو ترڅنګ د غزې په شمال کې د جباليه کډوالو کېمپ او نورو سیمو باندې بمباري کړې ده. ویل کيږی سيمه په پراخه کچه د تباهۍ ‏سره مخ ده کومه چې د اسرايل پوځ د مياشتو راهسې تر ډېره حده پوره جلا کړې ده. ملګرو ملتونو دغلته د بشپړ قحط ويلي دي.‏

ځايي اوسېدونکو ویلي، د اسرايل جنګي الوتکو او توپو په کېمپ او غزې ښار په ختيځ کې د زېتون علاقه په نخښه کړې چرته چې پوځ د يوې اوونۍ څخه ‏د وسله والو سره په جګړه بوخت دی.‏

د اکتوبر په اوومه حماس په اسرايل حمله کړې د اسرايل په وينا ‏‎1200‎‏ کسان يې وژلي او ‏‎250‎‏ یې يرغمال کړي وو، د يادې حملې په ځواب کې اسرايل په ‏غزه کې عمليات پيل کړي، د ‏‎35,000‎‏ نه زيات فلسطينيان پکې وژل شوي چې پکې ملکي خلک او جنګیالي شامل دي.‏
‏( د دې خبر ځينې معلومات د اې پي څخه اخستل شوي).‏

Forum

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG