د مغربي ملکونو د پوځي اتحاد نېټو د غړو ملکونو سر مشران به د شورو، چهارشنبې، په ورځ یوځای کېږي او په غونډه کې به اوکراین سره مرستې په زیاتولو او د خپلې دفاع په موضوعاتو بحث کوي.
په دې موضوعاتو خبرې اترې د تېرو څو میاشتو راهسې دوام لري او د سږ کال په شروع کې د خارجه وزیرانو په سطح هم په دې لړ کې مذاکرات شوي وو خو اوس به د سرمشرانو په کچه ممکنه معاهدو ته حتمي شکل ورکول کېږي.
د شورو، چهارشنبې، د ورځې د غونډې وروسته به د امریکې صدر جوبایډن په وایټ هاوس کې د نېټو مشرانو د ماښام د ډوډۍ کوربتوب کوي.
په واشنګټن کې د نېټو د سرمشرانو غونډه په داسې وخت کې کېږي چې د پوځي اتحاد د جوړېدو ۷۵ کاله لمانځل کېږي.
د نهې، سه شنبې، په ورځ د نېټو د درې ورځنۍ غونډې د شروع کېدو په موقع بایډن وویل امن د طاقت دلارې قایمېدلی شي او موجوده وخت تقاضا کوي چې د اجتماعي طاقت مظاهره وکړی شي.
بایډن وویل امرانه حکمرانان هغه نړیوال نظام چې د تېرو ۸۰ کلون راهسې په عمومي توګه برقرار پاتې شوی نسکورول غواړي، ترهګرې ډلې د بدۍ سازشونه تیاروي چې قتل عام وکړي، انتشار او مصبتونه جوړ کړي او په یورپ کې د یوکرېن خلاف د صدر ولادېمير پوټن د جارحیت جنګ دوام لري.
امریکايي صدر ویل پوټن د یوکرېن د محکوم کولو نه بغېر بل څه نه غواړي، چې د یوکرېن جمهوریت ختم کړي، د یوکرېن ثقافت او دنیا د نقشې نه یوکرېن حذف کړي. بایډن زیاته کړه چې پوټن به په یوکرېن نه ودرېږي خو یوکرېن به د پوټن مخه نېسي.
د نېټو مشرانو د بایډن د وېنا ستاینه وکړه او لاسونه يې وپړقول. توقعو ده چې د نېټو مشران به د یوکرېن ځواکونو سره د نېټو د ملکونو انفرادي مرستې په یو مربوط پروګرام کې رایوځای کړي. د نهې، سه شنبې، په ورځ بایډن او د نېټو مشرانو اعلان وکړو چې یوکرېن به د فضايي دفاع پينځه اضافي نظامونه ورکوي.
د شورو، چهارشنبې، په ورځ د نېدرلېنډ وزیراعظم ډېک شخوف، د ډېنمارک وزیراعظم مېټ فرېډرېکسن او بایډن دا اعلان وکړوچې د ډېنمارک او د نېدرلېنډ حکومتونو یوکرېن د امریکې جوړ اېف شپاړس جنګي جهازونه د ورکولو عمل شروع کړی او امریکا د دې ګام حمایت کوي.
په یو بیان کې چې وایټ هاوس جاري کړی، دریو واړو رهبرانو وویل یوکرېن ته د اېف سېکسټین جهازونو انتقال دوام لري او یوکرېني ځواکونه به د ګرمۍ په دې موسم کې جوګه شي چې دغه جهازونه والوځوي. ناروی او بېلجییم هم وویل یوکرېن ته به نور جهازونه ورکوي.
Forum