د پاکستان پوځ دعوه کړې، د افغانستان سره په پوله پرتې د خېبرپښتونخوا په ناارامه ضلع شمالي وزيرستان کې یې د "ترهګرو" پرضد عمليات کړي او څلور "ترهګر" يې وژلي دی. د سرکاري خبري ادارې (اې پي پي) ترمخه پوځ ويلي، امنيتي ځواکونو ته د ترهګرو د موجودګۍ استخباراتي معلومات وو، او بيا يې عمليات کړي دي.
پوځ ويلي، په عملياتو کې د امنيتي ځواکونو او ترهګرو ترمنځ د ډزو تبادله شوې او په نتيجه کې یې څلور ترهګر وژل شوي دي.د پوځ ترمخه د ترهګرو د ولقې نه وسله، ګوله بارود او بارودي مواد ترلاسه کړل شوي، او دوی په علاقه کې په يو شمېر ترهګرو بريدونو کې ککړ وو.
په عملياتو کې امنیتي ځواکونو ته د کوم تاوان اوښتو نه دي ويل شوي او نه د وژل شوو نور تفصيل ورکړل شوی دی. د پوځ او وسله والو ترمنځ د جګړو ځايونو ته اکثره خبريالان نه پرېښودل کيږي د پېښو د ځايونو نه د مرګ ژوبلې په اړه د پوځ یا د وسله والو ډلو دعوې اکثره خپلواکه سرچينې تاييد کولی نه شي.
له دې يوه ورځ وړاندې هم پوځ د خېبرپښتونخوا کې په خېبر او ډېره اسماعیل خان سيمو کې د دوو "ترهګرو" وژلو دعوه کړې وه. پوځ ويلي وو، دغه عمليات د شورو/چارشنبې او زيارت/ پنجشنبې په مينځنۍ شپه کې ترسره شوي وو.
د خېبرپښتونخوا نوي ټاکل شوي وزيراعلا علي امين ګنډاپور په خپله لومړۍ وينا کې ويلي وو، "خېبرپښتونخوا ته تر ټولو غټ چېلنج د ترهګرۍ ورپېښ دی، زما يقين او امېد دی چې خدای تعالا به په مونږ رحم وکړي مونږ چې کومې قربانۍ ورکړي مونږ به د ترهګرۍ په خاتمه کې کامياب شو".
او د پاکستان نوي ټاکل شوي وزیراعظم شهباز شریف هم ویلي د ده حکومت به د ترهګرۍ مخنیوي لپاره نیشنل ایکشن پلان عملي کوي او هڅه به یې وي چې هیواد د بې شمیره چیلنجونو نه په بریالي ډول وباسي.
د نهې/ سه شنبې په ورځ د پوځ د مشر جنرل عاصم منیر په مشرۍ د پاکستان د پوځي کور کمانډرانو کانفرنس کې ويل شوي وو، چې ریاست به د پاکستان د بې ثباته کولو لپاره د دښمنو قوتونو په اشاره د کار کوونکو ترهګرو، د هغوي د سهولت کارو او ملاتړ کوونکو مقابله په بشپړه طاقت سره کوي.
د کور کمانډرانو د غونډې په اعلامیه کې ويل شوي وو، پوځي سرلښکر کور کمانډرانو ته لارښوونه کړې چې هغوي باید د ترهګرو او تندلارو خلاف د کوششونو ثمرات پځای وساتي.
Forum