سويلي کوريا په تادۍ کې خپلې جنګي الوتکې پاڅولې کله چې د نهې/سېشنبې په ورځ د چين او روس جنګي جهازونه په کوريا جزيره کې د سويلي کوريا ټاکل شوي دفاعي حدودو ته ننوتل.
د دې نه وړاندې دوه ځله د تايوان په سمندري اوبو او په سويلي چينايي سمندر کې د امريکا او چين الوتکې يو بل ته مخامخ شوې وې.
د چين د دفاع وزارت په يو بيان کې ويلي کومې الوتکې چې د سويلي کوريا دفاعي حدود ته ورننوتلې وې د چين او روس هغه مشترکه هوايي مشقونو کې يې برخه اخستله ې چې د جاپان او په سويلي چينيايي سمندر دپارسه کېدل.
دا د کال 2019 راهسې شپږم ځل دی چې شريک مشقونه کيږي او دا په داسې وخت کې دي چې د امريکا او د سويلي کوريا ګډ پوځي مشقونه هم شوي.
د سويلي کوريا ټاکل شوي دفاعي حدود د دغه هېواد برخه نه ده خو د سويلي کوريا يونهيپ خبري ادارې ويلي يو هېواد هم دا خبرداری نه و ورکړی چې د چين او روس الوتکې به دغې زون ته ننوځي.
د دې نه وړاندې دوه نورې پېښې شوي چې د اتوار په ورځ پکې د چين جنګي بېړۍ د تايوان په اوبو کې د امريکا د تباه کونکې بېړۍ خوا ته تېره شوې او يو بل چينايي جنګي جهاز په سويلي چينايي سمندر د پاسه په شپږويشتمه می په نړيوال هوايي حريم کې ګرځېدلی. د بايډن حکومت چارواکي دا د چين زورورتيا بولي.
د چين د جهازونو دا پېښې په داسې وخت کې روانې دي چې امريکا د جاپان او فېلپين سره په سويلي چينايي سمندر کې ګډ سمندري مشقونه کوي.
څېړونکي وايي دا به غلط فهمۍ سېوا کړي او د غلطۍ کولو امکان به ډېر کړي ځکه د امريکا او چين د تجارت په پالسيانو، د روس په اوکرين د يرغل او د تايوان د امنيت په سر تاو تريخوالی د وړاندې نه موجود دی.
په دې وخت کې امريکا په انډو-پيسېفېک سيمه کې خپل پوځي قوت نور قوي کوي او د خپلو ملګرو جاپان او سويلي کوريا سره ګډ پوځي مشقونه سېوا کوي.
د پېښو په اړه د چين د خارجه چارو د وزارت وياند وانګ وېنبېن ويلي دا د دې د پاره نه دي چې تګ راتګ په ازادۍ وشي څنګه چې امريکا وايي بلکې په تګ راتګ د واک اخستلو او د يو امکاني پوځي غبرګون راپارولو د پاره دي.
د امريکا د ملي امنيتي کونسل د سټرټيجېک اطلاعاتو د څانګې مشر جون کيربي دا خبره رد کړې چې په دې کې امريکا هم لږه قصور واره او وايي ټولې خواوې غواړي چې دا تاو تريخوال کم کړي.
یادونه: د دې خبر معلومات د وي او ای خبریالې پېټسي وېدا کستوارا د رپورټ نه اخیستل شوي دي
