لاس رسیدونکی لینک

Breaking News

وزیراعلا پرویز خټک او په ترهگرۍ تورن کسان په یو سټیج ولې ناست دي؟


د جمیعت علما اسلام د خپلې ډلې مشر مولانا سمیع الحق په مشرۍ کې د مذهبي گوندونو اتحاد دفاع پاکستان د اتوار، یک شنبې، په ورځ په پېښور کې د "تحفظ القدس کانفرنس" احتجاجي غونډه کړې وه

په پېښور کې یو ځل بیا د امریکا پرضد د غیرقانوني تندروه مذهبي ډلو احتجاجي غونډې او هغې ته د خېبر پښتونخوا د واکمن تحریک انصاف منتخت وزیراعلا پرویز خټک وینا ورسته دا پوښتنې کیږي چې آیا په صوبه کې ترهگري کمه وه چې اعلا وزیر د ترهگرو ډلو سره یوځای کښېني؟

د جمیعت علما اسلام د خپلې ډلې مشر مولانا سمیع الحق په مشرۍ کې د مذهبي گوندونو اتحاد دفاع پاکستان د اتوار، یک شنبې، په ورځ په پېښور کې د "تحفظ القدس کانفرنس" احتجاجي غونډه کړې وه.

په غونډه کې پرویز خټک او د جماعت الدعوه یو اهم مشر او د ممبۍ په حملو تورن حافظ عبدالرحمان مکي په یو سټیج (ځای) ناست وو.

د هندوستان په ممبۍ ښار کې د کال ٢٠٠٨ م د حملو په سر امریکې د عبدالرحمان مکي په سر د ٢٠ لکو ډالرو او د گوند د مشر حافظ سعید په سر ١٠ میلینو ډالرو انعامونه اعلان کړې دي.

میډیا او مخالف گوندونه څه وايي؟

ډان ورځپاڼه وايي حافظ سعید هم د پېښور دغه غونډې ته تلونکی و خو د پنجاب حکومت پرې نښودو. نوموړی بیا په ټیلي فون جلسې ته وینا وکړه.

د دفاع پاکستان په غونډه کې د پرویز خټک په گډون د پاکستان د انگریزۍ ژبې ورځپاڼه ډان لیکلي چې دا گام هغه د مذهبي گوندونو د خوشحالولو دپاره واخیستو. ورځپاڼه وايي د سمیع الحق ډلې سره د انتخابی اتحاد ورسته د خېبر پښتونخوا اعلا وزیر پرویزخټک "د مذهبي ډلو، چې پکې ځینې سخت دریځه عناصر هم شامل دي، د خوشحالولو دپاره یو گام نور وړاندې لاړلو."

د صوبې د تعلیم وزیر او د واکمن پاکستان تحریک انصاف گوند عاطف خان ډان ورځپاڼې ته د دفاع پاکستان په جلسه کې د پرویز خټک په شرکت تبصره وه نکړه خو وې ویل پي ټي ايي د دفاع پاکستان کونسل برخه نه ده.

د عوامي نیشنل پارټۍ زاهد خان وویل پرویزخټک په خپل گام نیشنل ایکشن پلان د پښو دلاند کړو چې اشاره یې د ترهگرۍ خلاف د پاکستان تگلارې ته وه چې حکومت پکې د وسله والو ډلو خلاف د اقداماتو لوظ کړی دی.

تحریک انصاف ولې مذهبي گوندونو سره نزدېوالی لري؟

په ټوېټر د پرویزخټک په فیصله بیلا بیلې تبصرې شوې دي.

د "نهاري فېن" په نوم یو تن وویل "هو، تندوري او ترهگرۍ کافي نه وه نو ځکه تر ټولو زیاتې اغیزمنې صوبې اعلا وزیر اړتیا ولره چې د ترهگر او د تندروه تنظیمونو جلسې ته دې وینا وکړي."

د ښي لاس د مذهبي ډلو سره د پاکستان تحریک انصاف خواخوږي څه نوي خبره نه ده.

په کال ٢٠١٦ کې د تحریک انصاف مشر عمران خان په اکوړه خټک کلي کې د مولانا سمیع الحق جامعه حقانیه مدرسې ته د ٣٠٠ میلین روپو مالي امداد ورکړی دی. د صوبايي حکومت مدرسې ته په دومره ډیرو پیسو ورکولو سختې نیوکې شوې وې. مولانا سمیع الحق خپل ځان د افغان طالبانو روحاني مشر ستايي.

د تحریک انصاف مشر عمران خان باندې هم د تندروه مذهبي گوندونو سره د نزدې والې تورونه لگول کیږي او یو وخت یې په پېښور کې د طالبانو لپاره د دفتر پرانستلو وړاندیز هم کړی و هم دغه وجه ده چې میډیا کې د هغه مخالفین هغه ته د "طالبان خان" کلمه کاروي.

پرویزخټک نه یوازې دا چې د دفاع پاکستان په جلسه کې شرکت وکړو بلکې د وزیراعلا په ماڼئ کې یې د اتحاد غړو میلمستیه هم وکړه.

په ټوېټر ډاکټر نعمان نومې تبصره کونکي یو تصویر شریک کړی دی. په دغه تصویر کې لیدل کیږي چې پرویزخټک په میز د دفاع پاکستان د مشرانو سره یوځای ناست دی.

دغه تصویر سره ډاکټر نعمان لیکلي چې پرویزخټک د پېښور په سي ایم هاوس (چیف منسټر هاوس) کې د "غیرقانوني" ډلو د غړو کوربه توب کوي. "دا ( سي ایم هاوس) هغه ځای دی چې دوي به په لایبریرۍ (کتابتون) کې بدلولو."

څیړونکي دا پوښتي چې تحریک انصاف او د پاکستان مسلم لیگ غوندې پارټۍ چې ځان ته د قامي کچې سیاسي گوندونه وايي ولې او یا څنگه د سخت دریځه مذهبي ډلو سره خواخوږي لري او ورسره یوځای کښېني؟

د سیاسي چارو څیړونکی اعجاز خټک وايي دا ددې گوندونو سیاسي نابالغي ښايي.

خو څیړونکی سردار یوسفزی بیا وايی د پاکستان د قامي سلامتیه خپله بیانیه په مذهب اډاڼه ده او په دې کې د سیکولر او د روش فکره سیاسي گوندونو ځای نشته.

ښاغلي یوسفزي وي او ای ډیوه ته وویل "په پاکستان کې دا خبره ډیره ضروري وي چې تحریک انصاف به د سمیع الحق په پښو پرې باسو ته مجبوروي، زرداري به د طاهرالقادري پښو او نوارشریف به مولانا فضل الرحمان" پښو ته مجبوروي.

XS
SM
MD
LG