د وي او ای د خبریال په شمول روس د ۲۰۰ په زیاتو امریکايي شهریانو پابندۍ ولګولې

روس د امریکې په ۲۰۰ شهریانو پابندۍ لګولي دي او وایټ هاوس د جمعې په ورځ وویل د روس اقدام د صدر ولادېمېر پوټن په شان د امر حکمران خطر څرګندوي.

د روس حکومت په امریکايي شهریانو د زیارت، پنجشنبې، په ورځ بندیزونه اعلان کړل چې په کی د وایس اف امریکا یو خبریال هم شامل دی.

د وي او ای خبریال جېف سېلډن د قومي سلامتیا په موضوعاتو خبرنګاري کوي. د سېلډن نه علاوه په امریکايي شهریانو د روس په تازه بندیزونو کې یو شمېر نور خبریالان هم دي چې په کې د امریکايي اخبار واشنګټن پوسټ او د نیویارک ټایمز صحافیان هم شامل دي.

روس په مجموعي توګه په ۲۲۷ امریکايي شهریانو بندیزونه لګولي او د پابندیو ښکار کسان یې د روس په ضد په هلو ځلو تورن کړي دي.

د روس د خارجه چارو وزارت وویل د غه ۲۲۷ امریکایان روس ته نه شي داخلېدی. په امریکايي شهریانو الزام لګول شوی چې د امریکايی حکومت یې مرسته کړي چې د روس خلاف تکلارې ته وده ورکړي، عملي يې او جواز ورته جوړ کړي.

د وایټ هاوس د قومي سلامتیا د مواصلاتو مشیر جان کربي د جمعې په ورځ خبري غونډې ته وویل د روس فېصله د خبریالانو او بیان په ازادۍ د روس د ګامونو سره سمون خوري. د کربي د وېنا ترمخه پوټن د صحافت او د بیان ازادي د خپلو مفاداتو په ضد بللي.

په سېلډن د روس د بندیز په اړه د وي او ای د عامه تعلقاتو څانګې په یو بیان کې وویل د دا وي او ای منشور دی چې د دنیا هرې برخې ته کره، بې طرفه او جامع خبرونه رسووي، وي او ای د سېلډن د خبرونو حمایت کوي او په روس کې د وي او ای اورېدونکو او کتونکو ته د خبرونو رسوولو نه به منع نه کړی شي.

د جېف سېلډن نه مخکې روس په ۲۰۲۳ کې د وي او ای په مخکنۍ مشر یولانډا لوپېز هم پابندي لګولې وه.
د امریکې د سټېټ ډپارټمنټ یا د خارجه وزارت ترجمان مېتیو مېلر نوم هم د روس د بندیزونو په فهرست کې شامل دی.

سټېټ ډپارټمنټ وویل د رای په ازادۍ د روس په قدغنونو تشویش لري. سټېټ ډپارټمنټ د خبریالانو او د شهري حقونو فعالانو د ویرولو د کوښښونو په سختو الفاظو کې غندنه کوي.

د امریکايي خبریالانو نه علاوه روس د امریکې د مختلفو یونېورسټیانو په پروفېسرانو هم پابندۍ ولګولې چې په د امریکې مشهورې یونېورسټۍ هارورډ، یېل او کولمبیا شاملې دي.