ناټو اوکراین ته اجازه ورکړه د دوی په وسلو دې په روس کې دننه هدفونو باندې جوابي بریدونه وکړي

د نېټو مشر ین سټولټنبرګ وایي د خپل اتحاد ددې حق ملاتړ کوي چې له اوکراین سره د روس خلاف پراخېدونکې جګړه کې د دفاع لپاره مرسته وکړي، وایي په دې برخه کې یې کیف ته اجازه ورکړې چې د نېټو وسله وکاروي او په روس کې دننه خپل هدفونه په نخښه کړي.

سټولټنبرګ دا خبرې د جمعې په ورځ په پراګ کې د نېټو د بهرنیو چارو وزیرانو له غونډې وروسته خبریالانو ته وکړې.

تر دې یوه ورځ وړاندې د نېټو متحدینو، امریکې او جرمني په خپلو پالیسیو کې بدلون راوستی او اوکراین ته یې اجازه ورکړې چې که روسي ځواکونه پر دوی برید کوي یا د برید لپاره چمتووالی نیسي په روس کې دننه دې ورباندې بریدونه وکړي.

ین سټولټنبرګ وویل، د اوکراین د متحدینو په پالیسۍ کې دا بدلون چې امریکا پرون په رسمي توګه اعلان کړ او ورپسې جرمني هم د هغه ملاتړ وکړ جایز اقدام دی ځکه د ده په وینا اوکراین په خاصه توګه په خارکیف کې د خپل ځان دفاع کوي.

د امریکې د بهرنیو چارو وزیر اینټني بلینکن پرون د پراګ په غونډه کې په رسمي توګه اعلان وکړ چې صدر جوبایډن اوکراین ته د روس په خاوره کې دننه د امریکې په وسلو د حملو اجازه ورکړې ده.

امریکې تر دې وړاندې د پنجشنبې- زیارت په ورځ اعلان وکړ اوکراین ته یې اجازه ورکړې چې د روس په نخښه کولو لپاره د امریکې ورکړې وسلې یواځې په خارکیف سیمه کې وکاروي.

د جرمني د حکومت ویاند هم د جمعې په ورځ په یوه بیان کې وویل، برلین منلې ده چې کیف د هغو وسلو په ذریعه د روس په خاوره کې دننه د بریدونو د شنډولو لپاره حملې کولای شي چې برلین یې ورکوي.

خارکیف د روس له سرحده د 35 کیلومیټره په فاصله پروت ښار دی چې له نیژدې درو اوونیو راهیسې د روس د پوځي عملیاتو د نوې څپې له پیل وروسته په پرله ‌پسې ډول د روسي ځواکونو تر حملو لاندې دی.

د نېټو پرونۍ غونډه د جولای په میاشت کې په واشنګټن کې د نېټو د بشپړې سرمشریزې لپاره د پلان جوړونې په توګه ټاکل شوې وه، خو په دې اوونۍ کې په روس باندې د اوکراین پر ځوابي بریدونو بحث وشو.

د روس ولسمشر ولادیمیر پوټین د دې اوونۍ په پیل کې د نېټو او امریکې د پالیسۍ بدلون ته په پام سره پر دواړه د جګړې د پراخولو تور پورې کړ او خبرداری یې ورکړ چې دا به نتیجې ولري.

خو د نېټو مشر سټولټنبرګ د جمعې په ورځ د صدر پوټین ته په ځواب کې په ټینګار سره وویل، چې د ځان دفاع د جګړې پراخوالی نه دی، خو وایي روس دا نه خوښوي او پوټین غوښتل د نېټو متحدین د اوکراین له ملاتړه منع کړي:

"د ځان دفاع یو بنیادي حق دی. اوکراین د خپلو خلکو د ساتنې حق او ذمه واري لري او موږ حق لرو چې له اوکراین سره د خپلې دفاع د حق په ساتلو کې مرسته وکړو".

سټولټنبرګ وویل، د نېټو هېوادونه لا دمخه د اوکراین د پوځي مرستو 99 سلنه برابروي خو وایي دی د نېټو له غړو هېوادونو غواړي چې له اوکراین سره د کال 43 ارب ډالره پوځي مرسته وکړي:

"موږ د اوږدې مودې لپاره کلکې ارادې ته اړتیا لرو چې ډاډ ترلاسه کړو اوکراین د ځان د دفاع لپاره د پلان کولو توان لري".

د جمعې په ورځ په جګړه کې د روس په نیول شوې دونیڅک سیمه کې د اوکراین په ډزو پنځه تنه ووژل شوي دي، دا خبر په دې سیمه کې د روس ټاکل شوي مشر ډینس پوشیلین پر ټولنیزو رسنیو خپور کړی دی.

د برتانیې د دفاع وزارت د جمعې په ورځ وویل، په اوکراین کې د جګړې له پیل راهیسې د وژل شویو روسانو شمېر اوس 500,000 ته رسېدلی دی. وایي د روسي پوځیانو د وژل کېدو کچه لوړه ده او یواځې په می میاشت کې د ورځې 1,200 وژل شوي‌ دي.

یادونه:- د رپوټ معلومات له رویټرز، اې پي او اې ایف پي خبري ایجنسیو اخیستل شوي دي.