اسرایل وايي، د ایران لخوا ددوی تر ولکې لاندې د ګولان هایټس (جولان غونډۍ) نومې سیمې باندې د راکټي بریدونو په ځواب کې د دوی جنګي الوتکو د زیارت یا پنجشنبې په ورځ په سوریه کې د ایران پوځي مرکزونه په نښه کړیدي.
د اسرایل پوځ وايي، د دوی په هوايي بریدونو کې استخباراتي مرکزونه، د وسلو زېرمې او لوجیستیکي مرکزونه په نښه شویدي او همدارنګه د سوریې ګڼ فضايي هوايي سیستمونه هم پکې ویجاړ شویدي.
اسرایلو همدارنګه خبرداری ورکړ چې دوی به ایران پرې نږدي چې په سوریه کې کوم ګواښ رامنځ ته کړي او که د سوریې په خاوره کې بیا هم هر څه پېښږي نو مسول به یې په خپله د سوریې حکومت وي.
د اسرایل ددفاع وزیر اوېګډور لېبرمن یوې امنیتي غونډې ته وویل، چې اسرایلو په سوریه کې د ایران نږدې ټول مرکزونه ویشتي دي او زیاتوي چې دی هیله لري چې د جګړې دا فصل پای ومومي او هرڅوک په په دې خبره پوه شي.
ایران د سوریې متحد دی او پوځ یې د ولسمشر بشار الاسد ملاتړ کوي.
روسیه چې د بشار الاسد بل ملاتړ کونکی هېواد دی، له دواړو ایران او اسرایلو څخه د زغم غوښتنه کوي او د فرانسې ولسمشر ایمانوېل مکرون هم د دواړو لوریو ترمنځ د تاوتریخوالي د ختمېدو غوښتنه کړېده.
د سوریې دولتي خبري رسنۍ سنا وايي، د اسرایلو جنګي الوتکو په دفاعي مرکزونو، رادار مرکزونو او د وسلو او مهماتو په زېرمو باندې بریدونه کړیدي او د الوتکو ضد سیستمونه په دې توانیدلي چې په لسګونو اسرایلي توغندي یې هدف ته تر رسېدو مخکې له منځه وړي.
اسرایلو د ایران په القدس ځواک باندې تور پورې کړ چې په ګولان هایټس نومې سیمه کې یې د اسرایلو په پوځي مرکزونو باندې توغندي توغولي وو خو کومه مرګ ژوبله او ویجاړی په کې نه وه رامنځ ته شوی.
