د افغانستان سره په پوله پرته د پاکستان قبائيلي سيمه کُرم ايجنسۍ کې د امنيتي ځواکونو په گاډي شوې يوه بمي چاؤدنه کې څلور عسکر وژل شوي او درې نور ژوبل شوي دي .
د راپورونو ترمخه دغه پېښه نن د زيارت په ورځ د لوئيرکرم ايجنسۍ د افغانستان سره په پوله لگېدلې علاقه شبک کې رامنځته شوې او د سړک غاړې ښخ بم د امنيتي ځواکونو په گاډي ډزؤل شوی دی .
د امنيتي چارواکو په وينا د چاؤدنې په نتيجه کې يو د ليوي او درې د پوځ عسکر وژل شوي دي ، او ژوبل عسکر نزدې روغتون ته وړل شوي دي .
د پېښې وروستو امنيتي ځواکونو علاقه په گېره کې اخيستې او د لټون عمليات يي پېل کړي دي .
کُرم ايجنسي چې په تېر وخت کې پکې د فرقه ايزه نښتو سره د بدامنۍ پېښې رامنځته شوي ، خو په وروستيو کې په دغې علاقه کې د بدامنۍ سلسله کمه شوې وه .
په عېن حال کې چې په شمالي وزيرستان او خېبرايجنسۍ کې د پاکستان پوځ د وسله والو په ضد عمليات کوي ، پېښور کې په سکول د بريد نه پس روان عمليات لا نور تُند کړی شوي ، او په وروستيو کې کرم ايجنسۍ کې هم د جنگيالو په ضد عمليات ترسره کړی شوي دي .